Babelcho törrita rurayanqan
11
Tsay witsanqa llapan runakuna juk idiömallatami parlayaq. 2 Rupay yarqamunan kaqpita aywakurmi Sinara ninqancho tariyarqan jatunkaray pampata. Tsaychömi paykunaqa llapan täyarqan.3 Tsaycho taykarmi willanakur niyarqan: “Atska ladrillukunata ruraskir jornucho kuwashun”.
Tsaymi willanakuyanqannölla ladrillukunata rurayarqan rumipa trokin tsaywan pirqayänanpä. Tsay ladrillukunatami breawan pirqayarqan. 4 Tsaypita yapay willanakurmi niyarqan: “Tsay ladrillukunawan jatun markata rurashun. Tsaynölla ciëluman chaqpä törrita shäritsishun. Tsaynöpami pïmaypis respitamäshun. Tsaymi mashtakashqa kanantsikpa trokinqa llapantsikpis kayllachöna täshun”.
5 Tsaymi ciëlupita Tayta Dios urämurqan markata y törrita runakuna shäriykätsiyanqanta rikananpä. 6 Tsayta rikaykurmi Tayta Dios yarpachakur nirqan: “Paykunaqa tsay idiömallata parlarmi shumaq willanakur tsaynö ruraykäyan. Tsay markata y törrita shäritsiyta ushaskirqa mastami imatapis rurayanqa. 7 Tsaynö kaykaptinqa paykunaman aywar pantatsishun tsay idiömallata manana parlayänanpä. Tsaynöpami juk idiöma juk idiömatana parlar manana tantiyanakuyanqanatsu imata parlaykäyanqantapis”.
8 Tsaynö nirmi Tayta Dios llapan runakunata entëru patsaman mashtakätsirqan. Tsaynöpami shäriykätsiyanqan markata ushayarqannatsu. 9 Tsay markachömi Tayta Dios pïmay runakunata pantakätsir idiömanta jukman jukman tikratsirqan. Tsaynö pantakätsinqanpitami tsay markapa jutin karqan Babel.b Mana tantiyanakurnami runakunaqa maytsaypapis mashtakar aywakuyarqan.
Sempa tsurinkunapita aywaraqkuna
10 Kaychömi qellqaraykan Sempa tsurinkunapita y paykunapita aywaraqkunapäpis.
Diluviu kanqanpita ishkay watatami Sempa tsurin Arfaxad yurirqan. Tsay witsan Sem kaykarqan juk pachak (100) watayuqmi. 11 Tsurin Arfaxad yurinqanpita Sem kawarqan pitsqa pachak (500) watarämi. Sempa tsurinkuna warmipis ollqupis kayarqanrämi.
12 Arfaxad kimsa chunka pitsqa (35) watayuq kaykaptinmi tsurin Sala yurirqan. 13 Tsurin Sala yurinqanpita Arfaxad kawarqan chusku pachak kimsa (403) wata masrämi. Arfaxadpa tsurinkuna warmipis ollqupis kayarqanrämi.
14 Sala kimsa chunka (30) watayuq kaykaptinmi tsurin Heber yurirqan. 15 Tsurin Heber yurinqanpita Sala kawarqan chusku pachak kimsa (403) wata masrämi. Salapa tsurinkuna warmipis ollqupis kayarqanrämi.
16 Heber kimsa chunka chusku (34) watayuq kaykaptinmi tsurin Peleg yurirqan. 17 Tsurin Peleg yurinqanpita Heber kawarqan chusku pachak kimsa chunka (430) wata masrämi. Heberpa tsurinkuna warmipis ollqupis kayarqanrämi.
18 Peleg kimsa chunka (30) watayuq kaykaptinmi tsurin Reu yurirqan. 19 Tsurin Reu yurinqanpita Peleg kawarqan ishkay pachak isqun (209) wata masrämi. Pelegpa tsurinkuna warmipis ollqupis kayarqanrämi.
20 Reu kimsa chunka ishkay (32) watayuq kaykaptinmi tsurin Serug yurirqan. 21 Tsurin Serug yurinqanpita Reu kawarqan ishkay pachak qanchis (207) wata masrämi. Reupa tsurinkuna warmipis ollqupis kayarqanrämi.
22 Serug kimsa chunka (30) watayuq kaykaptinmi tsurin Nacor yurirqan. 23 Tsurin Nacor yurinqanpita Serug kawarqan ishkay pachak (200) wata masrämi. Serugpa tsurinkuna warmipis ollqupis kayarqanrämi.
24 Nacor ishkay chunka isqun (29) watayuq kaykaptinmi tsurin Taréc yurirqan. 25 Tsurin Taré yurinqanpita Nacor kawarqan juk pachak chunka isqun (119) wata masrämi. Nacorpa tsurinkuna warmipis ollqupis kayarqanrämi.
26 Taré qanchis chunka (70) watayuq kaykaptin kimsarämi tsurinkuna karqan. Paykunapa jutinmi karqan Abram, Nacor y Harán.
Tarépita aywaraqkuna
27 Kaychömi qellqaraykan Tarépa tsurinkunapä y paykunapita aywaraqkunapäpis.
Tarépa tsurinkunami kayarqan Abram, Nacor y Harán. Haránpa tsurinnami karqan Lot. 28 Ur markancho taykäyaptillanrämi taytanpitapis mas ñöpata Haránqa wanurqan. Tsay markachöqa caldeo runakunami täyarqan.
29 Abrampa warminmi karqan Sarai. Nacorpa warminnami karqan Haránpa tsurin Milca. Milcapa ñañanmi karqan Isca. 30 Saraiqa qolluqmi karqan.
31 Ur markacho taykanqanpitami Canaánchöna tänanpä Taré aywakurqan. Ur markaqa caldeo runakuna täyanqan markami karqan. Canaánman aywakurmi pusharqan tsurin Abramta, willkan Lotta y llumtsuynin Saraitapis. Aywaykäyanqancho Harán markaman chaykurmi tsayllachöna täyarqan. 32 Harán markacho taykarmi Taré wanurqan ishkay pachak pitsqa (205) watayuq kaykar.