Abramta Tayta Dios awninqan
12
Juk junaqmi Abramta Tayta Dios nirqan: “Markaykita y castaykikunata kachaykur rikatsinäpä kaq partiman aywakuy.†2 “Qampita aywaraqkunatami alli rikashä atskaman mirar jatun nación kayänanpä.
Bendisaptïmi pïmaypis respitayäshunki.
Qam kaynikipami wakin runakunapis bendicionta chaskiyanqa.
3 Bendisashuqnikikunatami bendisashä.
Maldicionashuqnikikunatami maldicionashä.
Qam raykuqmi kay patsacho llapan casta runakunapis bendicionnïta chaskiyanqa”.†
4 Tayta Dios tsaynö niptinmi sobrinun Lotwan Abram aywakurqan. Haránpita yarqunqan witsan Abram kaykarqan qanchis chunka pitsqa (75) watayuqnami. 5 Canaánman aywakurmi warmin Saraita, sobrinun Lotta y Haráncho tarinqan llapan sirviqninkunata pusharqan. Tsaynöllami uywankunata qatikurkur y llapan imaykankunatapis apakurkur aywakurqan.
Canaánman chaykurnami 6 Siquem marka cercanyaq aywar Moripa sagrädu encina jachan ñöpancho Abram tarqan. Tsay partichöqa cananeo runakunami atskaq täyarqan. 7 Tsaycho taykaptinmi Tayta Dios yuripaskir Abramta nirqan: “Qampita aywaraqkunatami kay llapan jallqakunata y raqrakunata rikatsishä”.†
Tsaycho yuripanqanpitami altarta Abram pirqarqan Tayta Diosta mañakur adorananpä.
8 Nirkurnami rupay yarqamunanlä Bet-el tsimpan jallqakunaman aywakurqan. Tsaychömi toldunta shäriskatsir tarqan. Tsaychöpis juk altarta pirqarkurmi Tayta Diosta mañakur adorarqan. Rupay jeqananlächömi Bet-el marka karqan. Hai markanami kaykarqan rupay yarqamunanlächo. 9 Tsaypitapis cercaman cercaman aywarmi Neguev kinrayyaq charqan.
Egiptucho Abram tanqan
10 Tanqan kaqcho pasaypa muchuy kaptinmi Egipto nacionman Abram aywakurqan tsaychöna tänanpä. 11 Egiptuman yaykuykarnami warmin Saraita nirqan: “Qamqa kuyayllapä shumaq warmimi kanki. 12 Egipto runakunaqa warmï kanqaykita mayaskir wanuskatsimarmi apakuyäshunki. 13 Mana wanutsiyämänanpä paykunata ninki panï kanqaykita”.†
14 Egiptuman Abram chaykuptinmi tsaycho taq runakuna Saraita rikayarqan kuyayllapä kanqanta. 15 Egiptucho Faraónta mandashiqkunapis Sarai kuyayllapä kanqantami rikayarqan. Tsaynö kuyayllapä kanqanta willayaptinmi Faraónqa pushatsirqan palaciunman. 16 Saraita palaciunman apanqanpitami Abramta qararqan üshakunata, cabrakunata, wäkakunata, ashnukunata y camëllukunatapis. Tsaynöllami sirviqninkuna kayänanpä ollqutapis warmitapis qararqan.
17 Tsaynö kaptinpis Saraita apanqanpitami Faraónta llapan castankunatawan mantsaypä qeshyawan Tayta Dios castigarqan. 18 Tsaymi Abramta qayaykatsir Faraón nirqan: “¿Imanirtä kayta ruramashqanki? Sarai warmiki kaykaptin ¿imanirtä willamashqaykitsu? 19 ¿Imanirtä ‘panïmi’ nimarqayki? Tsaynö nimaptiki warmïpä apaykarnaqa punurpis punuykümanchi karqan. Kananqa warmikita pushakurkur kaypita aywakuy”.
20 Tsaynö nirmi Faraónqa yanapaqninkunata kacharqan Egiptupita Abramta qarquyänanpä. Tsaymi Egiptupita Abram aywakurqan warminta y imaykankunatapis apakurkur.