Adánwan Eva Tayta Diosta mana cäsukuyanqan
3
Tayta Dios llapan kamanqan uywakunapitapis culebraqa mas astütumi karqan.† Tsaymi warmi kaykanqan kaqman witiykur nirqan: “¿Rasunpaypaku Dios niyäshushqayki mayqan jachapa wayuynintapis mana mikuyänaykipä?”2 Tsaynö tapuptinmi warmi nirqan: “Llapan jachapa wayuyninta mikuyänäpämi niyämashqa. 3 Huerta chawpincho kaykaq jachapa wayuyninpämi itsanqa mana mikuyänäpä ni yatayllapis mana yatayänäpä niyämashqa. Tsay jachapa wayuyninta mikurqa wanuyäshäshi”.
4 Tsaynö niptinmi culebra nirqan: “Manami wanuyankitsu. 5 Tsay jachapa wayuyninta mikuyanqayki junaqqa Diosnömi musyayanki alli kanqanta mana alli kanqantapis. Tsaymi Diosqa munantsu mikuyänaykita”.
6 Tsaynö niptinmi warmiqa tsay jachapa wayuynin maypis mikukuypä kanqanta rikar pasaypa munaparqan. Tsaymi yachaq musyaq kayta munar jachapa wayuyninta pallaskir mikurqan. Nirkurnami runanta makyaptin paypis mikurqan. 7 Tsayta mikuskirnami jinan höra tantiyayarqan qallapächulla kaykäyanqanta. Tsaymi hïgus jachapa rapranta jirarkur penqayninkunata tsapakuyarqan.
8 Tsay tardi rupay jeqaykaptinnamia huertacho Tayta Dios puriykarqan. Tsaycho puriykanqanta wiyaskirmi ishkankuna pakakuyarqan jachakuna rurinman. 9 Tsaymi Tayta Dios qayar nirqan: “Adán, ¿maychötä kaykanki?”
10 Tsaynö qayaptinmi Adán nirqan: “Taytay, huertacho puriykanqaykita wiyaskirmi qallapächulla kar penqakurnin pakakushqä”.
11 Tsaynö niptinmi Tayta Dios tapurqan: “¿Pitä nishushqayki qallapächulla kaykanqaykita? Paqtä mikushqayki ‘ama mikunkitsu’ ninqä jachapa wayuyninta”.
12 Niptinnami Adán nirqan: “Taytay, majäpä kamanqayki warmi apapämaptinmi tsay jachapa wayuyninta mikushqä”.
13 Nirkurnami warmita Tayta Dios tapurqan: “¿Imatatä rurashqayki?”
Warminami nirqan: “Culebra llullapämaptinmi tsay jachapa wayuyninta mikushqä”.†
Jutsata rurayanqanpita Adánwan Eva ñakayänanpä ninqan
14 Tsaymi culebrata Tayta Dios nirqan:
“Tsaynö llullapanqaykipitami llapan uywakunapitapis maldicionashqa kanki.
Lätayllapanami purinki.
Allpata mikullarmi kawankipis.b
15 Kananpitaqa warmiwan pasaypami chikinakuyanki.
Tsaynöllami warmipita yuriqpis qampita aywaraqkunata rikaytapis munayäshunkitsu.†
Warmipita yuriqtami ankuncho kaninki.
Paymi itsanqa umaykita jarushunki”.
16 Evatanami Tayta Dios nirqan:
“Tsaynö ruranqaykipitami qeshyaq rikakur pasaypa ñakanki.
Pasaypa nanaywanrämi qeshyakunkipis.
Runaykitami munaynikicho katsiyta munanki.c
Tsaynö kaptinpis paypa munayninchömi imaypis kanki”.
17 Adántanami nirqan:
“Mana mikunaykipä nikaptïmi warmikita cäsur tsay jachapa wayuyninta mikushqayki.
Tsaynö mikunqaykipitami chakrakunapis maldicionashqa kanqa.
Tsaymi qoyay qoyay pasaypa ñakarrä mikunaykipä arunki.
18 Chakrachöpis tukuyläya kashakuna y cardonkunami wiñamunqa.†
Tsaynö kaptinpis jachakunapa wayuyninkunatami mikunki.
19 Kawanqaykiyaqqa mikunaykipä pasaypa jumpirrämi arunki.
Allpapitami kamashqa kanki.
Tsaymi wanurpis allpaman kutinki”.
20 Nirkurnami warminpa jutinta Adán churarqan Evad jutin kananpä. Tsay jutita churarqan payllapita llapan runakunapis mirayänanpä kaptinmi. 21 Adánwan Eva jatikuyänanpänami uywakunapa qaratsanpita latsapankunata Tayta Dios ruraparqan.
22 Nirkurnami Tayta Dios nirqan: “Kananqa noqantsiknö karnami alli kaqtapis mana alli kaqtapis runa musyan. Tsaynö kaykarqa imayyaqpis kawatsikuq jachapa wayuyninta ama mikutsuntsu. Tsayta mikurqa imayyaqpis kawanqami”.†
23 Tsaymi Edén huertapita Tayta Dios runata qarqurqan allpapita kamashqa kar chakracho arur kawananpä. 24 Runata tsaynö qarquskirmi rupay yarqamunan kaqläman querubinkunata† Tayta Dios churarqan nina rupaykaq espädawan huertata täpayänanpä. Tsaymi querubinkunaqa täpayarqan imayyaqpis kawatsikuq jachaman pipis mana yaykunanpä.