Lotta prësu apaykäyaptin Abram kutitsimunqan
14
Tsay witsanmi Sinar markapa mandaqnin rey karqan Amrafel. Elasar markapa mandaqnin reymi karqan Arioc. Elam markapa mandaqnin reymi karqan Quedorlaomer. Goim markapa mandaqnin reymi karqan Tidal. 2 Tsay reykunami guërracho kaykäyarqan wakin markakunapa mandaqnin reykunawan. Tsay reykunaqa kayarqan Sodoma markapa reynin Bera, Gomorra markapa reynin Birsa, Adma markapa reynin Sinab, Zeboim markapa reynin Semeber y Bela markapa reyninpis. Bela markapa jukaq jutinmi karqan Zoar. 3 Tsay pitsqa reykunami soldädunkunata qoriyarqan Sidim pampaman. Tsay pampachömi kananqa Kachi Lamar kaykan. 4 Tsay reykunataqa rey Quedorlaomermi chunka ishkay wata munaynincho tsarararqan. Tsaypita juk wata päsaskiptinnami pitsqan reykuna willanakur Quedorlaomerpa contran shäriyarqan.5 Tsaymi juknin wata Quedorlaomer y payta yanapaq reykunapis soldädunkunawan aywayarqan Astarot Karnaimman. Tsaycho pelyarmi refaíta runakunata wanutsiyarqan. Tsaynöllami Ham markapa aywar zuzita runakunatapis wanutsiyarqan. Tsaypita Save-quiriataimpa aywar emita runakunatapis wanutsiyarqan. 6 Nirkurnami Seir jallqakunapa aywar horeo runakunatapis wanutsiyarqan. Wakin horeo runakuna qeshpiyaptinmi qatikachäyarqan Parányaq. Tsayqa kaykan tsunyaq jirka ñöpanchömi. 7 Tsaypita kutimurmi Quedorlaomer y paywan aywaqkuna En-mispatman chäyarqan. Tsaypa jukaq jutinmi karqan Cades. Tsay kinranmi amalecita runakunata ushakätsiyarqan. Tsaypita päsarmi Hazezon-tamar particho taq amorreo runakunatapis ushakätsiyarqan.
8 Tsaymi Sodomapa, Gomorrapa, Admapa, Zeboimpa y Belapa mandaqnin reykuna kamarikuyarqan Sidim pampacho guërrata rurayänanpä. (Bela markapa jukaq jutinmi karqan Zoar.) 9 Tsaychömi pitsqa reykuna chusku reykunawan pelyayarqan. Tsay chuskun reykunami kayarqan Elampa mandaqnin rey Quedorlaomer, Goimpa mandaqnin rey Tidal, Sinarpa mandaqnin rey Amrafel y Elasarpa mandaqnin rey Arioc. 10 Sidim pampachöqa breaa pözukunami atska karqan. Tsaymi Sodomapa y Gomorrapa reyninkuna soldädunkunawan guërrapita qeshpiykäyanqancho tsay brea pözukunaman jeqarpuyarqan. Wakin kaq reykunami soldädunkunawan jallqakunapa qeshpiyarqan.
11 Tsay pelyacho vinciq chusku reykunami soldädunkunawan Sodoma y Gomorra markakunaman yaykuykur llapan imaykantapis mas alli kaqkunata apakuyarqan. Tsaynöllami llapan mikuyninkunatapis apakuyarqan. 12 Abrampa sobrinun Lotmi taykarqan Sodomacho. Tsaymi Lotta prësu tsariskir apakuyarqan llapan imaykankunatawan. 13 Tsaynö apaykäyaptinmi juk runa qeshpiskir Abramta willaq aywarqan.
(Abramqa hebreo runami karqan. Payqa taykarqan amorreo runa Mamripa encina munti chakranchömi. Mamre karqan Escolpa y Anerpa wawqinmi. Paykunaqa Abramwan yanapanakuyänanpämi willanakuyashqa kayarqan.)
14 Sobrinun Lotta prësu apaykäyanqanta musyaskirmi Abramqa qorirqan makincho yuriq sirviqninkunata. Tsay runakunami kimsa pachak chunka puwaq (318) kayarqan. Paykunata pushakurkurmi Dan markayaq Abram aywarqan prësu apaq runakunapa qepanta. 15 Taripaykurmi sirviqninkunawan illaqpita atacarnin paqaspa vinciyarqan. Tsaynö vincirmi Hoba markayaq qatipäyarqan. Tsay markaqa Damasco marka norti kaqläpami karqan. 16 Nirkurmi llapan apayanqankunata qechur kutitsiyämurqan. Tsaynöpami sobrinun Lottapis imaykankunatawan kutitsiyämurqan. Tsaynöllami warmitapis ollqutapis prësu apayanqanta kutitsiyämurqan.
Abramta Melquisedec bendisanqan
17 Quedorlaomerta y payta yanapaq reykunata vinciskir Abram kutiykämuptinmi Sodoma markapa mandaqnin rey tariparqan Save pampaman. Tsay pampapa jukaq jutinmi Mandaq Reypa Pampan. 18 Tsaymi Salem markapa mandaqnin rey Melquisedecpis tsayman chaykur tantatawan vïnuta Abramta qararqan. Melquisedecqa poderyuq Tayta Diosta sirviq sacerdötimi karqan.b 19 Abramta bendisarmi nirqan:
“Ciëluta y kay patsata kamaq poderyuq Tayta Dios bendicionninta qamman churaykallämutsun.
20 Poderyuq Tayta Dios alabashqa kaykullätsun.
Paymi yanapashushqayki contrayki kaq runakunata vincinaykipä”.
Tsaynö niptinmi Abramqa qechur kutitsimunqanpita Melquisedecta diezmuta qararqan.†
21 Sodomapa mandaqnin reynami Abramta nirqan: “Marka mayïkunataqa kutitsimay. Tsaypita kaqtaqa imaykatapis llapanta apakuy”.
22 Tsaynö niptinmi Abram nirqan: “Ciëluta y kay patsata kamaq poderyuq Tayta Diospa jutincho jurarmi nishqä 23 qampa kaqtaqa juk jïlullaykitapis ni llanqi watullaykitapis mana apanäpä. Tsaynöpami qamqa parlaykankinatsu ‘Abramtaqa noqami rïcuyätsishqä’ nir. 24 Sirvimaqnï runakuna mikuyanqallanna katsun. Aywashimaq Aner, Escol y Mamre itsanqa derëchun kaqkunata apakuyätsun”.