3 “ ‘Rupatsina sacrificiuta rupatsinanpä apamurqa sänu torïtuta Tinkuna Toldupa patiunman apayämunqa. Tsaymi Tayta Dios chaskinqa. 4 Jutsankunapita perdonashqa kayänanpämi torïtupa umanman makinta churaykur 5 Tayta Diospa ñöpancho pishtayanqa. Yawarnintanami Aarónpita aywaraq sacerdötikuna Tinkuna Toldupa patiuncho kaykaq altarpa lädunkunata tsaqtsupäyanqa. 6 Nirkurnami rupatsina sacrificiupä uywata apamuq runa uywapa qaranta jipiskir aytsanta cuartizanqa. 7 Aarónpita aywaraq sacerdötikunanami altar jananman yantata tsoqpaykur ninata tsaritsiyanqa. 8 Tsay jananmannami cuartizanqan aytsata, umanta y pacha wirantapis churayanqa. 9 Tsaypitanami uywata apamuq runa uywapa pachanta y chakinkunata mayllanqa. Tsaytapis altar jananman churaykurmi sacerdöti rupatsinqa. Tsay rupatsinqanqa rupatsina sacrificiumi kanqa. Mushkuyninmi Tayta Diospa shonqunpänö kanqa.

10 “ ‘Üshankunapita o cabrankunapita rupatsina sacrificiupä apamurqa sänu orquta apamunqa. 11 Tayta Diospa ñöpancho tsay uywata pishtarqa altarpa norti kaqlächo pishtanqa. Aarónpita aywaraq sacerdötikunanami tsay uywapa yawarninwan altarpa lädunkunata tsaqtsupäyanqa. 12 Uywa apamuq runa aytsata cuartizaskiptinmi umantinta y pacha wirantinta altarcho rupaykaq yanta jananman churaykur sacerdöti rupatsinqa. 13 Nirkurnami uywata apamuq runa uywapa pachantawan chakinkunata mayllanqa. Tsaytapis altarman churaykurmi sacerdöti rupatsinqa. Tsay rupatsinqanqa rupatsina sacrificiumi kanqa. Mushkuyninmi Tayta Diospa shonqunpänö kanqa.

14 “ ‘Tayta Diosta adorar pajaqkunapita rupatsina sacrificiupä apamurqa kullkushta o pushapa palumata karpis apamunqa. 15 Sacerdötinami tsay kullkushpa o palumapa umanta jipiskir aytsanta altarcho rupatsinqa. Yawarnintanami altar ñöpanman jututsinqa. 16 Ukshinta y plümankunatami altarpa ñöpancho kaykaq uchpaman jitarinqa. Tsayqa rupay yarqamunan kaqlächömi kaykan. 17 Älanpita aptarkur pullanpa qashaskirmi altarcho kaykaq yanta jananman churaykur rupatsinqa. Tsay rupatsinqanqa rupatsina sacrificiumi kanqa. Mushkuyninmi Tayta Diospa shonqunpänö kanqa.