Abrahamta Tayta Dios watukanqan
18
Mamre runapa chakran encina jachakuna kanqancho taykaptinmi Abrahamta Tayta Dios yuriparqan. Tsay hörami pasaypa achaptin toldun punkucho Abraham llantukur jamaraykarqan. 2 Rikachakuykanqanchömi kimsa runakuna ichiraykaqta rikarqan. Tsaymi chaskinanpä† cörrilla aywar urkunpis patsaman töpanqanyaq qonqurikuykur 3 nirqan: “Taytakuna, päsakuyänayki kaptinpis jamarishunrä. Ama aywakuyaytsu. 4 Yakuta apatsimushä chakikikunata mayllakuyänaykipä. Kay jacha chakillanchöpis jamaykulläshun. 5 Wamaqllanta chaykäyämuptikiqa imallatapis kusinakaskatsimushärä. Mikuskirnami päsakuyanki”.Tsaynö niptinmi paykuna niyarqan: “Taytay, allichi kanman”.
6 Tsaymi Abrahamqa toldunman yaykuskir Sarata nirqan: “Ishkay chunka (20) kïlu mas allinnin jarinapita tantata ruraskamuy”.
7 Nirkurnami wäkankuna kaqman Abraham cörrilla aywar wera torïtuta apamurqan. Tsaytanami wätayninta entregarqan pishtaskir kusinananpä. 8 Nirkurnami mantequïllata, lichita y kusinakatsinqan aytsata apaykur qorpankuna jamaraykanqallanman qararqan. Paykuna mikuyaptinmi alcäbulla kaykarqan imatapis munayanqanta apapänanpä.
9 Mikuskirnami Abrahamta tapuyarqan: “¿Maychötä warmiki Saraqa kaykan?”
Abrahamnami nirqan: “Toldu rurinchömi kaykan”.
10 Tsaynö niptinmi juknin nirqan: “Watan yapay kutimunäpäqa ollqu wamrayuqnami warmiki Sara kaykanqa”.†
Abrahamta tsaynö ninqanta punku waqtallanpitami Sara wiyaparaykarqan. 11 Abrahamwan Saraqa chachayashqanami kayarqan. Chakwanna kaptinmi killa qeshyanpis unayna illakashqa karqan. 12 Tsaynö parlanqanta wiyarmi Saraqa asikur shonqullancho nirqan: “Kanan chakwanna kaykarqa y runäpis awkinna kaykaptinqa ¿imanöpanatä wamräpis kanman?”
13 Tsaymi Abrahamta Tayta Dios nirqan: “¿Imanirtä Sara asikushqa? ¿Imanirtä chakwanna kar wamran mana kananpä kanqanta yarpan? 14 Noqapä ¿imallaqa aja kantsurä? Watan yapay kutimunäpäqa ollqu wamrayuqnami Sara kaykanqa”.†
15 Tsaynö ninqanta wiyarmi Sara mantsakar nirqan: “Noqaqa manami asikushqätsu”.
Tsaynö niptinmi Tayta Dios nirqan: “Noqa musyämi asikunqaykita”.
Sodoma markapä Tayta Diosta Abraham mañakunqan
16 Nirkurnami qorpankunaa Sodoma markapa päsakuyarqan. Abrahampis paykunata wallkirmi karuyaq aywarqan. 17 Abrahamwan aywaykarmi Tayta Dios yarpachakur nirqan: “Abrahamta musyatsishä imata yarpaykanqätapis. 18 Paypita aywaraqkunami atskaman mirar jatun nación kanqa. Tsaynöllami pay raykuq kay patsacho llapan casta runakunapis bendicionnïta chaskiyanqa. 19 Paymi tsurinta y paypita aywaraqkunatapis yachatsinqa munanqänö imaypis kawayänanpä. Tsaypämi payta akrashqä. Tsaynö ruraptinmi Abrahamta awninqäkunata llapanta cumplishä”.
20 Tsaynö yarpachakuskirmi Abrahamta Tayta Dios nirqan: “Sodomacho y Gomorracho taq runakunapämi maytsay runakunapis parlayan pasaypa jutsa ruraq kayanqanta. 21 Tsaymi kanan aywaykä runakuna niyanqannö rasunpaypa jutsayuq kayanqanta o jutsaynaq kayanqantapis musyanäpä”.
22 Tayta Dioswan Abraham parlanqanyaqmi ishkay kaq qorpankunaqa Sodomaman puntayarqan. 23 Tayta Diospa ñöpanman witiykurmi Abraham tapur nirqan: “Jutsasapa runakunata ushakätsirqa ¿jutsaynaq kaqkunatapis ushakätsinkitsurä? 24 Tsay jatun markachöqa jutsaynaq runakuna capazchi kaykan pitsqa chunkallapis (50). Pitsqa chunka jutsaynaq runakuna kaykaptinqa ¿tsay markata mana kuyapaypatsurä ushakätsinki? 25 Taytay, jutsaynaq runakunatawan jutsasapa runakunata iwalqa ama ushakaykatsillaytsu. Kay patsacho llapan runakunapa jueznin kaykarqa ¿manatsurä shumaq arreglaykunkiman?”
26 Abraham tsaynö rugakuptinmi Tayta Dios nirqan: “Sodoma markacho pitsqa chunka jutsaynaq runakunata tarirqa manami tsay markata ushakätsishätsu”.
27 Tsaymi Abraham nirqan: “Taytay, yapay tapuptï ama ajanaykullaytsu. Noqaqa polvunö y uchpanöllami kaykä. 28 Jutsaynaq runakunaqa capazchi pishin pitsqa chunka kananpä pitsqallapis. ¿Tsaylla pishiykaptintsurä tsay markata ushakaykatsinkiman?”
Tsaynö rugakuptinnami Tayta Dios nirqan: “Jutsaynaq runakunata chusku chunka pitsqata (45) tarirqa manami ushakätsishätsu”.
29 Abrahamnami yapay nirqan: “Capazchi chusku chunkallapis (40) jutsaynaq runakunaqa tsaycho kaykäyan”.
Tsaynö niptinmi Tayta Dios nirqan: “Jutsaynaq runakunata chusku chunkallatapis tarirqa manami ushakätsishätsu”.
30 Yapay rugakurmi Abraham nirqan: “Taytay, kutin kutin rugakuptï ama ajanaykullaytsu. Capazchi kimsa chunkallapis (30) jutsaynaq runakuna kaykäyan”.
Tsaynö niptinmi Tayta Dios nirqan: “Jutsaynaq runakunata kimsa chunkallatapis tarirqa manami tsay markata ushakätsishätsu”.
31 Abraham yapaymi nirqan: “Taytay, masta tapukuptï ama ajanaykullaytsu. Ishkay chunkallatapis (20) jutsaynaq runakunata tarirninqa ¿ushakätsinkitsurä?”
Tsaynö tapuptinmi Tayta Dios nirqan: “Ishkay chunkallatapis jutsaynaq runakunata tarirqa tsay markata manami ushakätsishätsu”.
32 Yapaymi Abraham tapurqan: “Taytay, kutin kutin tapuptï ama ajanaykullaytsu. Kananllanami tapukushayki. Chunkallatapis jutsaynaq runakunata tarirqa ¿imatatä ruranki?”
Niptinmi Tayta Dios nirqan: “Tsay markacho chunkallatapis jutsaynaq runakunata tarirqa manami ushakätsishätsu”.
33 Abrahamwan parlayta ushaskirmi Tayta Dios aywakurqan. Abrahamnami tanqan kaqman kutikurqan.