Salmo 57 (56)†
Chikiqninkunapita salvananpä mañakunqan
(1) Cantaqkunapa mandaqninpämi. Ama ushakätsiytsu niyanqan cantupa tönunwan kay salmuta cantayanki. Saúlpita qeshpir machayman pakakunqanta yarpaskirmi kay salmuta David qellqarqan.
1 (2) Tayta Dios, kuyapaykallämay.
Ama kachaykallämaytsu.
Qamllamanmi amparakamü.
Peligru päsanqanyaq älayki rurinman pakaykallämay.
2 (3) Poderyuq Tayta Dios, imaypis yanapamaqnï kaptikimi qamta mañakamü.
3 (4) Qammi ciëlupita patsa kuyapämar imaypis yanapamanki.
Chikimaqnïkuna ajashqa qatikachäyämaptinpis qammi salvamanki. Selah
4 (5) Conträkuna wanutsimayta munayaptinmi leonkunapa chawpincho kaykaqnö kaykä.
Paykunapaqa kirunkunapis lanzanö y flëchanömi.
Qallunkunapis fïlu espädanömi.
5 (6) Tayta Dios, gloriachöpis llapanpä munayyuqmi kanki.†
Kay patsachöpis munayyuqmi kanki.
6 (7) Chikimaqnïkunami purikunäman trampata churapäyämashqa.
Pasaypa mantsariywanmi gänasnïpis ushakashqa.
Purikunämanmi pözuta uchkuyashqa.
Tsay uchkumanqa kikinkunallami jeqayashqa. Selah
7 (8) Tayta Dios, shonqü listumi kaykan.
Cantukunata cantarmi alabashayki.
Llapan shonqüwanmi qamta alabashayki.
8 (9) ¡Rikchay, alma!
¡Rikchay, arpa! ¡Rikchay, salteriu!
¡Tsaka tsakalla Tayta Diosta alabashun!
9 (10) Tayta Dios, llapan runakunapa ñöpanchömi alabashayki.
Maytsay nación runakunapa ñöpanchömi alabashayki.
10 (11) Kuyamanqaykita manami imanöpapis tantiyayta kamäpakütsu.
Ciëluchöpis manami pipis qamnö awninqanta cumpliq kantsu.†
11 (12) Tayta Dios, gloriachöpis llapanpä munayyuqmi kaykanki.
Kay patsachöpis munayyuqmi kaykanki.