Tsaki mikuy ofrendapita tantiyatsinqan
2
“ ‘Pipis Tayta Diospä tsaki mikuy ofrendata apamurqa allinnin kaq jarinata apamunqa. Tsay jarinaman wiñapänanpämi aceitita y inciensiutapis apamunqa. 2 Tsay apamunqantami Aarónpita aywaraq sacerdötikunata entreganqa. Tayta Dios imaypis yarparänanpämi aceitiwan pichushqa juk aptay jarinata inciensiutawan altarcho sacerdöti rupatsinqa. Rupatsinqanpa mushkuyninmi Tayta Diospa shonqunpänö kanqa. 3 Rupatsinqanpita sobraq kaqmi sagrädu kar Aarónpä y paypita aywaraq sacerdötikunapä kanqa.4 “ ‘Jornucho kuwaskir tsaki mikuy ofrendata apamurqa allinnin kaq jarinapita aceitiwan masaraskir levadüraynaqllata apamunki. Tsayta mana apamurqa levadüraynaq llapsha tantata ruraskir aceitiwan llushiparkur apamunki.
5 “ ‘Sartincho ankaskir tsaki mikuy ofrendata apamurqa allinnin kaq jarinapita rurashqa tantata apamunki. Itsanqa levadüraynaqllata aceitiwan pichunki. 6 Tsay ofrendata atskaman pakiskir aceitita jananman wiñapanki. Tsayqa tsaki mikuy ofrendami kanqa.
7 “ ‘Caswilacho ankaskir tsaki mikuy ofrendata apamurqa allinnin kaq jarinapita aceitiwan rurashqa tantata apamunki.
8 “ ‘Tsay ofrendakunata kamariskir Tayta Diospä apamurmi sacerdötita entreganki. Paynami altarman apanqa. 9 Tayta Dios imaypis yarparänanpämi tsaypita wallkallata rakiskir altar janancho rupatsinqa. Rupatsinqanpa mushkuyninmi Tayta Diospa shonqunpänö kanqa. 10 Rupatsinqanpita sobraq kaqmi llapan apamunqan ofrendapitapis mas sagrädu kanqa. Tsaypita sobraq kaqmi Aarónpä y paypita aywaraq sacerdötikunapä kanqa.
11 “ ‘Tsaki mikuy ofrendata altarcho Tayta Diospä rupatsir levadürawan takunqanta ama rupatsinkitsu. Levadürata ni abëjapa mishkintapis Tayta Diospä imaypis ama rupatsinkitsu. 12 Primicia kaptinmi itsanqa levadürawan y abëjapa mishkinwan takushqatapis Tayta Diospä apamunki. Apamuptikipis altarcho ama rupatsiyätsuntsu.
13 “ ‘Tsaki mikuypita ofrendata kachiyuqta ruranki.† Kachiynaqllataqa imatapis ama rurankitsu. Kachiqa qamkunawan Tayta Dios pactu ruranqantami yarpätsiyäshunki. Tsaymi ima ofrendamanpis kachita wiñanki.
14 “ ‘Tsaki mikuykunapita primiciata Tayta Diospä apamurqa ankaskir aqashqata apamunki. 15 Tsayman aceitita y inciensiuta wiñanki. Tsayqa tsaki mikuy ofrendami kanqa. 16 Tayta Dios imaypis yarparänanpämi tsay apamunqan tsaki mikuyta y aceitita wallkallata rakiskir sacerdöti rupatsinqa. Tsaynöllami llapan apamunqan inciensiutapis rupatsinqa.