Salmo 64 (63)
Chikiqninkunapita tsapänanpä Tayta Diosta mañakunqan
(1) Cantaqkunapa mandaqninpämi. David qellqanqan.
1 (2) Tayta Dios, llakikurnin rugakamunqäta wiyaykallämay.
Mantsaypä chikimaqnïkunapita tsapaykallämay.
2 (3) Mana alli runakuna atacayämänanpä willanakuyaptin pakaykallämay.
Conträ shäriyänanpä willanakuyanqanpita salvaykallämay.
3 (4) Conträ parlayanqanqa imayka fïlu espädanörämi shonqüman chan.
Venënuyuq flëchata flëchaqnömi llutalla ashlliyäman.
4 (5) Jutsaynaq runatami manakaqkunata tumpayan.
Pitapis mana mantsaypami llutalla tumpayan.
5 (6) Kikinpura willanakurmi parlapänakuyan mana allita rurayänanpä.
Pitapis trampata churapäyänanpämi willanakuyan.
Paykunaqa yarpäyan pipis mana rikanqantami.
6 (7) Tsaynöpis yarpäyan pipis mana taripunanpä kanqantami.
¡Paykunaqa pasaypa mana allitami yarpäyan!
7 (8) Tsaymi Tayta Dios flëchanwan flëchaykunqa.
Paykunataqa illaqpitami castiganqa.
8 (9) Kikinkunapa shiminkunapitami chikishqa kayanqa.
Tsaynö kaykaqta rikarmi paykunata asipäyanqa.
9 (10) Tayta Dios castiganqanta musyarmi llapan mantsariyanqa.
Tsaymi Tayta Dios imata ruranqantapis willakuyanqa.
Llapantapis Tayta Dios kamakätsinqantami musyayanqa.
10 (11) Alli ruraq runaqa Tayta Dios yanapanqanpitami kushikunqa.
Imapita tsapänanpäpis payllamanmi yärakunqa.
Tayta Dios munanqannö kawaq runakunaqa kushikuyanqami.