Rubénpita aywaraqkuna
5
Israelpa mayor tsurinmi karqan Rubén. Mayor karpis mädistanwan kakunqanpitami mayor kay derëchunta taytanpita chaskirqantsu.† Payta entregananpa trokinmi mayor kay derëchunta Josépa tsurinkunatana taytan Israel entregarqan. 2 Tsay derëchuta chaskirpis manami Josépa tsurinkunatsu wakin Israel trïbukunapita mas munayyuq kayarqan, sinöqa Judá trïbu runakunami mas munayyuq kayarqan. Tsaymi Israel nacionpa mandaqnin reypis Judá trïbupita karqan.†3 Israelpa mayor tsurinmi karqan Rubén. Rubénpa tsurinkunami kayarqan Hanoc, Falú, Hezrón y Carmi.
4 Joelpa tsurinmi karqan Semaías. Semaíaspa tsurinmi karqan Gog. Gogpa tsurinmi karqan Simei. 5 Simeipa tsurinmi karqan Micaía. Micaíapa tsurinmi karqan Reaía. Reaíapa tsurinmi karqan Baal. 6 Baalpa tsurinmi karqan Beera. Beerami karqan Rubén trïbu runakunapa mandaqnin. Tsay witsanmi Asiria nacionpa mandaqnin Tiglat-pileser paykunata prësu apakurqan.†
7 Beerapita aywaraqkunapa jutinkunami castanpa castanpa kaynö qellqaraykan: Jeiel (Jeielqa mas mandaqmi karqan), Zacarías 8 y Bela. Bela karqan Azazpa tsurin. Azaz karqan Semapa tsurin. Semanami karqan Joelpa tsurin. Rubén trïbu runakunami täyarqan Aroer partipita hasta Nebo markayaq y tsaypita hasta Baal-meónpa lindërunyaq.
9 Galaad particho tsaytsikaman uywankuna mirashqa kaptinmi rupay yarqamunan kaqläpapis Rubén trïbu runakuna täyänanpä aywayarqan. Tsaymi tsaychöpis täyarqan hasta tsunyaq jirka qallaykunqanyaq. Tsay tsunyaq jirkaqa hasta Éufrates mayuyaqmi chan.
10 Saúl rey kanqan witsanmi Rubén trïbu runakunaqa agareno runakunata atacayarqan. Agareno runakunaqa Galaad parti rupay yarqamunan kaqlächömi täyarqan. Paykunata vinciskirmi agareno runakunapa markankunacho Rubén trïbu runakuna täyarqan.
Gad trïbu runakuna
11 Rubén trïbu runakuna täyanqan ñöpanchömi Gad trïbu runakunapis täyarqan. Paykunami Basán particho täyarqan hasta Salca partiyaq. 12 Basánchöqa Joelmi mandaq karqan. Joelta mandashiqnin runami Safán karqan. Safánta mandashiqnin runami karqan Jaanai. Jaanaita mandashiqnin runami karqan Safat.
13 Paykunapa wakin trïbu mayinkunami mandayarqan Gad trïbucho kaykaq qanchis castakunata. Tsay mandaqkunami kayarqan Micael, Mesulam, Seba, Jorai, Jacán, Zía y Heber.
14 Tsay qanchis mandaqkunami kayarqan Abihailpita aywaraqkuna. Abihail karqan Huripa tsurin. Huri karqan Jaroapa tsurin. Jaroa karqan Galaadpa tsurin. Galaad karqan Micaelpa tsurin. Micael karqan Jesisaipa tsurin. Jesisai karqan Jahdupa tsurin. Jahdo karqan Buzpa tsurin.
15 Ahí karqan Abdielpa tsurin y Gunipa willkanmi. Paymi karqan llapan Gad castakunapa mandaqnin.
16 Gad trïbu runakunami täyarqan Galaad particho, Basán particho kaykaq markakunacho y Sarón particho kaykaq uywa mitsikuyänankunacho.
17 Llapan tsay jutikunatami acta libruman qellqarqan Judá nacionpa mandaqnin rey Jotam kaykaptin. Tsaynöpis tsay witsanmi Israel nacionpa mandaqnin rey kaykarqan Jeroboam.
Agareno runakunawan pelyayanqan
18 Rubén trïbu, Gad trïbu y pullan Manasés trïbupitami pelyay yachaq kayarqan chusku chunka chusku waranqa qanchis pachak soqta chunka (44,760) runakuna. Paykunami espädatapis escüdutapis flëchakunantapis guërracho shumaq manijayta yachayaq. 19 Tsaymi guërrata rurayarqan agareno runakunawan. Agareno runakunatami yanapayarqan Jetur runakuna, Nafis runakuna y Nodab runakuna.
20 Pullan guërracho kaykarmi Rubén trïbu, Gad trïbu y pullan Manasés trïbu runakunaqa Tayta Diosta mañakuyarqan yanapananpä. Tsaynö yärakur mañakuyaptinmi paykunata Tayta Dios yanaparqan. Tsaymi agareno runakunata y yanapaqnin runakunatapis llapanta vinciyarqan. 21 Tsaynö vinciskirmi paykunapa uywankunata apakuyarqan pitsqa chunka waranqa (50,000) camëllukunata, ishkay pachak pitsqa chunka waranqa (250,000) üshakunata y ishkay waranqa (2,000) ashnukunata. Tsaynöllami prësu apakuyarqan juk pachak waranqa (100,000) runakunatapis. 22 Tayta Dios yanapaptinmi tsay guërracho tsaytsika contran runakunata wanutsiyarqan. Nirkurmi Rubén trïbu runakuna, Gad trïbu runakuna y pullan Manasés trïbu runakunaqa agareno runakuna täyanqancho täyarqan Babiloniaman prësu apakuyanqanyaq.
Pullan Manasés trïbu runakuna
23 Pullan Manasés trïbu runakuna alläpa mirarmi Basánpita hasta Baal-hermónyaq y Senirpita hasta Hermón jirkayaq täyarqan. 24 Tsay pullan Manasés trïbu castakunapa mandaqninkunami kayarqan Efer, Isi, Eliel, Azriel, Jeremías, Hodavías y Jahdiel. Paykunaqa llapanpis alli chölullantä y maytsaychöpis reqishqami kayarqan.
Rubén trïbu, Gad trïbu y pullan Manasés trïbu runakunata prësu apakuyanqan
25 Rubén trïbu, Gad trïbu y pullan Manasés trïbu runakunaqa unay castankuna adorayanqan Tayta Diosta cäsukuyänanpa trokinmi juk dioskunatana adorayarqan. Tsay dioskunaqa kayarqan Tayta Dios ushakätsinqan jäpa runakuna adorayanqan dioskunami. 26 Tsay dioskunata adorayaptinmi Israel runakunata kuyaq Tayta Dios pasaypa ajanar Asiria nacionpa mandaqnin Pul jutiyuq Tiglat-pileserta† shakyätsirqan paykunata atacar prësu apakuyänanpä. Tsaymi wakinta apakuyarqan Halahman, wakinta Haborman, wakinta Haraman y wakintana Gozán mayu ñöpanman.† Tsaychömi kananyaqpis paykuna taykäyan.