Consagratsina sacrificiupita masta tantiyatsinqan
6
(5.20) Mastami Moisésta Tayta Dios nirqan: 2 (5.21) “Pipis Tayta Diosta ajanätsir runa mayin paytakunqanta pakapur, mañakunqanta mana kutitsir, imantapis suwapur, imantapis qechur, 3 (5.22) pipa oqrapakuyninta tarikuskir ñëgar, llullakurnin jurar o imatapis manakaqkunata rurarqa 4 (5.23) jutsayuqmi rikakunqa. Tsaynö rurashqa karqa suwapanqanta, qechunqanta, paytakunqanta y tarikunqantapis duëñunta kutitsinqa. 5 (5.24) Rasunpaypa mana kaykaptin jurashqa karpis apanqankunatami kutitsinqa. Kutitsinqan jananmanmi quinta parti masta päganqa. Consagratsina sacrificiutapis tsay junaqllami Tinkuna Tolduman apamunqa. 6 (5.25) Consagratsina sacrificiupä sänu carnëruta Tayta Diospa ñöpanman aparmi sacerdötita entreganqa. Sacerdöti ninqannömi tsay carnërupa chanin kanqa. 7 (5.26) Carnërupa wiranta Tayta Diospa ñöpancho sacerdöti rupatsiptinmi jutsayuq runa perdonashqa kanqa”.†Rupatsina sacrificiupita masta tantiyatsinqan
8 (1) Mastami Moisésta Tayta Dios nirqan: 9 (2) “Rupatsina sacrificiuta rupatsiyänanpä Aarónta y tsurinkunata ninki: ‘Rupatsina sacrificiuta rupatsirqa altarcho kaykaq shanshacho warat rupananpä jaqiykuyanqa. 10 (3) Patsa waraskiptinnami lïnupita rurashqa latsapatawan calzoncïlluta sacerdöti jatikunqa. Tsaypitanami altarcho rupatsinqan uywapa uchpanta qoriskir altarpa ñöpanman qotunqa. 11 (4) Tsaypitanami jatiranqan latsapata trukakuskir püru sitiuman uchpata apanqa. Tsayqa campamentupita juklächömi kanqa.
12 (5) “ ‘Altarcho imaypis mana upiypa nina rupananpämi cada tuta yantata sacerdöti yapapanqa. Tsay jananmanmi rupatsina sacrificiupä aytsata churanqa. Tsaynöllami alli kawakuy sacrificiupä wira apamunqantapis tsaycho rupatsinqa. 13 (6) Altarchöqa mana upiypami imaypis nina tsarinqa’ ”.
Tsaki mikuy ofrendapita masta tantiyatsinqan
14 (7) “ ‘Pipis tsaki mikuyta ofrendapä apamuptinqa Aarónpita aywaraq sacerdötikunami altarpa ñöpanman churayanqa. Tsay altarqa Tayta Diospa ñöpanchömi kaykan. 15 (8) Juk sacerdötimi aceitiwan pichushqa jarinata juk aptayta rakinqa. Tayta Dios imaypis yarpänanpämi ofrenda janancho kaq inciensiutawan altarcho rupatsinqa. Rupatsinqanpa mushkuyninmi Tayta Diospa shonqunpänö kanqa. 16 (9) Sobraq kaq tsaki mikuytaqa levadüraynaqllatami Tinkuna Toldu sagrädu patiucho Aarón y tsurinkunapis mikuyanqa.
17 (10) “ ‘Altarcho ofrendata rupatsinqanpita sobraq kaqmi sacerdötikunapa derëchun kanqa. Tsay mikuykuna purificatsina sacrificiunö y consagratsina sacrificiunö sagrädu kaptinmi levadürataqa wiñapanqatsu. 18 (11) Tayta Diospä apamunqan ofrendakunapita sobraq kaqtaqa Aarónpita aywaraq sacerdötikunami imaypis mikuyanqa. Tsay ninqäqa imayyaqpis leymi qamkunapä y qamkunapita aywaraqkunapäpis. Tsay mikuyta pipis o imapis töpanqan kaqkunaqa sagrädunami kanqa’ ”.
Sacerdöti kayman yaykuqkuna ofrendata apayänanpä tantiyatsinqan
19 (12) Mastami Moisésta Tayta Dios nirqan: 20 (13) “Sacerdöti kananpä churanqan junaq Aarón y paypita aywaraqkuna tsaki mikuy ofrendata apayämunqa ishkay kïlu jarinata. Ofrendata qoyay qoyay rupatsiyanqannöllami pullanta tutapa y pullanta tardipa altarcho rupatsiyanqa. 21 (14) Altarcho rupatsiyänanpä ofrenda apamunqantami sartincho aceitiwan ankayanqa. Nirkurnami taksha takshalla pakiskir altarcho rupatsiyanqa. Altarcho rupatsiyanqanpa mushkuyninmi Tayta Diospa shonqunpänö kanqa. 22 (15) Aarónpa trokin aywaraqninpita jukna mandaq sacerdöti yaykurmi imaypis tsaynö ruranqa. Tsay ofrendatami ushaqpä rupatsinqa. Tsaynö imaypis rurayänanpämi Tayta Dios nishqa. 23 (16) Sacerdötikuna apayämunqan ofrendataqa manami pipis mikunqatsu. Tsaykunataqa llapantami rupatsiyanqa”.
Purificatsina sacrificiupita masta tantiyatsinqan
24 (17) Mastami Moisésta Tayta Dios nirqan: 25 (18) “Purificatsina sacrificiuta rupatsiyänanpä Aarónta y tsurinkunata ninki: ‘Tsay sacrificiu sagrädu kaptinmi Tayta Diospa ñöpancho uywata pishtayanqa rupatsina sacrificiupä pishtanqan kaqllacho. 26 (19) Tinkuna Toldu sagrädu patiullachömi wiranta rupatsiq sacerdöti aytsata mikunqa. 27 (20) Imapis tsay aytsata töparqa sagrädumi kanqa. Tsay uywapa yawarnin latsapanman pillchiptinqa sagrädu lugarllachömi taqshayanqa. 28 (21) Sacrificiupä pishtanqan uywapa aytsanta mitu mankawan kusinakurqa tsay mankata pakiskinqa. Bronci mankawan kusinakurqa shumaq mayllanqa.