Salmo 59 (58)†
Imapitapis tsapämaqnintsik Tayta Dios kanqan
(1) Cantaqkunapa mandaqninpämi. Ama ushakätsiytsu niyanqan cantupa tönunwan kay salmuta cantayanki. Payta wanutsinanpä wayinman Saúl mandanqanta yarparmi kay salmuta David qellqarqan.
1 (2) Tayta Diosllä, chikimaqnïkunapita salvaykallämay.
Atacamaqnïkunapita tsapaykallämay.
2 (3) Mana alli runakunapita libraykallämay.
Wanutsikuq runakunapita salvaykallämay.
3 (4) Tayta Dios, ima jutsatapis mana ruraykaptïmi munayyuq runakuna wanutsiyämänanpä shuyaraykäyäman.
4 (5) Llutankunata mana ruraykaptïmi conträkuna atacayämänanpä shamuykäyan.
¡Ras shamur yanapaykallämay!
¡Imanö kanqätapis rikaykallämay!
5 (6) Llapanta mandaq Tayta Dios, Israel runakunata kuyaq Diosmi kanki.
Mana cäsukuq mana alli runakunata castigaykullay.
Paykunataqa ama kuyapaytsu. Selah
6 (7) Paykunaqa paqaspa kutimur imayka kanikuq allqunömi büllata rurar markata tumayan.
7 (8) Ajarmi pushuqaytapis aqtuyanrä.
Mana wiyanqaykita yarparmi ayaq shiminpa runa mayintapis ashlliyan.
8 (9) Tayta Dios, paykunataqa kushipankimi.
Qamman mana yärakamuqkunatami asipanki.†
9 (10) Qammi tsapämaqnï kaykanki.
Qammi imapitapis cuidamaqnï kaykanki.
10 (11) Qamqa kuyamaqnï Tayta Diosmi kaykanki.
Noqa musyämi yanapamänaykipä kanqanta.
Favornï pelyaptikimi chikimaqnïkunata vincinqaykita rikashä.
11 (12) Tsay runakunata llapantaqa ama wanuykatsillaytsu.
Munaynikiwan maytsaypapis qarquykullay.
Tsaynöpami castiganqaykita imaypis qonqäyäshätsu.
¡Tayta Dios, tsapämaqnï escüdumi kaykanki!
12 (13) Paykunaqa imata parlarpis mana allitami parlayan.
Runa tukuyanqanpita y llullakuyanqanpita imaykapis päsatsun.
13 (14) Ajanarnin chipyaq ushakaykatsillay.
Paykunataqa juklla illakaykatsillay.
Tsaynöpami pïmaypis musyanqa Jacobpita aywaraqkunacho y maytsay nacionchöpis rey kanqaykita. Selah
14 (15) Tsay mana alli runakunaqa paqaspa kutimurmi imayka kanikuq allqunö büllata rurar markata tumayan.
15 (16) Wakpa kaypami mikuyta ashir puriyan.
Mikuyta tariyanqanwan pachan mana juntaptinmi allqu aullaqnörä qayaräyan.
16 (17) Noqami itsanqa munayyuq kanqaykipita cantapäshayki.
Kuyakuq kanqaykipitami cada tuta alabashayki.
Qammi imapitapis tsapämaqnï kanki.
Qammi llakikunqä höra pakakunä kanki.
17 (18) Tayta Dios, qamtami alabashayki.
Qammi tsapämaqnï y pakakunä kanki.
Qammi kuyamaq Diosnï kanki.