3 Tsaypitanami soldädunkunata pushakurkur aywar Soba nacioncho kaykaq Hamat markata atacarqan. Paykunata vincirkurnami tsay markata qechurqan. 4 Nirkurmi tsunyaq jirkacho kaykaq Tadmor markatapis allitsatsirqan. Tsaynöllami Hamat particho kaykaq mikuy churakuna markakunatapis allitsatsirqan. 5 Tsaynöllami allitsatsirqan jana kaq Bet-horónta y ura kaq Bet-horóntapis. Tsay markakunatami murallaskatsir punkunkunatapis cerröjuyuqta churatsirqan. 6 Tsaynöllami allitsatsirqan Baalat markata, mikuy churakunan markakunata, guërra carrëta churakunan wayikunata y cawallun muntashqa aywaq soldädukunapa cuartelninkunatapis. Tsaynöllami llapan yarpanqanta ruratsirqan Jerusaléncho, Líbanucho y maytsaychöpis mandanqan kaqchöqa.

7 Tsay witsan Israel nacioncho taykäyarqanrämi amorreo runakuna, heteo runakuna, ferezeo runakuna, heveo runakuna y jebuseo runakunapis. Paykunaqa manami Israel runakunatsu kayarqan. 8 Tsay runakunapa unay castankunataqa nacionninman yaykur Israel runakuna manami wanutsiyarqantsu. Tsaymi tsay runakunapita aywaraqkuna Israel nacioncho kayaptinrä Salomón churarqan faenakunacho aruyänanpä. Kananyaqpis tsaynöllami paykunaqa faenakunacho aruyan.

9 Israel runakunatami itsanqa obligarqantsu faenakunacho aruyänanpä. Tsaypa trokinqa paykunata churarqan soldädukuna, capitankuna, carrëta manijaq soldädukuna y cawallun muntashqa aywaq soldädukuna kayänanpämi. 10 Salomónpa aruqninkunapa capatazninkuna karqan ishkay pachak pitsqa chunkami (250). Paykunami faenacho aruqkunata controlayaq.

11 Faraónpa warmi tsurin Davidpa Markancho taykaptinmi Salomón nirqan: “Tayta Diospa babulnin Israel nacionpa mandaqnin rey Davidpa wayinman yaykatsishqa kaptinmi tsay cuartukuna sagräduna kaykan. Tsaymi tsay wayicho warmï tanmantsu”.

Tsaynö nirmi tsay warminta Salomón aparqan ruratsinqan juklä palaciuman.

12 Tayta Diospä ruratsinqan altarchömi rupatsina kaq sacrificiukunata Salomón rupatsiq. Tsay altarqa templupa punkun frentinchömi karqan. 13 Mayqan junaqkunacho rupatsiyänanpä Moisés qellqanqan leykuna ninqannöllami tsay sacrificiukunata Salomón imaypis rupatsiq. Tsaymi rupatsirqan jamay junaqkunacho,^† llullu killa fiestakunacho^† y cada wata kimsa fiestata rurayanqanchöpis.^† Tsay fiestakunami karqan Levadüraynaq Tanta Mikuna fiesta, Semäna fiesta y Ramäda fiesta.

14 Taytan David ninqannöllami trukanakuypa aruyänanpä sacerdötikunata Salomón churarqan. Tsaynöllami levitakunatapis churarqan trukanakuypa Tayta Diosta alabayänanpä y sacerdötikunata cada junaq yanapayänanpä. Templu punkukunacho trukanakuypa täpayänanpämi punku täpaqkunatapis churarqan. Llapantapis tsaynö churarqan Tayta Diospa sirviqnin David ninqannöllami.

15 Tsaymi rey David ninqannölla sacerdötikunapis, levitakunapis y tesöruta churaränan cuartukunata täpaqkunapis llapanta rurayarqan. 16 Templupa cimientunta ruratsir qallaykunqanpita templuta shäritsiyta ushanqanyaqmi llapantapis rurananpä kanqantanölla Salomón ruratsirqan. Tsaynöpami Tayta Diospa templun kuyayllapä karqan.

17 Tsaypitanami Salomón aywarqan Ezión-geber markaman y Elot markaman büquikunata ruratsinanpä. Tsay markakunaqa kaykäyan Edom nacioncho kaykaq lamar kuchunchömi. 18 Payta yanapayänanpämi rey Hiram tsayman kacharqan büquikunata y büqui manijay yachaq capitankunata. Tsaynöpami tsay runakuna Salomónpa capitanninkunawan juntu lamarpa aywarnin Ofirman chäyarqan. Ofirpitanami Salomónpä apayämurqan chunka pitsqa waranqa (15,000) kïlu qorita.