Abelta Caín wanutsinqan
4
Nirkurnami Adánwan tarnin Eva qeshyaq rikakurqan. Wamran yuriptinmi nirqan: “Tayta Dios munaptinmi ollqu wawä yurishqa”.Tsaymi wamranpa jutinta churarqan Caína kananpä.
2 Nirkurnami yapay ollqu wamrata qeshyakur jutinta churarqan Abel jutin kananpä. Abelqa üshatawan cabratami wätarqan. Caínnami chakracho aruq karqan.
3 Tsaypita atska wata päsaskiptinnami Caínqa mikuyta cosechanqanpita Tayta Diospä ofrendata aparqan. 4 Tsaynöllami Abelpis Tayta Diospä aparqan üshankunapa y cabrankunapa punta yuriq wawankunata. Apanqanta pishtaskirmi wirankunata Diospä rupatsirqan. Tsaytami Tayta Dios kushishqa chaskirqan.† 5 Caín apanqan ofrendatami itsanqa chaskirqantsu. Tsaynö mana chaskiptinmi Caínqa pasaypa ajanar jukläyakurkurqan.
6 Tsaymi Caínta Tayta Dios nirqan: “¿Imanirtä ajanar qallayashqayki? 7 Allita rurarqa manami qallayashqa kankimantsu. Mana allita ruraptikimi jutsa ruray shuyaraykäshunki munaynincho katsishunaykipä. Tsaynö kaptinpis shumaq tantiyakurqa manami jutsa rurayman ishkinkitsu”.
8 Tsaypita juk junaqnami Caínqa wawqin Abelta nirqan: “Jirkapa aku rikachakuq”.
Jirkaman chaykurnami Abelta illaqpita wanuskatsirqan.†
9 Tsaymi Caínta Tayta Dios tapurqan: “¿Maytä wawqiki Abel?”
Tsaynö tapuptinmi nirqan: “Manami musyätsu. ¿Wawqï rikaqku kaykä imami?”
10 Tsaynö niptinnami Tayta Dios nirqan: “¿Imatatä rurashqayki? Wawqikipa yawarninta jichanqaykimi qayakaykäman.† 11 Tsaymi kay patsacho maldicionashqa kar qarqushqa kanki. Wawqikipa yawarninta jichanqaykipitami 12 murunqaykipis wayunqatsu. Tsaynöllami jamayta mana tarir maytsaypapis purinki”.
13 Tsaynö niptinnami Caín nirqan: “Taytay, kay castïgutaqa manami awantashätsu. 14 Kaypita qarqamarqa ñöpaykipita karumanmi qarqaykämanki. Tsaynö karqa maytsaypapis mana jamaypachi purishä. Tsaynö puriykaqtachi pipis wanutsimanqa”.
15 Tsaymi Tayta Dios nirqan: “Pipis wanutsishuqnikiqa qanchis kuti pasaypa castigashqami kanqa”.
Tsaynö nirmi señalta churaparqan Caínta pipis mana wanutsinanpä. 16 Nirkurnami Tayta Diospa ñöpanpita Nodb partiman Caín aywakurqan tsaycho tänanpä. Tsayqa karqan Edén huertaman rupay yarqamunan kaqlächömi.
Caínpita aywaraqkuna
17 Tsaypitanami Caínpa warmin qeshyaq rikakur ollqu wamrata qeshyakurqan. Tsay wamrapa jutintami churarqan Enoc jutin kananpä. Nirkurnami Caínqa juk markata sharkatsir markapa jutinta churarqan tsurinpa jutinta. 18 Enocmi karqan Iradpa taytan. Iradmi karqan Mehujaelpa taytan. Mehujaelmi karqan Metusaelpa taytan. Metusaelmi karqan Lamecpa taytan.
19 Lamecqa karqan ishkay warmiyuqmi. Jukaq warminpa jutinmi karqan Ada y jukaqpanami Zila. 20 Ada qeshyakurmi wamranpa jutinta churarqan Jabal jutin kananpä. Jabalmi wakin runakunapita mas puntata toldukunacho tar uywankunata wätarqan. 21 Jabalpa wawqinmi karqan Jubal. Jubalmi ñöpataqa arpata y kënata tukayta yachakurqan.
22 Zilanami qeshyakurqan Tubal-caínta. Tubal-caín herrëru karmi broncipita y fiërrupita imaykatapis ruraq. Paninpa jutinmi karqan Naama.
23 Juk kutichömi ishkan warminta Lamec nirqan: “¡Ada y Zila, ninqäta wiyayämay! Maqamaq runatami wanutsirqä. Juk chölutapis takamaptinmi wanutsirqä. 24 Caínta pipis wanutsir qanchis kuti castigashqa kananpä kaykaptinqa noqata yatamaq kaqqa qanchis chunka qanchis (77) kuti masmi castigashqa kanqa”.
Set yurinqan
25 Adánpa warmin yapay qeshyaq rikakurmi ollqu wamrata qeshyakurqan. Yuriskiptinmi nirqan: “Wamrä Abelta Caín wanutsishqa kaptinpis Tayta Diosmi munashqa Abelpa trokin juk wamrä kananta. Tsaymi paypa jutin kanqa Set”.c
26 Setmi tsurin yuriskiptin jutinta churarqan Enós kananpä. Enós kanqanpitarämi runakuna Tayta Diosta adorar qallaykuyarqan.