Ismael yurinqan
16
Abrampa warmin Sarai qolluq kaptinmi wamran karqantsu. Saraipa wätayninmi Agar jutiyuq jipash karqan. Agarqa Egiptupitami karqan. 2 Abramtami Sarai nirqan: “Qolluq kanäpämi Tayta Dios destinamashqa. Tsaynö kaptinpis wamrayuq kanäpä wätaynï Agarwan punuykullay. Paypa wamran yuriptinmi noqapa wamränö kanqa”.Tsaynö niptinmi Abram awnirqan.
3 Awniptinmi Saraiqa Abramta punutsirqan Egiptupita apamunqan Agarwan. Tsayqa karqan Canaáncho chunka watana Abram taykaptinmi. 4 Abramwan punur qeshyaq rikakuskirmi Agarqa patrönan Saraita manakaqman churar qallaykurqan.
5 Tsaymi Abramta Sarai nirqan: “Agarwan pununaykipä kikï nikaptïpis qeshyaq rikakur chikimänanpä qammi jutsayuq kaykanki. Tsaynö kanqaykipitami Tayta Dios juzgashunki”.
6 Tsaynö niptinmi warmin Saraita Abram nirqan: “Wätaynikiqa makikichömi kaykan. Tsaynö kaykaptinqa qampitanachi imata ruraptikipis”.
Tsaynö niptinmi Saraiqa wätaynin Agarta puëdiqta mana puëdiqtapis mandar qallaykurqan. Tsaynö ñakatsiptinmi Agarqa qeshpir aywakurqan.
7 Tsaynö aywaykaptinmi Tayta Diospa angelnin tsunyaq jirkacho kaykaq pukyu ñöpancho yuriparqan. Tsay pukyuqa karqan Shur partipa aywana nänichömi. 8 Tsaychömi ángel tapurqan: “Saraipa wätaynin Agar, ¿maypitatä shamuykanki? Tsaynöpis ¿maypatä aywaykanki?”
Tsaymi Agar nirqan: “Patrönä Saraipitami qeshpiykä”.
9 Tsaymi Tayta Diospa angelnin nirqan: “Patrönayki Saraiman kutiykur pay mandashunqaykita imatapis ruray”.
10 Tsaynöllami yapay nirqan:
“Wamraykipa tsurinkunapitami yupaytapis mana atipaypä atskaman mirayanqa.
11 Qeshyaq kaykanqayki wawayki ollqumi kanqa.
Tayta Diosmi wiyashushqayki llakikur mañakunqaykita.
Tsay wamraykipa jutinmi kanqa Ismael.a
12 Tsay wamraykiqa chucaru cawallunömi kanqa.
Pïmaywan pelyaptinmi pïmaypis chikir contran shärinqa.
Castankunawanpis chikinakurmi kawanqa”.
13 Kikin Tayta Dioswan parlanqanta tantiyarmi Agar nirqan: “Rikamaqnï Diostami rikashqä”.
Tsaypitami Diospa jutinta churarqan El-Roíb nir. 14 Tsaymi tsay pözupa jutin churaparqan Beer Lahai-Roí jutin kananpä.c Tsay pözuqa kaykan Cadespita Beredman päsaq nänichömi.