Salmo 63 (62)
Tayta Diosta ashinqan
(1) David qellqanqan salmu. Judá nacionpa tsunyaqnincho kanqanta yarpaskirmi kay salmuta qellqarqan.†
1 (2) ¡Tayta Dios, qamllami Diosnï kaykanki!
Tsaka tsakallami qamta ashï.
Yakunaypanörämi ñöpaykicho kayta munä.
Wanuyparämi qamwan kawayta munä.
Pasaypa tsaki chakranömi kaykä.†
2 (3) Templuykicho revelamänaykitami munaykä.
Llapanpä munayyuq kanqaykitami tantiyakuyta munä.
3 (4) Kuyamanqaykimi kawaynïpitapis mas alli.
Tsaymi llapan shonqüwan imaypis alabashayki.
4 (5) Kawanqäyaqqa qamtami agradëcikushayki.
Makïta joqarkamurmi mañakamushä.
5 (6) Llapan shonqüwan kushishqa alabarmi contentakushä.
Alli allillata mikur kushikunqänömi kushikushä.
6 (7) Cämächöpis qamllapämi yarparaykä.
Paqaspa mana pununarpis qamllapämi shonqü yarparan.
7 (8) Llapanchöpis qammi yanapamashqayki.
Älayki rurincho karmi pasaypa kushikü.†
8 (9) Llapan shonqüwanmi qamman qellukämü.
Derëcha kaq makikiwanmi imaypis jancharämanki.
9 (10) Wanutsimayta munaqkunaqa kikinkunami puntata wanuyanqa.
10 (11) Paykunataqa espädawanmi wanutsiyanqa.
Ayantapis chacalkunami mikuyanqa.
11 (12) Reymi itsanqa Tayta Dios yanapanqanpita kushikunqa.
Tayta Diospa jutinta joqariqkunaqa kushishqami alabayanqa.
Llullakuqkunami itsanqa ima niytapis kamäpakuyanqatsu.