Diluviu yaku tsakinqan
8
Tayta Diosqa manami qonqarqantsu Noéta y arcacho kaykaq uywakunatapis. Tsaymi yaku wallkänanpä wayratsimurqan. Tsay wayrawanmi yaku wallkayar qallaykurqan. 2 Tsaymi patsa rurincho kaq lamarpita yaku pashtamuqpis päraskirqan. Tsaynöllami ciëlupita yaku yarqamunanpä kicharaykaq punkupis wichqakaskirqan.3 Nirkurmi yaku wallkayar qallaykurqan. Juk pachak pitsqa chunka (150) junaqchörämi 4 Ararat jirkacho arca takyarqan. Tsayqa karqan qanchis kaq killa chunka qanchis junaqmi. 5 Tsaypita yaku warayllanta warayllanta wallkayaptinmi chunka killa qallaykunan junaq jirka puntakuna rikakarqan.
6 Tsaypita chusku chunka (40) junaqtami Noé kicharqan arcapa ventänanta. 7 Nirkurnami juk cuervutaa kacharqan yaku tsakinqanta o mana tsakinqantapis rikapakamunanpä. Tsaynö kaptinpis tsay cuervuqa manami kutirqantsu, sinöqa yaku jananpa wakpa kaypa pajarmi purirqan yaku tsakinqanyaq.
8 Nirkurnami kacharqan juk palumata patsa tsakinqanta o mana tsakinqanta musyamunanpä. 9 Patsa janancho yaku juntallarä kaptinmi maychöpis ratananpä mana kaptin palumaqa arcaman kutirqan. Tsaymi Noéqa makinta makyarqan paluma ratananpä. Rataykuptinnami arcaman yaykatsirqan.
10 Tsaypita qanchis junaqtanami palumata yapay Noé kacharqan. 11 Patsa tsakanaykaptinnami paluma kutirqan olïvu rapran amushqa. Tsaynöpami Noé musyarqan yaku tsakiykanqantana. 12 Kutinqanpita qanchis junaqtami yapay palumata kacharqan. Tsay palumaqa manami kutirqannatsu.
13 Soqta pachak juk (601) watayuq Noé kaykaptinmi yaku tsakirqan. Tsayqa karqan mushuq wata qallaykunan junaqmi. Tsay junaqmi arca qataraykanqanta kicharkur Noé rikarqan patsa tsakishqana kaykaqta. 14 Ishkay kaq killacho ishkay chunka qanchis (27) junaq kaykaptinmi patsa tsakishqana karqan. 15 Tsaymi Noéta Tayta Dios nirqan: 16 “Kananqa warmikiwan, tsurikikunawan y llumtsuynikikunawan arcapita yarquyayna. 17 Tsaynölla llapan casta uywakunata qarquyna wätana kaqkunata, mana wätana kaqkunata, lätaypa puriqkunata y llapan casta pajaqkunatapis maytsaypa aywar entëru patsacho mirayänanpä”.
18 Tsaynö niptinmi Noé yarqurqan warminwan, tsurinkunawan y llumtsuyninkunawan. 19 Tsaynöllami yarquyarqan wätana kaq y mana wätana kaq uywakuna, lätaypa puriqkuna y llapan casta pajaqkunapis. 20 Noé yarquskirnami juk altarta pirqarqan tsaycho Tayta Diosta adorananpä. Nirkurnami cada casta püru kaq uywakunapita y pajaqkunapita pishtarkur altarcho sacrificiuta rupatsirqan.†
21 Tsay rupatsinqanpa mushkuyninmi Tayta Diospa shonqunpänö karqan. Tsaymi nirqan: “Runakunaqa wamra kayanqanpita patsami shonqun munanqannö jutsata rurallar kawayan. Tsaynö kawayaptinpis kay patsata yapayqa manami maldicionashänatsu. Kanan ushakätsinqänöqa kay patsacho kawaqkunata manami ushakätsishänatsu.
22 “Kay patsa manarä ushakanqanyaqqa runakuna murukuyanqami y cosechayanqami.
Tsaynöllami kanqa achaypis, alaypis, usyapis, tamyapis, junaqpis y paqaspis”.