Salmo 58 (57)
Autoridäkuna alli arreglayänanpä Tayta Diosta mañakunqan
(1) Cantaqkunapa mandaqninpämi. Ama ushakätsiytsu niyanqan cantupa tönunwan kay salmuta cantayanki. David qellqanqan.
1 (2) Munayyuq autoridäkuna, ¿rasunpaku runakunata alli juzgaykäyanki?
¿Runakunata alliku arreglaykäyanki?
2 (3) Qamkunaqa mana allita rurayänallaykipämi yarpachakuykäyanki.
Tsaynöpami kay nacioncho runakunata chikinakaykätsiyanki.
3 (4) Mana alli runakunaqa yuriyanqanpita patsami mana alli kayan.
Llullakuqkunapis yuriyanqanpita patsami llulla kayan.
4-5 (5-6) Tsay runakunaqa venënuyuq culebranömi mana alli kayan.
Brüju tukapaptinpis mana cäsukuq culebranömi kayan.
Alli runakuna tantiyatsiyaptinpis upa tukurninmi chaskikuyantsu.
6 (7) ¡Tayta Dios, mana alli runakunapa kirunkunatapis chaqchuskiy!
¡Tsay leonkunapa curmïlluntapis pakiriy!
7 (8) Maki paltacho yaku illakanqannö paykuna illakäyätsun.
Nänicho qewa tsakiqnö ushakäyätsun.
8 (9) Lakatupa rastrun ushakanqannö ushakäyätsun.
Shullu wamra atsikyay patsata mana rikanqannö kayätsun.
9 (10) Manaräpis tantiyakuptin tsaki kashatanö nina rupar ushatsun.
Mana alli qewata llukiskir jitaqnö kawaykaqta ajashqa jitariyätsun.
10 (11) Contrankuna tsaynö ushakäyaptin Tayta Diosta cäsukuqkunaqa kushikuyanqami.
Chikiqninkunapa yawarninwanrämi chakinkunatapis kushishqa mayllakuyanqa.
11 (12) Tsaymi llapanpis niyanqa:
“¡Tayta Diosta allipämi cäsukushqantsik!
¡Tayta Diosqa llapan runakunatami juzganqa!”