Salomónta Tayta Dios awninqan
9
Yarpanqannömi Salomónqa Tayta Diospa templunta, rey täkunan palaciuta y llapantapis munanqan kaqta shäritsir usharqan. 2 Tsaypitanami Gabaóncho yuripanqannö† Salomónta yapay Tayta Dios yuripar 3 nirqan: “Wiyashqämi ñöpächo rugakamar mañakamanqaykita. Shäritsinqayki templucho imayyaqpis adorayämänanpämi chaskishqä. Imapis mana päsananpämi tsay templuta imaypis rikashä.4 “Qampis taytayki Davidnö llapan shonquykiwan noqata cäsukamar jutsata mana ruraypa llapan leynïkunata y mandamientükunata cumpliptikiqa 5 taytayki Davidta awninqänöllami qampita aywaraqkuna imayyaqpis Israel runakunapa mandaqnin rey kayanqa.†
6 “Qamkuna y qampita aywaraqkunapis ninqäta mana wiyakur leynïkunata y mandamientükunata mana cäsukurnin juk dioskunata adorayaptikiqa 7 rikatsinqä nacionpita qarquyäshaykimi. Adorayämänaykipä chaskinqä templutapis kacharishämi. Qamkunata castigaptïmi juklä nacioncho taq runakunapis kushipäyäshurniki penqakuyman churayäshunki. 8 Kay templu raqällana kaykaqta rikaykurmi runakuna mantsarirnin niyanqa: ‘¡Imanirrä kay nación runakunata y kay templutapis Tayta Dios ushakätsishqa!’† 9 Tsaymi niyanqa: ‘Yärakuyanqan Tayta Diosta sirviyänanpa trokin juk dioskunatana adorar sirviyanqanpitami paykunata tsaynö päsashqa. Unay castankunata Egiptupita Tayta Diosnin jipiykämuptinpis mana cäsukuyanqanpitami tsaynö castigashqa’ ”.
Rey Salomón wakin ruranqankuna
10 Tayta Diospa templunta y rey täkunan palaciuta ishkay chunka (20) watachömi Salomón shäritsiyta usharqan. 11 Templuta shäritsinanpämi cedru qeruta, ciprés qeruta y qoritapis ministinqanman tupu Tiro markapa mandaqnin rey Hiram kamariparqan. Tsaynö kamaripanqanpitami rey Salomónqa Galileacho ishkay chunka (20) markakunata entregarqan. 12 Tsaymi Hiram aywarqan Salomón entreganqan markakunata rikananpä. Gustunpänö mana kaptinmi 13 Salomónta nirqan: “Amïgu, ¿imanirtä tsay niraq markakunataqa entregamashqayki?”
Tsay markakuna mana väliyanqanta ninqanpitami tsay partita Cabula niyan. Kananyaqpis tsaynöllami tsay partikunapa jutin kaykan. 14 Salomónman Hiram apatsinqan qori karqan kimsa waranqa isqun pachak soqta chunka (3,960) kïlumi.
15 Rey Salomónqa faynatsiypami arutsirqan Tayta Diospa templunta, kikinpa palaciunta, patak kananpä Milo pirqata y Jerusalén markapa murällanta. Tsaynöllami allitsatsirqan Hazor, Meguido y Gezer markakunatapis. 16 Ñöpatami Gezer markaman chaykur Egiptupa mandaqnin rey Faraón tsaycho taq cananeo runakunata llapanta wanuskatsir wayikunatapis rupatsir usharqan. Nirkurnami Salomónwan tätsinqan warmi tsurinta tsay markata entregarqan. 17 Tsaymi Salomónqa Gezer markatapis allitsatsirqan. Tsaynöllami allitsatsirqan ura kaq Bet-horón markata, 18 Baalat markata y tsunyaq jirkacho kaykaq Tamar markatapis. 19 Tsaynöllami allitsatsirqan mikuy churakunan markakunata, guërra carrëta churakunan wayikunata y cawallun muntashqa aywaq soldädukunapa cuartelninkunatapis. Tsaynöllami llapan yarpanqanta ruratsirqan Jerusaléncho, Líbanucho y maytsaychöpis mandanqan kaqchöqa.
20 Tsay witsan Israel nacioncho taykäyarqanrämi amorreo runakuna, heteo runakuna, ferezeo runakuna, heveo runakuna y jebuseo runakunapis. Paykunaqa manami Israel runakunatsu kayarqan. 21 Tsay runakunapa unay castankunataqa Israel runakuna nacionninman yaykur manami wanutsiyarqantsu. Tsaymi tsay runakunapita aywaraqkuna Israel nacioncho kayaptinrä Salomón churarqan faenakunacho aruyänanpä. Kananyaqpis tsaynöllami paykunaqa faenakunacho aruyan. 22 Israel runakunatami itsanqa obligarqantsu faenakunacho aruyänanpä. Tsaypa trokinqa paykunata churarqan soldädukuna, autoridäkuna, mandaqkuna, capitankuna, carrëta manijaq soldädukuna y cawallun muntashqa aywaq soldädukuna kayänanpämi. 23 Salomónpa aruqninkunapa capatazninkuna karqan pitsqa pachak pitsqa chunkami (550). Paykunami faenacho aruqkunata controlayaq.
24 Faraónpa warmi tsurinmi Davidpa Markancho taykanqanpita Salomón ruratsinqan palaciuman aywarqan. Tsaycho taptinnami patak kananpä Milo pirqata Salomón ruratsirqan.
25 Templuta shäritsiyta ushanqanpitami cada watacho kimsa kuti† Salomón ruratsinqan altarcho rupatsina sacrificiukunata y alli päsakuy sacrificiukunata rupatsiyaq. Tsaynöllami inciensiutapis Tayta Diospä qoshnitsiyaq.
26 Tsaynöllami Ezión-geber markacho büquikunatapis rey Salomón ruratsirqan. Tsayqa kaykan Puka Lamarpab kuchuncho y Elatpa ñöpanchömi. Elatqa Edom nacionchömi kaykan. 27 Payta yanapayänanpämi rey Hiram tsayman kacharqan büqui manijay yachaq capitankunata. 28 Tsaynöpami tsay runakuna Salomónpa capitanninkunawan juntu lamarpa aywarnin Ofirman chäyarqan. Ofirpitanami Salomónpä apayämurqan cäsi chunka chusku waranqa (14,000) kïlu qorita.