Sarata warminpä Abimelec pushatsinqan
20
Tsaypita Neguevpa aywakurmi Abraham Cadespita Shurman päsaq jäkuqchöna tarqan. Nirkurnami Gerar markapa aywar tsaychöna tarqan. 2 Tsaycho taykarmi warmin Sarapä Abraham nirqan: “Payqa panïmi”.† Tsayta musyaskirmi Gerarpa mandaqnin rey Abimelec Sarata pushatsirqan warmin kananpä.3 Pushatsinqan paqasmi Abimelecta suëñuynincho Tayta Dios nirqan: “Warmikipä pushatsimunqayki warmiqa runayuqmi. Tsayta ruranqaykipitami kanan wanunki”.
4 Abimelecqa Sarawan manarämi punurqanrätsu. Tsaymi nirqan: “Tayta Dios, paywan manarä punuykaptïqa ¿imanirtä wanutsimayta munanki? 5 Kikin Abrahammi nimashqa panin kanqanta. Tsaynöllami Sarapis nimashqa turin kanqanta. Tsaynö nikäyämaptinqa manami imatapis llutanta rurashqätsu”.
6 Tsaynö niptinmi suëñuynincho Tayta Dios nirqan: “Noqapis musyämi llutalla imatapis mana ruranqaykita. Tsaynöpami jutsata mana ruranaykipä tsay warmiwan pununaykitapis munashqätsu. 7 Kananqa runanman tsay warmita kutitsiy. Runanqa willakuqnï profëtami. Kutitsiptikimi mana wanunaykipä mañakamanqa. Warminta mana kutitsiptikimi itsanqa qamta y wayikicho llapan taqkunata ushakätsishayki”.
8 Patsa waraskiptinnami Abimelecqa llapan mandashiqninkunata qayaykatsir imata suëñunqantapis willarqan. Tsaynö willaptinmi paykuna pasaypa mantsakäyarqan. 9 Nirkurnami Abrahamta qayaskatsimur Abimelec nirqan: “¿Imanirtä tsaynö llullapämashqayki? ¿Imachötä ajanätsishqä noqata y yanapamaqnïkunata jutsaman jitarpayämänaykipä? Tsaytaqa mana allitami rurashqayki. 10 ¿Imata yarpartä ‘Saraqa panïmi’ nimarqayki?”
11 Tsaynö niptinmi Abraham nirqan: “Noqa yarparqä kay markacho runakuna Tayta Diospita mana mantsapakur warmïpä raykuq wanutsiyämänanpä kanqantami. 12 Panï kaytaqa panïmi. Itsanqa taytäpa tsuripakuyninmi. Tsaynöpami paywan majatsakashqä. 13 Taytäpa wayinpita yarqukunäpä Tayta Dios nimaptinmi Sarawan willanakuyarqä mayman chäyaptïpis turin kanqäta ninanpä”.
14 Abraham tsaynö niptinmi Abimelec kutitsirqan Sarata. Kutiskatsirnami Abrahamta qararqan üshakunata, cabrakunata, wäkakunata, wätaynin warmikunata y wätaynin runakunatapis. 15 Nirkurnami payta nirqan: “Musyanqaykinöpis noqapa munaynïchömi kay nación kaykan. Munanqaykicho täkunaykipä akrakuy”.
16 Saratanami nirqan: “Turikita qaranqäkunaqa juk waranqa (1,000) siclo qellay chaninmi.a Tsaymi kananqa honornikita pipis parlanqanatsu”.
17-18 Sarata apanqanpitami Abimelecpa warminta y warminpa wätayninkunatapis llapanta Tayta Dios qolluqyätsirqan. Tsaymi Sarata qoriskir Abrahamqa Abimelecpä Tayta Diosta mañakurqan. Mañakuptinmi Abimelecta, warminta y warminpa wätayninkunatapis alliyätsirqan wamrayuq kayänanpä.