Runakuna jutsata rurayanqan
6
Kay patsacho runakuna atskaman mirayaptinmi warmi tsurinkunapis atska kayarqan. 2 Tsaymi Tayta Diospa tsurinkuna rikayarqan runakunapa warmi tsurinkuna kuyayllapä kayanqanta. Tsay jipashkunapitami munayanqanta akrayarqan warmin kananpä.a 3 Tsaymi Tayta Dios nirqan: “Manami runakuna imayyaqpis kawayanmantsu. Paykunaqa kay patsacho ushakaqllami kaykäyan. Tsaymi imayyaqpis kawayänanpa trokinqa juk pachak ishkay chunka (120) watallana kawayanqa”.4 Diospa tsurinkunawan runakunapa warmi tsurinkuna täyanqan witsanmi jatusaq runakuna kay patsacho kawayarqan. Tsay unay runakunami alläpa reqishqa y kallpasapa kayarqan.†
5 Tayta Diosmi rikarqan runakuna pasaypa jutsata rurallar kawayanqanta. Paykunaqa shonqun munanqannö jutsata ruranallanpämi yarpäyaq.† 6 Tsaymi runata kamanqanpita Tayta Dios pasaypa pësakur nirqan: 7 “¿Imapärä kay patsacho runata kamarqäpis? Kananqa llapan runakunatami ushakätsishä. Tsaynöllami llapan uywakunata, pachallanpa, lätaypa puriqkunata y pajaqkunatapis ushakätsishä”.
8 Noétami itsanqa Tayta Dios kuyaparqan.
Arcata Noé ruranqan
9 Kaychömi qellqaraykan Noé imanö kawanqanpis.
Runakuna jutsata rurar kawayaptinpis Noéqa Tayta Diosman yärakurmi pay munanqannö kawarqan.† 10 Noépa tsurinkunami kayarqan Sem, Cam y Jafet.
11 Tayta Diosmi rikarqan kay patsacho runakuna pasaypa jutsata rurar y wanutsinakullar kawayanqanta. 12 Maytsaychöpis jutsata rurallar runakuna kaykaqta rikarmi Noéta Tayta Dios nirqan: 13 “Kay patsacho llapan runakunatami ushakätsishä. Paykunami jutsayuq kaykäyan kay patsacho wanutsinakuy kananpä. Tsaynö kayanqanpitami kay patsacho kaqkunata chipyaq ushakätsishä.
14 “Tsaynö kananpä kaykaptinqa atska cuartuyuq jatunkaray arcata weqiyuq qerupita ruray. Yaku mana yaykunanpä uchkunkuna jananpa y rurinpa breawan llushtanki. 15 Tsay arcata ruranki juk pachak kimsa chunka pitsqa (135) metru larguta. Anchuntana ruranki ishkay chunka ishkay metru pullanta (22.5). Altuntana ruranki chunka kimsa metru pullanta (13.5). 16 Tsaynölla ruranki kimsa altusyuqta. Qataranqanpita uraman pullan metrucho ventänata ruranki. Tsaynölla jukaq ñöpanpa punkuyuqta ruranki.
17 “Mantsaypä diluviu tamyatami tamyatsimushä maytsaytapis yaku tsapanqanyaq. Tsay yakuwanmi maytsaychöpis llapan wanuyanqa. 18 Qamwanmi itsanqa pactuta rurashä. Tsaymi arcaman yaykuyanki qam, warmiki y tsurikikuna warmintin. 19 Tsaynölla arcaman yaykatsinki kay patsacho kaq tukuy casta uywakunata chinan orquta, qamkuna salvakuyanqaykinö uywakunapis salvakuyänanpä. 20 Qamkunawanmi arcaman yaykuyanqa tukuy casta pajaqkuna, wätana kaq y mana wätana kaq uywakuna y lätaypa puriqkunapis. Cada ünü chinan orqu yaykuyätsun. Tsaynöpami tsay uywakunapis ushakäyanqatsu. 21 Arca rurinman tukuyläya mikuykunata churanki. Tsay mikuytami mikuyanki qamkunapis y uywakunapis”.
22 Tayta Dios ninqannöllami llapantapis Noé rurarqan.†