Noéta Tayta Dios awninqan
9
Nirkurnami Noéta y tsurinkunata bendisar Tayta Dios nirqan: “Mirayay kay patsaman juntayanqaykiyaq.† 2 Llapan casta uywakuna, pajaqkuna, qarachaypa, lätaypa puriqkuna y lamarcho kawaqkunapis mantsayäshunkimi. Tsay uywakunaqa llapanmi qamkunapa munaynikicho kanqa. 3 Llapan casta uywakuna, mikuykuna y verdürakunapis mikuyänaykipämi kaykan. 4 Itsanqa ama mikuyankitsu yawaryuq aytsata. Yawarninchömi kawaynin kaykan.†5 “Runa mayinta wanutsiq kaqqa wanutsishqami kanqa. Tsaynöllami runata wanutsiq kaq uywapis wanutsishqa kanqa. 6 Kikï niraqtami runata kamashqä.† Tsaymi pipis runa mayinta wanutsiptinqa kikintapis tsaynölla wanutsiyanqa.†
7 “Qamkunapis atskaman mirayay. Tsaynölla qampita aywaraqkunapis kay patsaman juntayanqanyaq mirayätsun”.
8 Nirkurnami Noéta y tsurinkunata Tayta Dios nirqan: 9 “Diluviuwan yapay mana ushakätsinäpämi qamkunawan y qamkunapita aywaraqkunawan pactuta ruraykä. 10 Tsaynöllami pactüta ruraykä arcapita yarquq llapan casta pajaqkunawan, wätana kaq y mana wätana kaq uywakunawan y maytsaycho uywakunawanpis. 11 Kay pactuta cumplirmi diluviuwan imaypis ushakätsishänatsu kay patsata, runakunata ni uywakunatapis. Kanan kanqan diluviunöqa imaypis manami kanqatsu.
12 “Llapan casta uywakunawan y llapan runakunawan pactuta ruranqäta imaypis yarpänäpämi 13 pukutaycho tseqyawta rikakätsimushä. Tsay tseqyawmi imaypis señal kanqa kay patsawan pactuta ruranqäta yarpänäpä. 14 Tsaymi patsa jananpa pukutay shamuptin tseqyawta rikakätsimushä. 15 Tsay tseqyaw yuriptinmi yarpäshä qamkunawan y kay patsacho kaq llapan casta uywakunawan pactuta ruranqäta. Mananami kay patsata yakuwan imaypis ushakätsishänatsu. 16 Pukutaycho tseqyaw rikakämuptinmi yarpäshä llapan runakunawan y uywakunawanpis pactuta ruranqäta. Tsay pactutaqa imaypis cumplishämi. 17 Tsaymi tseqyawta señalpä churashqä qamkunawan y uywakunawan pactuta ruranqäta yarpänäpä”.
Tsaynömi Noéwan Tayta Dios parlarqan.
Tsurinkuna imanö kayänanpä kanqanta Noé ninqan
18 Noépa tsurinkunami kayarqan Sem, Cam y Jafet. Tsay kimsan tsurinkunawanmi arcapita Noé yarqayämurqan. Cam karqan Canaánpa taytanmi. 19 Noépa kimsan tsurinkunapitami kay patsacho llapan runakuna mirayashqa.
20 Noéqa alli chakrata kichaskirmi üvata plantarqan. 21 Üva poquskiptinnami vïnuta upurkur macharqan. Machaskirnami qallapächulla toldun rurincho jitaraykarqan. 22 Taytan qallapächulla jitaraykaqta rikaykurmi Canaánpa taytan Cam ishkay kaq wawqinkunata willaq aywarqan. 23 Tsaymi Semwan Jafet jinan höra cäpata aqshukurkur taytan kaqman qepallapa yaykur tsapaykuyarqan. Tsaynö tsapayarqan taytan qallapächulla kaykaqta mana rikayänanpämi.
24 Kachakashqana rikchaskamurmi Noé musyarqan qepa kaq tsurin wawqinkunata willanqanta. 25 Tsaymi nirqan:
“¡Canaán maldicionashqa katsun!
¡Payqa wawqinkunapa sirviqnillanmi kanqa!”
26 Nirkurnami yapay nirqan:
“Semtaqa Tayta Dios llapanchöpis yanapaykullätsun.
Tsaynölla Sempita aywaraqkunapa sirviqninkuna kayätsun Canaánpita aywaraqkuna.
27 Jafetta Tayta Dios yanapaykullätsun atskaman mirananpä.
Sempita aywaraqkunawanpis juntu täyätsun.
Tsaynölla Jafetpita aywaraqkunapa sirviqnin kayätsun Canaánpita aywaraqkuna”.