3 Etampa tsurinkunami kayarqan Jezreel, Isma y Ibdas. Etampa warmi tsurinmi karqan Haze-lelponi. 4 Tsaynöllami Etampa tsurinkuna kayarqan Penuel y Ezer. Penuelpa tsurinmi karqan Gedor. Ezerpa tsurinmi karqan Husa. Llapan paykunami kayarqan Hurpita aywaraqkuna. Hurqa Efratapa mayor tsurinmi karqan. Efratami Belénpa taytan karqan.

5 Tecoapa taytan Asurmi ishkay warmiyuq karqan. Tsay warminkunapa jutinmi karqan Hela y Naara. 6 Naarapa wamrankunami kayarqan Ahuzam, Hefer, Temeni y Ahastari. 7 Helapa wamrankunami kayarqan Zeret, Jezoar y Etnán.

8 Cospa tsurinkunami kayarqan Anub y Zobeba. Tsaynöllami Cospita aywaraqkuna kayarqan Harumpa tsurin Aharhel casta runakuna.

9 Llapan wawqinkunapita mas respitädumi Jabes karqan. Maman pasaypa ñakarrä qeshyakurmi paypa jutinta churarqan Jabes jutin kananpä. 10 Israel runakunata kuyaq Tayta Diostami Jabes mañakur nirqan: “Tayta Dios, bendisaykallämay chakräkuna mas atska kananpä, alli kawanäpä y ima desgraciapis mana päsamänanpä”.

Tsaynö mañakuptinmi Tayta Dios payta yanaparqan.

11 Súapa wawqin Quelubmi Mehirpa taytan karqan. Mehirmi Estónpa taytan karqan. 12 Estónpa tsurinkunami kayarqan Bet-rafa, Paseah y Tehina. Tehinami Nahas markata shäritsirqan. Paykunami kayarqan Reca markapita.

13 Cenazpa tsurinkunami kayarqan Otoniel y Seraías. Otonielpa tsurinkunami kayarqan Hatat 14 y Meonotai. Meonotaipa tsurinmi karqan Ofra. Seraíaspa tsurinmi karqan Joab. Joabpita aywaraqkunami artesänu kar Carisim pampacho täyarqan.

15 Jefonipa tsurinmi karqan Caleb. Calebpa tsurinkunami kayarqan Iru, Ela y Naam. Elapa tsurinmi karqan Cenaz.

16 Jehalelelpa tsurinkunami kayarqan Zif, Zifa, Tirías y Asareel.

17 Esdraspa tsurinkunami kayarqan Jeter, Mered, Efer y Jalón. Meredpa jukaq warminchömi tsurinkuna kayarqan María, Samai y Isba. Isbapa tsurinmi karqan Estemoa. 18 Meredpa warminmi karqan Faraónpa tsurin Bitia. Meredpa jukaq warminnami karqan Judá warmi. Paychömi Meredpa tsurinkuna kayarqan Jered, Heber y Jecutiel. Jeredqa karqan Gedorpa taytanmi. Hebermi karqan Socupa taytan. Jecutielnami karqan Zanoapa taytan.

19 Hodíaspa warminmi karqan Nahampa panin. Hodíaspa juk tsurinmi karqan Keilapa taytan y jukaq tsurinmi karqan Estemoapa taytan. Keilami karqan garmita runa. Estemoanami karqan maacateo runa.

20 Simónpa tsurinkunami kayarqan Amnón, Rina, Ben-hanán y Tilón.

Isipa tsurinkunami kayarqan Zohet y Benzohet.

21 Judápa tsurinmi karqan Sela. Selapa tsurinkunami kayarqan Er y Laada. Ermi karqan Lecapa taytan. Laadami karqan Maresapa taytan. Paykunami Bet-asbea markacho takurnin lïnupita imatapis shumaq rurayaq. 22 Tsaynöllami Selapita aywaraqkuna kayarqan Joacim, Joás y Saraf. Joás y Sarafqa Moab casta warmikunata ashiskirmi Belénman kutiyarqan tsaycho täyänanpä. Tsaynöllami Selapita aywaraqkuna kayarqan Cozeba markacho taqkuna. Tsay jutikuna qellqaraykan unay acta librukunachömi. 23 Paykunami Netaim markacho y Gedera markacho tar reypä mitu mankakunata rurayarqan.

24 Simeónpa tsurinkunami kayarqan Nemuel, Jamín, Jarib, Zera y Saúl. 25 Saúlpa tsurinmi karqan Salum. Salumpa tsurinmi karqan Mibsam. Mibsampa tsurinmi karqan Misma. 26 Mismapa tsurinmi karqan Hamuel. Hamuelpa tsurinmi karqan Zacur. Zacurpa tsurinmi karqan Simei.

27 Simeipa ollqu tsurinkunami kayarqan chunka soqta. Warmi tsurinkunanami kayarqan soqta. Simeipa wawqinkunapami itsanqa alläpa tsurinkuna karqantsu. Tsaymi Judá trïbu runakunanöqa Simeón trïbu runakuna alläpa mirayashqatsu. 28 Simeón trïbu runakunami täyarqan Beersebacho, Moladacho, Hazar-sualcho, 29 Bilhacho, Ezemcho, Toladcho, 30 Betuelcho, Hormacho, Siclagcho, 31 Bet-marcabotcho, Hazar-susimcho, Bet-biraicho y Saaraimcho. Tsay markakunami paykunapa karqan David rey kanqan witsanyaq. 32 Tsaynöllami Simeón trïbu runakuna pitsqa markakunacho täyarqan. Tsay markakunami kayarqan Etam, Aín, Rimón, Toquén y Asán. 33 Tsay markakunapa caseriunkuna karqan Baal partipa lindërunyaqmi. Simeón trïbu runakunapa jutinkuna y markankunapa jutinkuna qellqaraykan acta libruchömi.^†

34 Simeónpita wakin aywaraqkunami kayarqan Mesobab, Jamlec, Amasíaspa tsurin Josías, 35 Joel y Josibíaspa tsurin Jehú. Josibíaspa taytanmi karqan Seraías. Seraíaspa taytanmi karqan Asiel. 36 Tsaynöllami Simeónpita wakin aywaraqkuna kayarqan Elioenai, Jaacoba, Jesohaía, Asaías, Adiel, Jesimiel, Benaía, 37 y Sifipa tsurin Ziza. Sifipa taytanmi karqan Alón. Alónpa taytanmi karqan Jedaías. Jedaíaspa taytanmi karqan Simri. Simripa taytanmi karqan Semaías. 38 Tsay runakunami kayarqan castankunapa mandaqninkuna. Tsaynöllami paykuna casta atska mirayarqan.

39 Atskaman mirarmi uywankunata mitsiyänanpä qewata ashir Gedor partiyaq chäyarqan. Tsayqa karqan mayu ñöpan pampapita rupay yarqamunan kaqläpami. 40 Tsaychömi uywankunapä tsaytsika alli qewata tariyarqan. Tsay partiqa añawllami karqan. Tsayman chäyanqan witsanmi tsaycho täyarqan Campa castankuna. 41 Gedor particho tayta munarmi janalächo qellqaraykaq mandaq runakuna^† chaykur Cam casta runakunata llapanta wanutsiyarqan. Wayinkunatapis y toldunkunatapis chipyaqmi ushakätsiyarqan. Tsaynö päsarqan Judá nacionpa mandaqnin rey Ezequías mandanqan witsanmi. Atska qewa uywankunapä kaptinmi tsaycho täyarqan.

42 Tsay Simeón trïbu runakunapitami pitsqa pachak (500) Seir jallqakunaman aywayarqan. Paykunapa mandaqninkunami kayarqan Pelatías, Nearías, Refaías y Uziel. Tsay mandaqkunaqa Isipa tsurinkunami kayarqan. 43 Tsayman chaykurmi kawaykar quëdaq amalecita runakunata tsaycho ushakätsiyarqan. Tsaynö wanuskatsirmi kananyaqpis paykuna tsaycho taykäyan.