Sodomata y Gomorrata Tayta Dios ushakätsinqan
19
Patsa tsakaykaptinnami Sodomaman chäyarqan punta aywaq ishkay angelkuna. Lotnami jamaraykarqan markaman yaykunacho. Rikaskirmi paykunapa ñöpankunaman Lotqa qonqurikuykurqan urkunpis patsaman töpanqanyaq. 2 Tsaymi paykunata nirqan: “Taytakuna, wayïman aywaykulläshun patsakuyänaykipä. Tsaychömi chakikikunata mayllakuyanki. Waray tutanami päsakuyanki”.Tsaynö niptinmi paykuna niyarqan: “Päkillä, taytay. Kananqa cällillachöpis waräkuyäshämi”.
3 Tsaynö mana munaykäyaptinpis wayincho patsakuyänanpä Lot kutin kutin rugaptinmi wayinman aywayarqan. Wayinman chaykuyaptinnami levadüraynaq tantata ruratsir alli mikuyta mikuyänanpä Lot kusinatsirqan.
4 Lotpa wayincho mayqanpis manarä punuptinmi Sodoma marka runakuna chölukunapita qallaykur awkinkunayaq juntapaskiyarqan. 5 Lotman qayaykacharmi niyarqan: “¿Maytä wayikiman patsakamuq runakuna? ¡Paykunata fuerzayänäpä juklla qarqamuy!”
6 Tsaynö niyaptinmi wayinpita Lot yarquskir punkunta shumaq wichqarkur 7 tsay runakunata nirqan: “Taytakuna, qorpäkunata ima mana allitapis ama ruraykuyaytsu. 8 Qorpäkunapa trokinqa ishkay warmi tsurïkunata jipimushä munayanqaykita rurayänaykipä. Tsurïkunaqa manarämi pï runawanpis punuyashqarätsu. Wayïman chämuq runakunataqa ama imatapis ruraykuyällaytsu”.
9 Tsaynö niptinmi runakuna niyarqan: “¡Qamqa jukläman witikuy! ¿Jäpa runa kaykarku mandayämayta munaykanki? ¡Kananmi itsanqa qamta rurayäshayki paykunata rurayänäpä kanqanpitapis mas peor!”
Tsaynö nirmi Lotta maqakachaskir aywayarqan wayi punkunta amiyänanpä.
10 Tsaymi qorpankunaqa Lotta sutaypa wayi rurinman yaykaskatsir punkuta wichqarkur trancaskayämurqan. 11 Nirkurmi waqtacho kaykaq runakunata qaprayätsiyarqan chölukunapita qallaykur hasta awkinkunayaq. Tsaynö qapra karmi punkuta ashiykäyanqallancho ajayaskiyarqan.
12 Nirkurnami qorpankuna Lotta niyarqan: “¿Kay markacho mas castaykikuna kanku? Castaykikuna kaptinqa warmitapis, ollqutapis, mashaykipä kaq chölukunatapis llapanta pushakurkur kay markapita aywakuyay. 13 Atskaqmi Tayta Diosman quejakuyashqa kay markacho runakuna jutsa ruraq kayanqanpita. Tsaynö jutsasapa kayaptinmi noqakunata mandayämashqa kay markata chipyaq ushakätsiyänäpä”.
14 Tsaynö niptinmi mashan kananpä kaq chölukunaman aywaykur Lot nirqan: “¡Kay markapita llapantsik aywakushun! ¡Tayta Diosmi kay markata ushakätsinanpä kaykan!”
Tsaynö niptinpis Lot brömapanqanta yarparmi criyiyarqantsu.
15 Patsa waraykaptinnami Lotta angelkuna niyarqan: “Kay markata ushakätsiyaptï mana ushakänaykipä ishkan tsurikita y warmikita pushakurkur empëñu aywakuy”.
16 Lot ras mana yarquptinmi angelkuna payta, warminta y tsurinkunatapis makipita jancharkur markapita jipiyarqan. Tsaynöpami Tayta Dios kuyaparnin paykunata jipirqan tsay markacho mana ushakäyänanpä.† 17 Markapita karucho kaykäyaptinnami juk ángel nirqan: “Mana wanuyänaykipä cörrilla qeshpir aywakuyay. Qepaman mana tikramuypa ni pampachöpis mana ichiypa jirkayaq aywakuyay”.
18 Tsaynö niyaptinmi Lot nirqan: “¡Taytakuna, ichikllata shuyaskiyayrä! 19 Qamkunaqa alli runakuna karmi kuyapäyämar mana wanuyänäpä jipiyämashqayki. Markata juklla ushakätsiyaptikiqa jirkayaq manami qeshpiyta kamäpakuyäshätsu. Lätaykachaykaqllatachi ushakätsiyämanqa. 20 Taytakuna, taqay cercacho kaykaq taksha markallaman qeshpiyanqäyaq shuyaykuyällay. Tsay taksha markataqa ama ushakaykatsiyällaytsu”.
21 Tsaymi ángel nirqan: “Mañakamanqaykinö katsun. Taqay taksha markata manami ushakätsishätsu. 22 Tsaynö kaykaptinqa juklla tsay markaman qeshpir aywakuyay. Tsayman manarä chäyaptikiqa ushakätsinäpä kaq markata manarämi ushakätsishärätsu”.
Nirkurnami tsay taksha markapa jutinta churarqan Zoar jutin kananpä.a
23 Patsa waraskiptinnami Zoarman Lot charqan. 24 Chaykuptinnami Sodoma y Gomorra markakunaman azufritawan lunyaykaq ninata Tayta Dios tamyatsimurqan. 25 Tsay täyanqan pampa markakunachömi runakunata, uywakunata y llapan imaykatapis chipyaq nina usharqan.† 26 Lotpa warminmi† itsanqa qeshpiykanqancho qepapa tikraskir kachi rumiman tikraskirqan.
27 Tsaypita waraynin tutanami Tayta Dioswan parlanqan kaqman Abraham aywarqan. 28 Tsaypitami rikarqan Sodoma y Gomorra markakunapita jornupitanörä qoshni shäriykaqta. 29 Tsaynömi Tayta Dios ushakätsirqan Lot tanqan pampacho markakunata. Tsaynö ushakätsirpis Abraham rugakushqa kaptinmi tsay markakunapita Lotta qeshpitsirqan.
Lotpa warmi tsurinkuna imanöpa wamrayuq kayanqanpis
30 Tsaypitanami Lot pasaypa mantsarirqan Zoarllacho täkuyta. Tsaymi ishkan warmi tsurinkunawan jallqaman aywakur machayllacho täyarqan. 31 Tsaychömi mayor kaq jipash ñañanta nirqan: “Taytantsikqa awkinnami. Kaychöqa manami ollqu kantsu noqantsikwan tänanpä. 32 Tsaynö kaykaptinqa taytantsikta machaskatsir paywan punushun noqantsikcho tsurin yurir castantsikkuna mana ushakänanpä”.
33 Willanakuyanqan tsakaymi taytanta vïnuwan machätsiyarqan. Nirkurnami mayor kaq jipash taytanwan punurqan. Taytanqa machashqa karmi mayarqantsu imay höra tsurin yaykunqanta ni yarqunqantapis.
34 Waraynin junaqnami mayor kaq jipash qepa kaq ñañanta nirqan: “Qäyan paqasmi taytantsikwan punurqä. Kanan paqas qampis paywan pununaykipä yapay machätsishun. Tsaynöpami taytantsikpa castankuna ushakäyanqatsu”.
35 Tsaynö willanakuskirmi tsay paqas taytanta yapay upyatsiyarqan. Nirkurnami qepa kaq jipashna taytanwan punurqan. Pasaypa machashqa karmi taytanqa mayarqantsu imay höra tsurin yaykunqanta ni yarqunqantapis.
36 Tsaynöpami Lotpa ishkan tsurinkuna taytanllapata qeshyaq rikakuyarqan. 37 Mayor kaq jipashmi ollqu wamrata qeshyakurqan. Tsay wamrapa jutinmi karqan Moab. Paypita aywaraqkunami moabita runakuna kaykäyan. 38 Qepa kaq jipashpis ollqu wamratami qeshyakurqan. Tsay wamrapa jutinnami karqan Ben-Ammi. Ben-Ammipitanami amonita runakuna kaykäyan.