2 “ ‘Tsaynöllami pipis mana musyayninpa impüru kaqta yatarqa impüru kanqa. Tsaymi impüru uywa^† wanushqata yatar impüru kanqa. Tsaynö kanqa wanushqa wätana kaqta yatarpis, wanushqa mana wätana kaqta yatarpis y wanushqa qarachaypa y lätaypa puriqta yatarpis.

3 “ ‘Pipis mana musyayninpa impüru runata o impüru warmita o paykuna impüruyätsiyanqanta^† yatashqa karqa yatanqanta tantiyakurmi jutsayuq kanqa.

4 “ ‘Allita rurananpä o mana allita rurananpäpis manami pipis mana yarpachakuypa juranmantsu. Mana yarpachakuypa juranqanta tantiyarmi jutsayuq kanqa.

5 “ ‘Tsay ruranqankunata tantiyakurqa perdontami mañakunqa. 6 Jutsayuq kanqanpita purificashqa kananpämi Tayta Diospa ñöpanman apamunqa china üshata o china cabrata karpis. Tsay apamunqanta altarcho sacerdöti rupatsiptinmi purificashqa kanqa.

7 “ ‘Üshata rantinanpä mana aypäpakurqa Tayta Diospa ñöpanman ishkay kullkushta o ishkay pushapa palumata apamunqa. Jukaqmi purificatsina sacrificiupä kanqa y jukaqnami rupatsina sacrificiupä kanqa. 8 Tsaykunatami sacerdötiman apamunqa. Sacerdötinami apamunqan kullkushpa o palumapa kunkanta pillurinqa. 9 Yawarnintanami wallkallata altarpa lädunkunata tsaqtsupanqa y wakin yawartanami altar chakinman jututsinqa. Tsayqa purificatsina sacrificiumi kanqa. 10 Jukaq palumata o kullkushtami itsanqa rupatsina sacrificiupä Tayta Dios ninqannö sacerdöti rupatsinqa. Tsaynöpami tsay runa impüru kanqanpita purificashqa kanqa.

11 “ ‘Ishkay kullkushta o ishkay pushapa palumata rantinanpä mana aypäpakurqa purificashqa kananpä ishkay kïlu allinnin kaq jarinata apamunqa. Purificatsina sacrificiu kaptinmi tsaykunamanqa wiñapanqatsu aceitita ni inciensiutapis. 12 Tsaykunata sacerdötiman apaptinmi Tayta Dios imaypis yarparänanpä juk aptayta altarcho rupatsinqa. Tsaytami rupatsinqa wakin ofrendakunata rupatsiyanqan janancho. Tsay ofrendaqa purificatsina sacrificiumi kanqa. 13 Sacerdöti tsaynö ruraptinmi tsay runa impüru kanqanpita purificashqa kanqa. Mana rupatsinqan tsaki mikuy ofrenda sacerdötipä kanqannömi sobraq kaq jarinapis sacerdötipä kanqa’ ”.

14 Mastami Moisésta Tayta Dios nirqan: 15 “Pipis mana musyayninpa Tayta Diospä sagrädu kaqkunata^† mana respitarqa jutsayuqmi rikakunqa. Tsaymi jutsanpita pägakur sänu carnëruta Tayta Diospä apamunqa. Tsay carnëruqa consagratsina sacrificiumi kanqa. Tinkuna Sagrädu Tolducho pësakunawan pësaskirmi tsay carnërupa chaninta churanqa. 16 Tsaynöllami Tayta Diospä sagrädu kaqta mana respitanqanpita chaninta päganqa. Tsay jananmannami quinta parti masta sacerdötita päganqa. Apamunqan carnëruta consagratsina sacrificiupä altarcho sacerdöti rupatsiptinnami perdonashqa kanqa.

17 “Pï runapis mana musyayninpa Tayta Dios ninqankunata mana cumplirqa jutsayuqmi rikakunqa. 18 Tsaynö kaptinqa sacerdöti ninqannölla ayka chanin kaptinpis üshankunapita sänu carnëruta apamunqa. Tsay carnëruqa consagratsina sacrificiupämi kanqa. Tsayta altarcho sacerdöti rupatsiptinmi jutsayuq runa perdonashqa kanqa. 19 Tayta Dios ninqanta mana cumplinqanpitami tsay runa jutsayuq kaykan. Tsaymi apamunqan carnëruqa consagratsina sacrificiu kanqa”.