Abramwan Lot rakikäyanqan
13
Warminta pushakurkur y llapan imaykankunatapis apakurkur Egiptupita Abram kutikurmi Neguevman charqan. Paywanmi sobrinun Lotpis aywarqan. 2 Abramqa pasaypa imaykayuq runami karqan. Tsaymi qorinpis qellayninpis uywankunapis atska karqan. 3 Neguevpita aywakurmi patsakur patsakur Bet-elman Abram charqan. Nirkurnami kutikurqan ñöpata tanqan kaqman. Tsayqa karqan Bet-elpita Haiman aywaqchömi. 4 Tsaychömi altarta unay pirqanqan kaqcho Tayta Diosta mañakur adorarqan.5 Lotpis tiyun Abramnömi imaykayuq karqan. Paypapis atskami karqan üshankuna, cabrankuna, wäkankuna y toldunkunapis. 6 Tsaytsika uywankuna kaptinmi juk patsallacho ishkankuna täyänanpä ayparqannatsu. 7 Tsaymi Abrampa uywa mitsiqninkunawan Lotpa uywa mitsiqninkuna qewa janan pelyayaq. Tsay witsan tsaycho taykäyarqanrämi cananeo runakuna y ferezeo runakuna.
8 Uywa mitsiqninkuna tsaynö pelyayaptinmi sobrinun Lotta Abram nirqan: “Tsay castalla kaykarqa ama chikinakushuntsu ni mitsikuqnintsikkunapis rimanakuyätsuntsu. 9 Rikanqaykinöpis kay parti jatunmi. Maynincho täkunaykipäpis akrakuy. Janapa aywaptikiqa urapami aywashä. Urapa aywaptikiqa janapami aywashä”.
10 Tsaynö niptinmi Lotqa Jordán mayu ñöpan pampakunata entërupa rikachakurqan Zoar markaläpa. Tsay pampakunacho qewapis y yakupis atska kaptinmi Edén huertanörä† y Egiptunörä karqan. Tsaynö karqan Sodoma y Gomorra markakunata Tayta Dios manarä ushakätsiptinmi. 11 Tsaymi Lotqa mas alli kaptin akrakurqan Jordán mayu ñöpan pampakunata. Tsaynöpami Abrampita rakikar aywakurqan rupay yarqamunanläman. 12 Abrammi itsanqa patsan Canaánllacho quëdakurqan. Lotnami Jordán mayu aywaq pampakunacho kaykaq markakunaman aywar Sodoma marka cercancho tarqan. 13 Sodomachöqa Tayta Diosta mana cäsukuq jutsasapa runakunallami täyarqan.
14 Lot aywaskiptinnami Abramta Tayta Dios nirqan: “Kay taykanqaykipita norti kaqläpa, sur kaqläpa, rupay yarqamunan kaqläpa y rupay jeqanan kaqläpa rikachakuy. 15 Tsay rikanqayki partitaqa llapantami rikatsishayki. Imayyaqpis tsayqa kanqa qampä y qampita aywaraqkunapämi.† 16 Qampita aywaraqkunatami atskaman mirayänanpä alli rikashä. Tsaymi paykunaqa aqushanö yupaytapis mana atipaypä kayanqa. 17 Aywar entërupa rikapakamuy. Llapan rikanqayki kaqtaqa qamtami entregashayki”.
18 Tayta Dios tsaynö niptinmi llapan imaykantapis apakurkur Hebrón marka cercanman Abram aywakurqan. Tsaychömi atska encina jachakuna karqan. Tsay jachakunaqa Mamre runapami karqan. Tsaycho taykarnami altarta Abram pirqarqan Tayta Diosta adorar mañakunanpä.