2 Tsaynö niptinmi Abram nirqan: “Tayta Dios, tsurï mana kaykaptinqa ¿pïnïpätä llapan qaramanqaykipis kanqa? Wanukuptïpis Damascupita sirvimaqnï Eliezerllachi llapan imaykäkunawanpis quëdanqa. 3 Tsuriynaq kanäpä destinaykämaptikiqa munaynïcho yuriq sirvimaqnillächi llapan imaykäwanpis quëdanqa”.

4 Tsaynö niptinmi Tayta Dios nirqan: “Manami sirvishuqnikitsu imaykaykiwanpis quëdanqa, sinöqa kikikipa tsurikimi”.

5 Tsaypita Abramta waqtaman pushaykurmi Tayta Dios nirqan: “Ciëluta rikay. ¿Qoyllurkunata yupayta kamäpakunkiku?”

Nirkurmi yapay nirqan: “Tsaynöllami qampita aywaraqkunapis yupayta mana atipaypä kayanqa”.^†

6 Tsaynö ninqanta Abram criyiptinmi jutsaynaqtana Tayta Dios chaskirqan.^† 7 Nirkurnami Tayta Dios nirqan: “Noqaqa Tayta Diosmi kaykä. Kay rikatsinqä chakrakunata herenciayki rikatsinäpämi caldeo runakuna täyanqan Ur markapita jipimurqä”.

8 Tsaynö niptinmi Abram tapurqan: “Tayta Dios, ¿imanöpatä musyashä kay rikatsimanqaykikuna rasunpaypa noqapä kanqanta?”

9 Tsaymi Tayta Dios nirqan: “Kayman apamuy juk ternërata, juk cabrata y juk carnëruta. Tsay uywakuna kayätsun kimsa watayuq. Tsaynölla apamunki juk kullkushta y juk pushapa palumata”.

10 Tsaynö niptinmi Abram tsay uywakunata apaykur pullanpa cuartizaskir frenti frenti churarqan.^† Palumatawan kullkushtami itsanqa cuartizarqantsu. 11 Tsay churanqan aytsaman wiskurkuna shayämuptinmi Abram wajakurqan. 12 Patsa tsakaykaptinnami Abram pasaypa punukaskirqan. Punukashqa kaykarmi suëñuynincho tsakayta rikar pasaypa mantsarirqan.

13 Tsay hörami Tayta Dios nirqan: “Qampita aywaraqkunami chusku pachak (400) wata juk markacho jäpa runakunapa wätaynin kar ñakayanqa.^† 14 Tsaynö kaptinpis tsay marka runakunatami castigashä. Nirkurnami qampita aywaraqkunata imaykayuqta jipimushä.^† 15 Manarä tsaykuna kaptinmi qamqa awkinyashqana wanukur unay castaykikunawan tinkuq aywakunki. 16 Chusku pachak wata päsaskiptinnami qampita aywaraqkuna kay taykanqaykiman kutiyämunqa. Kutimunanpäqa kaycho taq amorreo runakunapa jutsankuna mana atipaypämi kanqa”.

17 Patsa tsakaskiptinnami shanshayuq qoshnirrä kanalla y qeru puntancho lunyarrä nina yuriskir churaraykaq aytsakuna chawpinpa päsarqan.^a 18 Tsay junaqmi Abramwan pactuta rurar Tayta Dios kaynö nirqan: “Kay taykanqayki partita qampita aywaraqkunatami rikatsishä Egipto mayupita Éufrates jatun mayuyaq.^† 19 Tsaychömi taykäyan ceneo runakuna, cenezeo runakuna, cadmoneo runakuna, 20 heteo runakuna, ferezeo runakuna, refaíta runakuna, 21 amorreo runakuna, cananeo runakuna, gergeseo runakuna y jebuseo runakunapis”.