Libru 2
Salmo 42—72
Salmo 42 (41)
Yakunaypanörä Tayta Diosta ashinqan
(1) Cantaqkunapa mandaqninpämi. Corépita aywaraqkuna qellqayanqan salmumi.
1 (2) Tayta Dios, lluytsu yakuta ashinqannörämi noqapis qamta ashï.
2 (3) Imayyaqpis kawaq Dios kaptikimi yakunaypanörä qamta ashï.†
¡Imayrä ñöpaykiman chämushä qamta adoranäpä!
3 (4) Runakunami imay hörapis asipaykäyäman “¿maytä Diosniki?” nir.
Tsaymi llakikurnin mallaqaytapis tarïtsu.
Waräpis qoyäpis waqaykällarmi.
4 (5) Unayqa atska runakunata pushakurkurmi Tayta Diospa wayinman aywaq kä.
Tsaychömi fiestata rurar Tayta Diosta kushishqa alabaq kä.
Tsaynö kanqäta yarpaskirmi pasaypa llakikü.
5 (6) ¿Imanirtä malagäna puriykä?
¿Imanirtä llakikü?
Tayta Diosllamanmi imaypis yärakushä.
Paytami imaypis alabashä.
Paymi salvamaq Tayta Diosnï.
6 (7) Imata ruranäpäpis gänasnï manami kannatsu.
Hermón y Mizar jirkakunapita Jordán mayu pashtamuqcho kaykarpis qamllapämi yarparaykä.
7 (8) Manana yanapamaptikimi pasaypa llakishqa kaykä.†
Tsay llakikunqäqa bunyaypa bunyar mayu aywaptin qaqakuna yachapanqannömi mantsariypä kaykan.
8 (9) Tayta Diosmi kuyakuq kanqanta qoyay qoyay tantiyatsiman.
Paqaspapis alabanäpämi yanapaman.
Kawayta qaramaqnï Tayta Diostami llapan shonqüwan mañakü.
9 (10) Imapitapis tsapämaq Tayta Diosnïta mañakurmi nï:
“¿Imanirtä qonqaskallämashqayki?
Conträ shäriyaptinpis llakishqa mana purinäpä yanapaykallämay”.
10 (11) Chikimaqnïkunami qoyay qoyay nikäyäman:
“¿Maychötä Diosniki kaykan?”
Tsaynö nir asipäyämaptin toqshüyaqmi nanaypis chaykun.
11 (12) ¿Imanirtä malagäna puriykä?
¿Imanirtä llakikü?
Tayta Diosllamanmi imaypis yärakushä.
Paytami imaypis alabashä.
Paymi salvamaq Tayta Diosnï.