Salmo 65 (64)
Tayta Diosta kushishqa alabayanqan
(1) Cantaqkunapa mandaqninpämi. David qellqanqan salmu.
1 (2) Tayta Dios, Siónchömi alabayäshayki.
Awniyanqätapis llapantami cumpliyäshayki.
2 (3) Pipis mañakayämushuptiki qam wiyankimi.
Llapan runakunapis adorayäshunaykipämi qamman shayämunqa.
3 (4) Kutin kutin jutsa rurayman ishkiyaptïpis qammi perdonayämanki.
4 (5) Kushishqami kawan templuyki patiucho taq runa.
Paytami akrashqayki ñöpaykicho tänanpä.
Santu templuykicho bendicionnikita chaskikurmi kushishqa kaykäyä.
5 (6) Salvakuq Tayta Dios, mañakayämunqäta wiyarmi espantaypä kaqkunata rurar salvayämashqayki.
Tsaymi lamar tsimpancho taq runakunapis qamman yärakayämun.
Maytsaycho taq runakunapis qammanmi confiakayämun.
6 (7) Llapan jirkakunapis mana kuyukunanpämi munaynikiwan shumaq takyätsishqayki.
7 (8) Lamar yaku qayarar pulchaqyaykaqta qammi wiyätsinki.
Nacionkuna contrayki sharkuyaptinpis qammi upällatsinki.
8 (9) Ruranqaykita rikarmi maytsaychöpis runakuna espantashqa rikakuyan.
Rupay yarqamunanläpita rupay jeqananläyaqmi kushishqa adorayäshunki.
9 (10) Qammi kay patsata makikicho tsararaykanki.
Mikuykuna wayunanpäpis qammi tamyatsimunki.
Trïgu alli wayunanpäpis qammi yakuta pashtatsimunki.
Tsaynömi chakrakunata kamaripäyämanki.
10 (11) Barbichanqan chakrakunatapis yakuwanmi qarpanki.
Tamyallawanmi kurpakunatapis ushmatsinki.
Mikuykunamanpis bendicionnikitami churamunki.
11 (12) Bendicionnikiwanmi watatsarkuyäpis.
Pukutaynikipis bendiciontami apamun.
12 (13) Tsunyaq jirkakunacho qewakunapis sheqlliraykanmi.
Jirkakunapis kuyayllapä y kushishqami kaykäyan.
13 (14) Maytsay pampakunachömi üshakunapis cabrakunapis junta kaykäyan.
Yunka chakrakunachöpis trïgumi tsaytsika kaykan.
Llapan tsaykunami pasaypa kushikurnin alabaykäyäshunki.†