Runata kamar kikin niraqtami Tayta Dios kamarqan.^† 2 Ollqutapis warmitapis paymi kamarqan. Kamanqan junaqmi Tayta Dios nirqan paykuna runa kanqanta. Nirkurmi kay patsacho alli kawayänanpä bendisarqan.^†

3 Juk pachak kimsa chunka (130) watayuq Adán kaykaptinmi tsurin Set yurirqan. Tsay tsurinqa taytan rikuqllami karqan. 4 Tsurin Set yurinqanpita puwaq pachak (800) wata masrämi Adán kawarqan. Paypaqa tsurinkuna ollqupis y warmipis kayarqanrämi. 5 Isqun pachak kimsa chunka (930) watayuq kaykarmi Adán wanurqan.

6 Juk pachak pitsqa (105) watayuq Set kaykaptinmi tsurin Enós yurirqan. 7 Tsaypitaqa Set kawarqan puwaq pachak qanchis (807) wata masrämi. Setpa tsurinkuna ollqupis y warmipis kayarqanrämi. 8 Setqa isqun pachak chunka ishkay (912) watayuq kaykarmi wanurqan.

9 Enós isqun chunka (90) watayuq kaykaptinmi tsurin Cainán yurirqan. 10 Tsurin Cainán yurinqanpita Enós kawarqan puwaq pachak chunka pitsqa (815) wata masrämi. Enóspa tsurinkuna ollqupis y warmipis kayarqanrämi. 11 Enósqa isqun pachak pitsqa (905) watayuq kaykarmi wanurqan.

12 Cainán qanchis chunka watayuq (70) kaykaptinmi tsurin Mahalaleel yurirqan. 13 Tsurin Mahalaleel yurinqanpita Cainán kawarqan puwaq pachak chusku chunka (840) wata masrämi. Cainánpa tsurinkuna ollqupis y warmipis kayarqanrämi. 14 Cainán isqun pachak chunka (910) watayuq kaykarmi wanurqan.

15 Mahalaleel soqta chunka pitsqa (65) watayuq kaykaptinmi tsurin Jared yurirqan. 16 Tsurin Jared yurinqanpita Mahalaleel kawarqan puwaq pachak kimsa chunka (830) wata masrämi. Mahalaleelpa tsurinkuna ollqupis y warmipis kayarqanrämi. 17 Mahalaleel puwaq pachak isqun chunka pitsqa (895) watayuq kaykarmi wanurqan.

18 Jared juk pachak soqta chunka ishkay (162) watayuq kaykaptinmi tsurin Enoc yurirqan. 19 Tsurin Enoc yurinqanpita Jared puwaq pachak (800) wata masrämi kawarqan. Jaredpa tsurinkuna ollqupis y warmipis kayarqanrämi. 20 Jaredpis isqun pachak soqta chunka ishkay (962) watayuq kaykarmi wanurqan.

21 Enoc soqta chunka pitsqa (65) watayuq kaykaptinmi tsurin Matusalén yurirqan. 22 Enocqa Tayta Dios munanqannömi kawarqan. Tsurin Matusalén yurinqanpita kimsa pachak (300) wata masrämi kawarqan. Enocpa tsurinkuna ollqupis y warmipis kayarqanrämi. 23 Enoc kawarqan kimsa pachak soqta chunka pitsqa (365) watami. 24 Tayta Dios munanqannö kawanqanpitami Enocta Tayta Dios kawaykaqta pushakurqan.^†

25 Matusalén juk pachak puwaq chunka qanchis (187) watayuq kaykaptinmi tsurin Lamec yurirqan. 26 Lamec yurinqanpita Matusalén kawarqan qanchis pachak puwaq chunka ishkay (782) wata masrämi. Matusalénpa tsurinkuna ollqupis y warmipis kayarqanrämi. 27 Matusalénpis isqun pachak soqta chunka isqun (969) watayuq kaykarmi wanurqan.

28 Lamec juk pachak puwaq chunka ishkay (182) watayuq kaykaptinmi tsurin yurirqan. 29 Tsurin yuriykuptinmi Lamec nirqan: “Kay patsata Tayta Dios maldicionashqa kaptinpis kay tsurïmi alli yanapamäshun arurpis alläpa mana ñakanantsikpä”.

Tsaynö nirmi tsurinpa jutinta churarqan Noé jutin kananpä.^a 30 Noé yurinqanpita Lamec kawarqan pitsqa pachak isqun chunka pitsqa (595) wata masrämi. Lamecpa tsurinkuna ollqupis y warmipis kayarqanrämi. 31 Lamecqa qanchis pachak qanchis chunka qanchis (777) watayuq kaykarmi wanurqan.

32 Noé pitsqa pachak (500) watayuq kaykaptinmi tsurinkuna yuriyarqan. Tsay tsurinkunapa jutinkunami karqan Sem, Cam y Jafet.