2 Tapuyllantami Salomónqa ushaypa ushar llapanta contestarqan. Imata tapunqanpis paypäqa manami ajatsu karqan. 3 Salomón yachaq kanqanta y palaciunta ruratsinqanta rikarmi Sabá nacionpa mandaqnin warmi 4 pasaypa almirashqa rikakurqan. Tsaynöpis almirashqa rikakurqan alli mikuykunata rikar, mandashiqninkunapa cuartunkunata rikar, wätayninkunata y jatiranqan latsapanta rikar, cöpa sirviqninkunata rikar y Tayta Diospä sacrificiukunata templucho rupatsinqanta rikar.

5 Tsaymi rey Salomónta nirqan: “Llapan ruranqaykita y yachaq kanqaykita nacionnïcho willayämanqanqa rasunpaypami kaykan. 6 Tsaynö willayämaptinpis kikï rikanqäyaq manami criyirqätsu. Kananmi itsanqa tantiyakü willayämanqanpitapis mas yachaq y kapuqyuq kanqaykita. 7 Llapan ruranqaykita y alli yachaynikiwan parlanqaykita wiyar ¡ima kushishqarä mandar yanapashuqnikikuna y sirvishuqnikikuna kayan! 8 ¡Tayta Diosniki alabashqa kaykullätsun kuyashurniki Israel nacionpa mandaqnin rey kanaykipä churashunqaykipita! Israel runakunata imaypis kuyarmi imaykayuqtapis muchuqtapis alli rikanaykipä churashushqayki. Pay munanqannö mandaptikimi Israel nación imayyaqpis kanqa”.

9 Tsaypitanami Salomónta qararqan kimsa waranqa isqun pachak soqta chunka (3,960) kïlu qorita, atska perfümikunata y kuyayllapä chaniyuq atska rumikunatapis. Salomónta qaranqan perfümitanöqa manami imaypis Israel nacionman apayämurqantsu.

10 (Tsaynöllami rey Hirampa y rey Salomónpa negociunta apaq büquikunawan Ofir partipita apayämuq atska qorita, sándalo jutiyuq qerukunata y kuyayllapä chaniyuq rumikunatapis. 11 Tsay sándalo qerupitami rey Salomón ruratsirqan Tayta Diospa templunpa grädankunata y palaciunpa grädankunatapis. Tsaynöpis tukaqkuna tukayänanpämi ruratsirqan arpakunata y salteriukunata. Tsaynö atskataqa sándalo qeruta Judáman imaypis manami chätsiyarqantsu.)

12 Sabá nacionpa mandaqnin warmi apamunqanta atskata qaraptinmi rey Salomónpis atska qaraykunata qararqan. Tsay jananmanmi tsay warmi imata mañakunqantapis qaraykurqan. Nirkurnami mandaq warmiqa nacionninman sirviqninkunawan kutikuyarqan.

13 Salomónqa cada watami chaskiq ishkay chunka ishkay waranqa (22,000) kïlu qorita. 14 Tsay jananmanmi negociantikuna y Israel nacionman chaq runakuna pägayanqan impuestutapis chaskiq. Tsaynöllami Arabia nacionpa mandaqnin reykuna y Israel nacionpa gobernadorninkuna qorita y qellayta Salomónpä apayaq.

15 Ishkay pachak (200) escüdukunatami rey Salomón qoripita ruratsirqan martilluwan takayllapa. Tsay escüdukunaqa cada ünunmi soqta kïlu lasarqan. 16 Tsaynöllami mas kimsa pachak (300) escüdukunatapis martilluwan takayllapa qoripita ruratsirqan. Tsay escüdukunaqa cada ünunkuna kimsa kïlu masmi lasarqan. Tsaykunataqa Líbano Munti jutiyuq palaciunmanmi churatsirqan.

17 Tsaynöllami trönuntapis marfilpita ruraskatsir qori püruwan laqatsirqan. 18 Trönu kanqan patakpis qoripitami karqan. Rikra churakunankunapis ishkanläpami karqan. Trönupa cada lädunchömi ruratsinqan león ichirarqan. Trönuman jamananpäpis soqta grädatami witsaq. 19 Grädakunapa lädunkunachöpis chunka ishkay ruratsinqan leonkunami karqan. Grädakunapa jukaq kuchunchömi soqta leonkuna karqan y jukaq kuchunchöpis soqta leonkuna karqan. Manami mayqan nacionpa mandaqnin reypis tsay trönutanö kuyayllapätaqa ruratsirqantsu.

20 Rey Salomónpa cöpankunapis y Líbano Munti jutiyuq palaciucho kaykaq llapan manëjukunapis qoripitami karqan. Qellaypita kaqtaqa Salomón rey kanqan witsan manami pipis cäsuyaqtsu. 21 Rey Salomónpa büquinkunami cada kimsa watacho rey Hirampa büquinkunawan Tarsisman juntu kutimur apayämuq qorita, qellayta, marfilta, mönukunata y pävu realkunatapis.

22 Rey Salomónqa maytsay nación reykunapitapis mas kapuqyuqmi y mas yachaqmi karqan. 23 Yachaq kananpä Tayta Dios yanapaptinmi llapan nacionpitapis reykuna payman aywayarqan yachatsinqanta wiyayänanpä. 24 Aywarmi qellaypita y qoripita ruratsiyanqanta Salomónpä apayaq. Tsaynöpis apayaq latsapakunata, armakunata, mushkuq jachakunata, cawallukunata y mulakunatapis. Cada watami atska qarayta Salomón chaskiq.

25 Salomónpami karqan chusku waranqa (4,000) corralkuna cawallukunata wichqayänanpä y guërra carrëtankunata churayänanpä. Tsaynöllami karqan chunka ishkay waranqa (12,000) cawallu muntaqkuna.^† Tsay cawallu muntaqkunatami wakinta churarqan guërra carrëtakuna kayanqan cuartelkunacho kayänanpä y wakintana churarqan Jerusalén palaciu ñöpacho kayänanpä. 26 Salomónpa munayninchömi reykuna kayarqan Éufrates mayupita hasta Filistea nacionpa lindërunyaq y Egipto nacionpa lindërunyaq.^† 27 Rey Salomón qoritsinqan qellaypis ruminörämi Jerusaléncho atska karqan.^† Tsaynöllami cedru jachatapis Sefelacho plantatsirqan hïgus jachanörä tsaytsika kananpä. 28 Egiptupita y wakin nacionkunapitami cawallukunata Salomónpä rantiyämuq.^†

29 Rey Salomón ruranqankunami qallaykunanpita ushananyaq qellqaraykan profëta Natán qellqanqancho y Silupita kaq profëta Ahías qellqanqancho. Tsaynöllami qellqaraykan Nabatpa tsurin Jeroboam imanö kanqanpita profëta Iddo qellqanqancho. 30 Chusku chunka (40) watami Israel runakunata Jerusalénpita Salomón mandarqan. 31 Wanuskiptinmi taytan Davidpa Markanman pampayarqan. Salomónpa trokinnami tsurin Roboamna rey karqan.