Salmo 60 (59)†
Tayta Dios yanapaykunanpä mañakunqan
(1-2) Cantaqkunapa mandaqninpämi. Liriu waytakuna niyanqan cantupa tönunwan kay testimoniu salmuta cantayanki. David qellqanqan salmu. Yachatsinapämi. Naharaimi particho y Soba particho taq Aram runakunawan pelyanqanta yarpaskirmi kay salmuta qellqarqan. Tsaynöpis kay salmuta qellqarqan Joab tsaypita kutir chunka ishkay waranqa (12,000) edomita runakunata Kachi Pampacho wanutsinqanta yarpaskirmi.
1 (3) Tayta Dios, ajanarninmi yanapayämankinatsu.
Kananqa yapay yanapaykayällämay.
2 (4) Qammi castïguykiwan kay patsata tsuktsukyätsir kichakätsirqayki.
Kananqa kichakashqa kaykaqkunata wichqaykullayna.
3 (5) Noqakunataqa ñakaymanmi churaykayämashqayki.
Castïguykiwanmi vïnu upushqa runanö löcuyashqa kaykäyä.
4 (6) Qampita mantsapakuykäyaptïqa chikimaqnïkuna manarä flëchayämaptin qeshpir aywakuyänäpä yanapaykayällämay. Selah
5 (7) ¡Munaynikiwan salvaykayällämay!
Tsaynöpami kuyanqayki runakuna kar librina kayäshä.
6 (8) Templunchömi Tayta Dios nirqan:
“Siquem partita y Sucot pampatami kushishqa rikatsiyäshayki.
7 (9) Galaad runakuna y Manasés runakuna täyanqanpis noqapami kaykan.
Efraín runakunaqa pelyacho tsapakunä cascumi kaykäyan.
Judá runakunaqa mandakunä värami kaykäyan.
8 (10) Moab nacionqa mayllakunä lavatoriumi kaykäyan.
Edom nacionmanmi llanqïta jitarishä.
Filisteo runakunata vinciskirmi pasaypa kushikushä”.
9 (11) Murallashqa markata atacayänäpä ¿pillarä pushaykamanman?
Edom nacionta atacayänäpä ¿pillarä apaykamanman?
10 (12) Tayta Dios, kachariyämaptiki manami pipis kantsu yanapayämänanpä.
Mananami soldädükunatapis yanapaykankinatsu.†
11 (13) Runakuna yanapayämanqanqa manakaqllapämi kanqa.
Conträkunata vinciyänäpä yanapaykayällämay.
12 (14) Tayta Dios yanapamashqaqa vincishunmi.
Paymi chikimaqnintsikkunata ushakätsinqa.†