Salmo 67 (66)
Tayta Diosta llapan runakuna alabayänanpä ninqan
(1) Cantaqkunapa mandaqninpämi. Cuerdayuq instrumentuta tukar cantayanki. Kay salmuqa cantanantsikpämi.
1 (2) Tayta Dios, kuyapäyämarnin bendicionnikita churaykallämuy.
Alli rikayämar yanapaykayällämay. Selah
2 (3) Tsaynöpami willakuynikita maytsaychöpis musyayanqa.
Salvakuq kanqaykitami llapan nación runakunapis tantiyayanqa.
3 (4) ¡Tayta Dios, llapan runakuna alabayäshuy!
¡May markachöpis alabayäshuy!
4 (5) Kay patsacho llapan nacionkunatami alli rikaykanki.
May markacho taq runakunatapis mana jananpaypami juzganki.
Tsaynö kanqaykipita llapan nacionkunachöpis pasaypa kushikuyätsun. Selah
5 (6) ¡Tayta Dios, llapan runakuna alabaykuyäshuy!
¡May markacho taqkunapis alabaykuyäshuy!
6 (7) Chakracho mikuykuna allimi wayunqa.
Tayta Diosnintsikmi bendicionninta churamunqa.
7 (8) Tsaynölla bendicionninta imaypis churaykallämutsun.
Kay patsacho juk kuchunpita jukaq kuchunyaq llapan runakunapis paypita mantsapakuyätsun.