3 Tapuyllantami Salomónqa ushaypa ushar llapanta contestarqan. Imata tapunqanpis paypäqa manami ajatsu karqan. 4 Salomón yachaq kanqanta y palaciunta ruratsinqanta rikarmi Sabá nacionpa mandaqnin warmi 5 pasaypa almirashqa rikakurqan. Tsaynöpis almirashqa rikakurqan alli mikuykunata rikar, mandashiqninkunapa cuartunkunata rikar, wätayninkunata y jatiranqan latsapanta rikar, cöpa sirviqninkunata rikar y Tayta Diospä sacrificiukunata templucho rupatsinqanta rikar.

6 Tsaymi rey Salomónta nirqan: “Llapan ruranqaykita y yachaq kanqaykita nacionnïcho willayämanqanqa rasunpaypami kaykan. 7 Tsaynö willayämaptinpis kikï rikanqäyaq manami criyirqätsu. Kananmi itsanqa tantiyakü willayämanqanpitapis mas yachaq y kapuqyuq kanqaykita. 8 Alli yachaynikiwan parlanqaykita wiyar ¡ima kushishqarä mandar yanapashuqnikikuna y sirvishuqnikikuna kayan! 9 ¡Tayta Diosniki alabashqa kaykullätsun kuyashurniki Israel nacionpa mandaqnin rey kanaykipä churashunqaykipita! Israel runakunata imaypis kuyarmi imaykayuqtapis muchuqtapis alli rikanaykipä churashushqayki”.

10 Tsaypitanami Salomónta qararqan kimsa waranqa isqun pachak soqta chunka (3,960) kïlu qorita, atska perfümikunata y kuyayllapä chaniyuq atska rumikunatapis. Salomónta qaranqan perfümitanöqa manami imaypis Israel nacionman apayämurqantsu.

11 (Tsaynöllami rey Hirampa negociunta apaq büquikunawan Ofir partipita apayämuq atska qorita, sándalo jutiyuq qerukunata y kuyayllapä chaniyuq rumikunatapis. 12 Tsay sándalo qerupitami rey Salomón ruratsirqan Tayta Diospa templunpa balconninkunata y palaciupa balconninkunatapis. Tsaynöpis tukaqkuna tukayänanpämi ruratsirqan arpakunata y salteriukunata. Tsaynö atskataqa sándalo qeruta Judáman imaypis manami chätsiyarqantsu.)

13 Sabá nacionpa mandaqnin warmitami rey Salomón atska qaraykunata qararqan. Tsay jananmanmi tsay warmi imata mañakunqantapis qaraykurqan. Nirkurnami mandaq warmiqa nacionninman sirviqninkunawan kutikuyarqan.

14 Salomónqa cada watami chaskiq ishkay chunka ishkay waranqa (22,000) kïlu qorita. 15 Tsay jananmanmi negociantikuna, Arabia nacionpa mandaqnin reykuna y Israel nacionpa gobernadorninkuna pägayanqan impuestutapis chaskiq.

16 Ishkay pachak (200) escüdukunatami rey Salomón qoripita ruratsirqan martilluwan takayllapa. Tsay escüdukunaqa cada ünunmi soqta kïlu lasarqan. 17 Tsaynöllami mas kimsa pachak (300) escüdukunatapis martilluwan takayllapa qoripita ruratsirqan. Tsay escüdukunaqa cada ünunkuna juk kïlu pullanmi lasarqan. Tsaykunataqa Líbano Munti jutiyuq palaciunmanmi churatsirqan.

18 Tsaynöllami trönuntapis marfilpita ruraskatsir qori püruwan laqatsirqan. 19 Tsay trönumi karqan soqta grädayuq, waqtanqa redondu y ishkanläpa rikra churakunayuq. Trönupa cada lädunchömi ruratsinqan león ichirarqan. 20 Grädakunapa lädunkunachöpis chunka ishkay ruratsinqan leonkunami karqan. Grädakunapa jukaq kuchunchömi soqta leonkuna karqan y jukaq kuchunchöpis soqta leonkuna karqan. Manami mayqan nacionpa mandaqnin reypis tsay trönutanö kuyayllapätaqa ruratsirqantsu.

21 Rey Salomónpa cöpankunapis y Líbano Munti jutiyuq palaciucho kaykaq llapan manëjukunapis qoripitami karqan. Tsay palaciuchöqa manami imapis qellaypitaqa karqantsu. Qellaypita kaqtaqa Salomón rey kanqan witsan manami pipis cäsuyaqtsu. 22 Rey Salomónpa büquinkunami cada kimsa watacho rey Hirampa büquinkunawan Tarsisman juntu kutimur apayämuq qorita, qellayta, marfilta, mönukunata y pävu realkunatapis.

23 Rey Salomónqa maytsay nación reykunapitapis mas kapuqyuqmi y mas yachaqmi karqan. 24 Yachaq kananpä Tayta Dios yanapaptinmi llapan nacionpitapis payman aywayarqan yachatsinqanta wiyayänanpä. 25 Aywarmi qellaypita y qoripita ruratsiyanqanta Salomónpä apayaq. Tsaynöpis apayaq latsapakunata, armakunata, mushkuq jachakunata, cawallukunata y mulakunatapis. Cada watami atska qarayta Salomón chaskiq.

26 Salomónmi tsaytsika carrëtakunata y cawallukunata rantirqan. Tsaynöpami paypa karqan juk waranqa chusku pachak (1,400) carrëtankuna y chunka ishkay waranqa (12,000) cawallunkuna.^† Tsay cawallukunatami wakinta churarqan guërra carrëtakuna kaykäyanqan cuartelkunacho kayänanpä y wakintana churarqan Jerusalén palaciun cercacho kayänanpä.

27 Rey Salomón qoritsinqan qellaypis ruminörämi Jerusaléncho atska karqan.^† Tsaynöllami cedru jachatapis Sefelacho plantatsirqan hïgus jachanörä tsaytsika kananpä.

28 Salomón kachanqan negociantikunami Egiptupita y Ciliciapita cawallukunata rantiyämuq.^† 29 Egiptupita rantiyämunqan juk carrëtami soqta pachak (600) qellay cuestaq y juk cawallunami juk pachak pitsqa chunka (150) qellay cuestaq. Tsay cawallukunata y carrëtakunatami wakintaqa rantikuyaq heteo runakunapa mandaqnin reykunata y wakintana Siria runakunapa mandaqnin reykunata.