Diluviu kanqan
7
Nirkurnami Noéta Tayta Dios nirqan: “Llapan runakunapita qamllami noqa munanqänö kawaykanki. Tsaynö kawanqaykipitami qam, warmiki y tsurikikuna warmintin arcaman yaykuyanki. 2 Püru kaq uywakunataqaa qanchis chinata qanchis orquta arcaman yaykatsinki. Impüru kaqtaqa chinan orqullata yaykatsinki. 3 Tsaynölla yaykatsinki qanchis chinan orqu llapan casta pajaqkunata kay patsacho mana ushakäyänanpä. 4 Kananpita qanchis junaqtami mana päraypa tamyatsimushä chusku chunka (40) junaq y chusku chunka paqas. Tsay tamyawanmi kay patsacho llapan kawaq kaqkunata chipyaq ushakätsishä”.5 Tsaymi Noéqa Tayta Dios ninqannölla llapanta rurarqan.
6 Diluviu kanqan witsan Noéqa kaykarqan soqta pachak (600) watayuqmi. 7 Diluviupita salvakuyänanpämi arcaman Noé yaykurqan warminwan, tsurinkunawan y llumtsuyninkunawanpis.† 8 Tsaynöllami arcaman yaykuyarqan püru kaq y impüru kaq llapan casta uywakuna, pajaqkuna y lätaypa puriqkunapis. 9 Tayta Dios ninqannöllami tsay uywakunata chinan orquta Noé yaykatsirqan.
10 Tayta Dios ninqannöllami qanchis junaqta diluviu qallaykurqan. 11 Tsayqa karqan wata qallaykunqanpita juk killata ushaskir chunka qanchis junaqmi. Tsay witsan Noéqa kaykarqan soqta pachak (600) watayuqmi. Patsa rurinpitami atska yaku pashtamurqan. Tsaynöllami ciëlucho yakuta tsaparaykaq punkupis kichakaskirqan.† 12 Tsaymi chusku chunka (40) paqas y chusku chunka junaq mana päraypa tamyamurqan.
13 Tamya qallaykunqan junaqmi Noéqa kimsan tsurinkunawan arcaman yaykuyarqan. Tsurinkunapa jutinkunami karqan Sem, Cam y Jafet. Tsaynöllami kimsan llumtsuyninkunawan Noépa warminpis yaykuyarqan. 14 Paykunawanmi yaykuyarqan llapan casta wätana kaq y mana wätana kaq uywakuna, lätaypa puriqkuna y llapan casta pajaqkunapis. 15 Llapan casta uywakunatami ishkay ishkay arcaman Noé yaykatsirqan. 16 Tayta Dios ninqannöllami cada casta uywakunata chinan orquta yaykatsirqan. Yaykuyta ushaskiyaptinnami arca punkuta Tayta Dios wichqaskirqan.
17 Nirkurnami chusku chunka (40) junaq y chusku chunka (40) paqas mana päraypa tamyarqan. Tsaynö tamyarmi patsaman yaku juntarnin arcata aynatsir qallaykurqan. 18 Tsaynö tamyaptin warayllanta warayllanta yaku pasaypa juntaptinmi arcaqa aynar qallaskirqan. 19 Altunnin jirkakunatapis tsapanqanyaqmi yaku juntarqan. 20 Tsay jirkakunata tsapaskirpis qanchis metru mastarämi päsarqan.
21 Tsaychömi llapan runakunapis, pajaqkunapis, wätana kaq y mana wätana kaq uywakunapis y lätaypa puriqkunapis shenqaypa wanuyarqan. 22 Kay patsacho kawaqkunaqa llapanpis shenqaypa wanurmi ushakäyarqan. 23 Arcaman Noéwan yaykuqkunallami kawaykar quëdayarqan. Mana yaykuq kaqmi itsanqa runakunapis, uywakunapis, pajaqkunapis y lätaypa puriqkunapis chipyaq wanur ushakäyarqan. 24 Tsay yakumi juk pachak pitsqa chunka (150) junaq kay patsata tsapararqan.