Salmo 66 (65)
Mañakunqanta wiyanqanpita Tayta Diosta alabanqan
(1a) Cantaqkunapa mandaqninpämi. Kay salmuqa cantanantsikpämi.
1 (1b) Kay patsacho taqkuna, Tayta Diosta kushishqa alabayay.
2 Jutinta joqarirnin adorayay.
Munayyuq kanqanpita llapan shonquykikunawan alabayay.
3 Tayta Diosta alabar niyay:
“Ruranqaykiqa llapanpis espantaypämi.
Munayyuq kaptikimi contraykikunapis ñöpaykiman qonqurikuyan.
4 Kay patsacho taqkunaqa llapanmi adoraykäyäshunki.
Cantukunata cantarmi alabayäshunki”. Selah
5 Tayta Dios ruranqanta rikaq shayämuy.
Janantsik shärir mantsakaypä ruranqanta rikayay.
6 Paymi Puka Lamartapis tsakitsirqan.†
Mayuta tsakiskatsirmi unay castantsikkunata päsatsirqan.†
¡Tayta Diosta alabar kushikuyay!
7 Munayyuq kayninwanmi imayyaqpis mandanqa.
Entëru naciontami imanö kanqantapis rikaykan.
Jutsasapakuna paypa contran ama shäriyätsuntsu. Selah
8 ¡Entëru nacioncho taq runakuna, Tayta Diosnintsikta alabayay!
¡Maytsayman wiyakaqpä payta alabayay!
9 Paymi kananyaqpis kawayta qaramantsik.
Contrantsikkuna mana wanutsimänantsikpämi tsapaykämantsik.
10 Tayta Dios, tsaynö karpis probayämashqaykimi.
Qellayta tsullutsir qanranta jipiqnömi purificayämashqayki.
11 Trampamanmi yaykatsiyämashqayki.
Pasaypa ñakaymanmi churayämashqayki.
12 Mana väliq runakunapa munayninchömi katsiyämashqayki.
Imayka cargashqa mayupa päsaqnö y lunyaykaq ninapa päsaqnömi ñakayashqa.
Nirkurpis alli kawayänäpämi yanapayämashqayki.
13 Templuykiman yaykur sacrificiukunata qampämi rupatsishä.
15 Sacrificiuta rupatsinäpämi wera uywakunata apamushä.
Törukunata, chïvukunata y carnërukunatami apamushä. Selah
16 ¡Tayta Diospita mantsapakuq kaqqa, llapaykikuna wiyayänaykipä shayämuy!
Tayta Dios imanö yanapamanqantapis willayäshayki.
17 Llapan shonqüwanmi Tayta Diosta mañakurqä.
Llapan yarpaynïwanmi payta alabarqä.
18 Jutsa ruraynïkunata mana kachariptïqa mañakunqäta Tayta Dios manami wiyamanmantsu karqan.
19 Mañakunqäta wiyamarmi rugakunqänö yanapamashqa.
20 ¡Tayta Dios alabashqa kaykullätsun!
Payqa mañakunqäta wiyashqami.
Kuyamanqantapis musyatsimashqami.