3 Tsaynö niptinmi Abram juklla lätakaykurqan. Tsaychömi Tayta Dios nirqan: 4 “Pactu ruranqäta cumplirmi atska nación runakunapa taytan kanaykipä churashayki. 5 Kananpitaqa manami Abramnatsu jutiki kanqa, sinöqa Abrahamnami.^b Tsaynö jutiki kanqa atska nación runakunapa taytan kanaykipä churashqa kaptïmi.^† 6 Qampita aywaraqkunaman bendicionnïta churaptïmi atska nacionkuna y reykunapis paykunapita kayanqa.

7 “Kay pactuqa manami qamllapätsu kanqa, tsaypa trokinqa tsurikikunapä, willkaykikunapä, shurukta willkaykikunapä y paykunapita mas aywaraqkunapäwanmi. Kay pactutaqa imaypis cumplishämi. Qampa Diosniki kanqänömi qampita aywaraqkunapapis Diosninkuna kashä. 8 Qorpanölla taykanqayki Canaáncho kaq markakunatami rikatsishayki. Tsaynöllami qampita aywaraqkunata rikatsishä imayyaqpis tsaycho täyänanpä.^† Qampita aywaraqkunapa Diosninmi imaypis kashä”.

9-10 Mastami Abrahamta Tayta Dios nirqan: “Pactu ruranqäta chaskiyänaykipäqa qampis y qamwan llapan ollqu kaqkunapis cuerpuykikunata señalakuyay. Tsaynölla señalakuyanqa qampita aywaraqkunapis.^† 11 Señalakur penqaynikipa puntancho qaranta roquyanki. Tsaynö señalakurmi pactu ruranqäta chaskiyanki. 12 Kananpita ollqu yuriq kaqtaqa puwaq junaqyuqllata pallunta señalayanki. Makikicho yuriqkunata y juklä nacionpita wätaynikipä rantinqayki runakunatapis tsaynölla señalayanki. 13 Pactu ruranqäta imaypis yarpäyänaykipä llapayki mana qonqaypa señalakuyanki. 14 Mayqanpis mana señalakurqa pactu ruranqäta manakaqmanmi churaykan. Tsaynö kaqtaqa qamkunapita qarqunki”.

15 Mastami Abrahamta Tayta Dios nirqan: “Kananpitaqa warmikipa jutin manami Sarainatsu kanqa, sinöqa Saranami.^c 16 Payman bendicionnïta churaptïmi tsuriki yurinqa. Tsaymi warmiki kanqa atska nacionkunapa maman. Paypa wamrankunapita aywaraqkunami reykunapis kayanqa”.

17 Tayta Dios tsaynö niptinmi yapay lätakaykur Abraham shonqullancho asikur nirqan: “Juk pachak (100) watayuq kaykarnaqa ¿imanöpatä warmïtapis qeshyaqta rikakatsïman? Sarapis isqun chunka (90) watayuqna kaykarqa ¡imanöpanashi wamrayuq kanman!”

18 Tsaymi Tayta Diosta Abraham nirqan: “Taytay, tsurï Ismaelman bendicionnikita churaptiki allimi kanman”.

19 Tsaynö niptinmi Tayta Dios nirqan: “Manami Ismaelpätsu nikä, sinöqa warmiki Saracho yurinanpä kaq tsurikipämi. Tsay tsurikipa jutinmi kanqa Isaac.^d Pactu ruranqäqa Isaacpä y paypita aywaraqkunapämi imayyaqpis kanqa. 20 Mañakamanqaykinöllami Ismaelmanpis bendicionnïta churashä paypita aywaraqkuna jatun nación kayänanpä. Paypa tsurinkunapis chunka ishkay mandaqkunami kayanqa.^† 21 Pactuta ruranqämi itsanqa Saracho yuriq tsuriki Isaacpä kanqa. Watan kaynö witsanqa wamrayuqnami Sara kaykanqa”.

22 Tsaynö niskirmi tsaypita Tayta Dios aywakurqan. 23 Tsay junaqmi Tayta Dios ninqannölla makincho kaykaq llapan ollqukunata Abraham señalarqan. Tsaymi tsurin Ismaelta, makincho yuriq runakunata y wätayninpä rantinqan runakunatapis señalarqan. 24 Tsay señalakunqan junaq Abraham kaykarqan isqun chunka isqun (99) watayuqmi. 25 Tsurin Ismaelnami kaykarqan chunka kimsa watayuq. 26 Tsay junaqllami Abraham y tsurin Ismaelpis señalakuyarqan. 27 Tsaynöpis tsay junaqllami Abraham señalarqan makincho yuriq ollqu wätayninkunata y rantinqan jäpa runakunatapis.