2
Tsaynömi Tayta Dios kamayta usharqan ciëluta y ciëlucho kaqkunata, kay patsata y kay patsacho kaqkunatapis. 2 Llapanta kamaskirnami qanchis kaq junaqcho Tayta Dios jamarqan.† 3 Tsaynö jamanqanpitami Tayta Dios tsay junaqta bendisarqan sagrädu junaq kananpä.†Edén huertacho Adánwan Eva täyanqan
4 Kaychömi qellqaraykan ciëlutawan kay patsata Tayta Dios kamanqan.
Ciëluta y kay patsata kamashqa karpis 5 Tayta Dios manarämi tamyatsimurqanrätsu. Tsaymi qewapis ni jachapis karqanrätsu. Tsaynöllami chakracho arunanpä runapis karqanrätsu. 6 Tsay witsan patsapita yaku pashtamurmia llapan patsata ushmarqan.
7 Tsaypitanami Tayta Dios allpapita runata kamaskir kawananpä senqanpa pükarqan. Tsaynöpami kawaq runa kananpä kamarqan. 8 Paytami Edéncho jatunkaray huertaman churarqan tsaycho tänanpä. Tsay huertataqa kikin Tayta Diosmi rupay yarqamunanlächo rurarqan. 9 Tsay huertachömi Tayta Dios wiñatsirqan tukuy niraq kuyayllapä jachakunata. Tsay jachakunapa wayuyninmi maypis mikukuy munay karqan. Huerta chawpinchömi juk jacha karqan wayuyninta mikur imayyaqpis runa kawananpä.† Tsaynöllami juk jacha karqan wayuyninta mikur alli kaqta y mana alli kaqtapis runa musyananpä.
10 Patsan Edén huertapitami juk mayu pashtamurqan tsay huertata ushmananpä. Huertapita yarqurmi tsay mayu chuskuman rakikarqan. 11 Punta kaq mayupa jutinmi karqan Pisón. Tsay mayumi päsan Havila partipa. Tsay partichömi atska qori kaykan. 12 Tsay qoriqa qori pürumi kaykan. Tsaychömi kaykan pasaypa mushkuq jachapa weqin y kuyayllapä ónice rumikunapis. 13 Jukaq mayupa jutinnami karqan Gihón. Tsay mayumi tumaykämun Cus partipa. 14 Jukaq mayupa jutinnami karqan Tigris. Tsay mayuqa Asiriapita rupay yarqamunan kaqläpami päsan. Jukaq mayupa jutinnami karqan Éufrates.
15 Kamanqan runatami Edén huertaman Tayta Dios churarqan tsaycho arur shumaq rikananpä. 16 Nirkurnami runata nirqan: “Kay huertacho jachakunapa wayuyninqa llapanpis mikunaykipämi. 17 Itsanqa ama mikunkitsu allita y mana allita musyatsikuq jachapa wayuyninta. Tsayta mikurqa wanunkimi”.†
18 Nirkurnami Tayta Dios nirqan: “Japallan kar runa llakipaypämi kaykan. Tsaymi yanapananpä majanta kamashä”.
19 Nirkurnami allpapita kamanqan tukuy niraq uywakunata y pajaqkunata Adánb kaqman Tayta Dios aparqan jutinkunata churananpä. Jutinta Adán churanqallanmi llapanpapis kaykan.
20 Tsaynöpami jutinkunata Adán churarqan wätana kaq mana wätana kaq uywakunapata y pajaqkunapatapis. Llapan casta uywakuna kaptinpis runapa majanpänöqa manami mayqanpis karqantsu. 21 Tsaymi Tayta Dios wanuypa Adánta punukaskatsir juk custillanta jipirqan. Jipiskirnami kanqantanölla alliyaskatsirqan. 22 Tsay jipinqan custillapita warmita kamaskirmi runa kaqman pusharqan. 23 Warmita rikaykurmi Adán pasaypa kushikur nirqan: “¡Kaymi itsanqa tullüpita aytsäpita rurashqa kar kikï niraq kaykan! Ollqupita rurashqa karmi payqa warmi kaykan”.