Salmo 61 (60)
Mana allikunapita tsapänanpä Tayta Diosta mañakunqan
(1) Cantaqkunapa mandaqninpämi. Cuerdayuq instrumentuta tukar cantayanki. David qellqanqan salmu.
1 (2) Tayta Dios, qayakamunqäta wiyaykallämay.
Mañakamunqäta chaskiykallämay.
2 (3) Valornïpis manana kaptinmi shonqüpis ushakaykanna.
Markäpita pasaypa karucho karnïmi qamta mañakamü.
Altunnin qaqaman pakaykallämay.
3 (4) Qammi kaykanki pakakunä törri.
Qammi kaykanki chikimaqnïkunapita tsapämaqnï.
4 (5) Sagrädu tolduykichömi imaypis täkuyta munaykä.
Tsaychömi älaykiwan imapitapis tsapämanki.† Selah
5 (6) Taytay, qamta llapan awninqäta musyaykankimi.
Qamta mantsapakushuqnikikuna chaskiyänanpä kaq herenciatami qarayämashqayki.
6 (7) Rey atska wata kawananpä yanapaykullay.
Payqa imayyaqpis kawaykullätsun.
7 (8) Bendicionnikiwan imaypis mandaykullätsun.
Mana kachaypa imapitapis tsapaykullay.
8 (9) Tsaynö yanapanqaykipitami imaypis alabashayki.
Qamta llapan awninqätapis qoyay qoyaymi cumplishä.