Noépa tsurinkunami kayarqan Sem, Cam y Jafet. Diluviupitarämi paykunapa tsurinkuna yuriyarqan.

2 Jafetpa tsurinkunami kayarqan Gomer, Magog, Madai, Javán, Tubal, Mesec y Tiras.

3 Gomerpa tsurinkunami kayarqan Askenaz, Rifat y Togarma.

4 Javánpa tsurinkunami kayarqan Elisa, Tarsis, Quitim y Dodanim. 5 Lamar kuchunpa aywarmi tsay runakuna nacionkuna kayänanpä atskaman mirayarqan. Cada nacionninchömi kikinkunapa idiömankunata parlayaq.

6 Campa tsurinkunami kayarqan Cus, Mizraim, Fut y Canaán.

7 Cuspa tsurinkunami kayarqan Seba, Havila, Sabta, Raama y Sabteca. Raamapa tsurinkunami kayarqan Seba y Dedán.

8 Nimrodpis Cuspa tsurinmi karqan. Paymi kay patsacho mas puntata runakunata munaynincho tsarararqan. 9 Nimrodqa Tayta Dios yanapaptinmi jirka uywakunata tsariyta yacharqan. Tsaymi pipis jirka uywakunata alli tsariq kaptin niyaq: “Nimrodnömi jirka uywakunata tsariyta yachan”.

10 Nimrod mandanqan jatun markakunami kayarqan Babilonia, Erec, Acad y Calne. Tsay markakunami Sinarcho kayarqan. 11 Tsaypita Asur partiman aywarmi shäritsirqan Nínive, Rehobot y Cala markakunata. 12 Tsaynöllami shäritsirqan Resén jatun markata. Tsay markaqa karqan Nínivipita Calaman päsaq nänichömi.

13 Mizraimpita aywaraqkunami kaykäyan ludeo runakuna, anameo runakuna, lehabita runakuna, naftuhita runakuna, 14 patruseo runakuna, casluhíta runakuna y caftorita runakunapis. Caftorita runakunapitami filisteo runakuna mirayarqan.

15 Canaánpa mayor tsurinmi karqan Sidón. Paypa qepanmanmi karqan Het. 16 Canaánpita aywaraqkunami kaykäyan jebuseo runakuna, amorreo runakuna, gergeseo runakuna, 17 heveo runakuna, araceo runakuna, sineo runakuna, 18 arvadeo runakuna, zemareo runakuna y hamateo runakunapis. Tsay llapan runakunaqa cananeo runakunami kayarqan. Paykunami atskaman mirarnin maytsayman mashtakäyarqan. 19 Tsaymi cananeo runakunapa lindërunkuna karqan Sidón markapita Gaza cercancho kaq Gerar markayaq. Tsaynöllami lindërun päsarqan Sodoma, Gomorra, Adma y Zeboim markakunapa hasta Lasayaq.

20 Paykunami kayarqan Campa tsurinkunapita aywaraqkuna. Tsay runakunami nacionkuna kayänanpä atskaman mirayarqan. Cada nacionkunachömi kikinkunapa idiömankunata parlayaq.

21 Jafetpa mayor wawqin Sempapis tsurinkuna kayarqanmi. Semqa Heberpa y Heberpita aywaraqkunapa unay castanmi karqan. 22 Sempa tsurinkunami kayarqan Elam, Asur, Arfaxad, Lud y Aram.

23 Arampa tsurinkunami kayarqan Uz, Hul, Geter y Mas.

24 Arfaxadpa tsurinmi karqan Sala. Salapa tsurinmi karqan Heber. 25 Heberpa tsurinkuna ishkaymi kayarqan. Mayor tsurinpa jutinmi karqan Peleg.^a Tsaynö jutin karqan pay kawanqan witsan runakuna chikinakur wakpa kaypa aywakuyanqanpitami. Qepa kaq tsurinpa jutinmi karqan Joctán.

26 Joctánpa tsurinkunami kayarqan Almodad, Selef, Hazar-mavet, Jera, 27 Adoram, Uzal, Dicla, 28 Obal, Abimael, Seba, 29 Ofir, Havila y Jobab. Paykunami kayarqan Joctánpa tsurinkuna. 30 Paykunami täyarqan Mesapita Sefaryaq. Sefarqa rupay yarqamunan kaqlä jallqakuna kanqanchömi kaykan.

31 Paykunami kayarqan Sempa tsurinkunapita aywaraqkuna. Tsay runakunami nacionkuna kayänanpä atskaman mirayarqan. Cada nacionninchömi kikinkunapa idiömankunata parlayaq.

32 Tsaynömi karqan Noépa tsurinpita aywaraqkuna. Diluviupitarämi paykuna maytsaypapis aywarnin nacionninkunata rurayarqan.