Salmo 62 (61)
Tayta Diosman yärakunqan
(1) Cantaqkunapa mandaqninpämi. Jedutúnpämi. David qellqanqan salmu.
1 (2) Tayta Diosllami añaw kawanäpä yanapaman.
Paypitami salvacionnï.
2 (3) Payllami salvaman y imapitapis tsapäman.
Pakakunä qaqa kaptinmi mana alliman ishkishätsu.†
3 (4) Qamkunaqa ¡imayyaqrä atacaykäyämanki!
¡Imayyaqrä ushakätsimayta munaykäyanki!
Juchunaykaq pirqatanömi tanqaykäyämanki.
Qotukaykaq murällatanömi tanqaykäyämanki.
4 (5) Qamkunaqa ushakätsiyämänallaykipämi yarpachakuykäyanki.
Llullakurpis pasaypami kushikuyanki.
Janan shonqullami allitupäyämanki.
Shonquykikunachöqa chikiykäyämankimi. Selah
5 (6) Tayta Diosllami añaw kawanäpä yanapaman.
Payllamanmi imaypis yärakü.
6 (7) Payllami salvaman y imapitapis tsapäman.
Pakakunä qaqa kaptinmi mana alliman ishkishätsu.
7 (8) Tayta Diosllami salvamaqnïqa.
Pay yanapamaptinmi kushishqa kawaykä.
Paymi tsapäman y rikaman.
8 (9) Marka mayikuna, ima kaptinpis Tayta Diosman imaypis yärakushun.
Llapan shonquntsikwan payta mañakushun.
Tayta Diosmi tsapämaqnintsik kaykan. Selah
9 (10) Runakunaqa imaynaqpis y imaykayuqpis jamaynöllami kaykäyan.
Llapan runakunata qorirkur balanzacho pësaptin manami ichikllapis lasantsu.
10 (11) Tsaynö kaptinqa suwakuyman ama jatikäyaytsu.
Jukpa imantapis apakuyanqaykiwan ama runa tukuyaytsu.
Imaykayuq karpis qellaymanqa ama yärakuyaytsu.
11 (12) Tayta Dios, atska kutimi wiyashqä munayyuq
12 (13) y kuyapäkuq kanqaykita.
Imanöpis kawayanqanman tupumi pitapis juzganki.†