Pactu Babulta templuman apatsinqan
8
Tsaypitanami Salomónqa Jerusalénman qayatsirqan llapan Israel mayor runakunata, trïbukunapa mandaqnin runakunata y Israel castakunacho mas respitashqa runakunatapis. Paykunata qayatsirqan Tayta Diospa Pactu Babulninta Davidpa Markancho kaykanqanpita templuman apayänanpämi.† Davidpa Markanpa jukaq jutinmi kaykan Sión. 2 Etanim killacho jatun fiestata rurayanqan junaqmia tsay qayatsinqan runakunawan Salomón qorikarqan. Etanim killaqa qanchis kaq killami karqan. 3 Llapan mayor runakuna qorikaskiyaptinmi sacerdötikuna babulta umrurkur templuman apayarqan. 4 Paykunawanmi levitakunapis tsay babulta, Tinkuna Tolduta y manëjunkunatapis apayarqan.5 Templuman chaykatsirmi babulpa puntanman rey Salomónqa llapan Israel runakunawan qorikäyarqan. Tsaychömi Tayta Diosta adorar yupaytapis mana atipaypä tsaytsika üshakunata, cabrakunata y törukunata pishtaskir altarcho rupatsiyarqan. 6 Tsaypitanami Tayta Diospa Pactu Babulninta sacerdötikuna churayarqan Lugar Santïsimucho ishkay querubinkunapa älankuna rurinman. 7 Tsay querubinkunapa älankunami babul jananpa mashtararqan. Tsaynöpami babul y puritsiyänan qerukunapis querubinkunapa älankuna rurinchöna karqan. 8 Puritsiyänan qerukuna largu karmi Lugar Santupita rikakarqan. Alarpitami itsanqa rikakarqannatsu. Tsaynöllami kananyaqpis kaykan. 9 Tsay babulchöqa Horebcho Moisés churanqan ishkay läja rumikunallami kaykarqan.† Tsay läjakunachömi qellqararqan Israel runakuna Egiptupita yarqayämunqan witsan paykunawan Tayta Dios pactu ruranqan.
10 Lugar Santupita sacerdötikuna yarquskiyaptinmi Tayta Diospa templunta pukutay tsapaskirqan. 11 Pukutay tsaynö tsapaptin y kikin Tayta Dios tsay pukutaycho kaptinmi sacerdötikunaqa ima ruraytapis mana kamäpakur yarqukuyarqan.†
Templuta Salomón bendisanqan
12 Tsaymi Tayta Diosta mañakur Salomón nirqan: “Tayta Dios, yana pukutay rurincho täkunqaykitami nishqayki. 13 Tsaynö kaptinpis kananqa templuta shäritsishqä tsaycho imayyaqpis tänaykipämi”.
14 Nirkurnami tsaycho kaykaq Israel runakunaman tikraykur bendisarnin rey Salomón 15 nirqan: “Yärakunqantsik Tayta Dios alabashqa kaykullätsun. Paymi taytä Davidta awninqankunata llapanta cumplishqa. Awnirmi nirqan: 16 ‘Kuyanqä Israel runakunata Egiptupita jipimunqä junaqpita patsa manami mañakushqätsu mayqan Israel trïbukunapa markanchöpis tänä templuta rurapäyämänanpä. Davidtami itsanqa akrashqä Israel runakunapa mandaqnin rey kananpä’.†
17 “Taytä Davidqa kuyamaqnintsik Tayta Diosta adoranantsikpä templuta ruratsiytami munarqan. 18 Tsaynö munaptinpis Tayta Diosmi nirqan: ‘Noqapä templuta shäritsiyta yarpanqayki allimi kaykan.† 19 Tsaynö kaptinpis manami qamtsu shäritsinki, sinöqa tsurikirämi noqapä templuta shäritsinqa’.†
20 “Awninqannöllami Tayta Dios cumplishqa. Tsaymi taytä Davidpa trokin Israel runakunapa mandaqnin rey kaykä. Tsaynöllami kuyamaqnintsik Tayta Diospä templuta shäritsishqä. 21 Tsaymanmi Tayta Diospa Pactu Babulninta churatsishqä. Tsay babul rurinchömi qellqaraykan Egiptupita jipimur unay castantsikkunawan Tayta Dios ruranqan pactu”.
22 Tsaynö niskirmi Salomónqa Tayta Diospa altarnin ñöpanman aywar llapan Israel runakuna rikaykaptin makinta junishpa joqarirqan. 23 Nirkurmi Tayta Diosta mañakur nirqan: “Israel runakunata kuyaq Tayta Dios, ciëluchöpis ni kay patsachöpis qamnöqa manami ima diospis kantsu. Sirvishuqnikikunawan pactu ruranqaykitaqa imaypis cumplinkimi. Tsaynöpis llapan shonqunkunawan munanqaykinö kawaqkunata imaypis kuyapankimi. 24 Sirvishuqniki taytä Davidta llapan awninqaykita cumplirmi templuykita shäritsinäpä yanapamashqayki.
25 “Israel runakunata kuyaq Tayta Dios, taytä Davidta awnirmi nirqayki: ‘Qampita aywaraqkunapis qam cumplinqaykinö mandamientükunata cumpliptinqa Israel runakunapa mandaqnin reykuna kayänanpämi imaypis churashä’.† 26 Taytay, tsay awninqaykita imaypis cumpliykullay.
27 “¿Rasunpaypatsurä kay patsaman shamuykur runakuna täyanqancho tankiman? Ciëlupis tsayjinanpa jatun kaykarpis tänaykipä manami aypantsu. Tsaynö kaykaptinqa ¡imanöparä kay ruratsinqä templu aypaykunqa!† 28 Imanö kaptinpis llapan shonqüwan mañakamunqäta wiyaykallämay, Tayta Dios. Tsaynöpis kanan rugakamunqäta chaskiykallämay. 29 Kikikimi nirqayki kay templucho imaypis tänaykipä. Tsaynö kaptinqa paqaspapis junaqpapis kay templucho kaykullay mañakamunqäta imaypis wiyaykamänaykipä. 30 Mañakamuptï y kuyanqayki Israel runakuna kay templucho mañakayämushuptikipis wiyaykayällämay. Ima jutsata rurayanqäpitapis perdonta mañakayämuptï ciëlucho tanqaykipita patsa perdonaykayällämay.
31 “Pipis runa mayinpa contran ruraptin rasun kaqta musyayänanpä kay altarnikiman qayaykatsimur juratsiptin 32 ciëlupita patsa wiyaykallämunki. Nirkur jutsayuq kaqta castigarpis jutsaynaq kaqtaqa ama castigaykullankitsu.
33 “Kuyanqayki Israel runakuna jutsata rurayanqanpita contrankuna vincir nacionninman apakuyaptin kay templumanpa rikaykamur perdonta mañakur alabayäshuptikiqa 34 ciëlupita patsa wiyaykallämunki. Paykunata perdonar unay castäkunata rikatsinqayki nacionman kutiykatsillämunki.
35 “Jutsata rurayanqanpita pasaypa usyawan castigaptiki kay templumanpa rikaykamur perdonta mañakur alabayäshuptikiqa 36 ciëlupita patsa wiyamur kuyanqayki Israel casta sirvishuqnikikunata perdonaykullanki. Nirkur tantiyaykatsillanki cäsukuyäshurniki shumaq kawayänanpä. Tsaynöpis rikatsinqayki chakrakunaman tamyaykatsillämunki.
37 “Taytay, kay nacioncho muchuy kaptin, pesti kaptin, usyawan llapan tsakiptin, mikuyta rancha ushaptin, chukllushkuna o shiwrikuna ushaptin, mayqan markatapis contrankuna jiruruypa tsapar atacaptin, o ima desgraciapis o qeshyapis tsariptin kuyapaykullanki. 38 Kuyanqayki Israel runakuna mayqanpis jutsayuq kayanqanta tantiyar kay templumanpa makinkunata joqarkur mañakayämushuptiki 39 ciëlucho tanqaykipita patsa wiyar perdonaykullanki. Taytay, qamqa musyankimi runa imata yarpanqantapis. Imanöpis kawayanqanman tupu yanapaykullanki. 40 Tsaynö yanapanqaykita tantiyarmi unay castäkunata rikatsinqayki nacioncho imaypis mantsapakuyäshunki.
41 “Tsaynöllami kuyapäkuq Tayta Dios kanqaykita musyar juklä nacioncho taq mana Israel runakunapis kay nacionman shayämunqa. 42 Paykunapis musyayanqami llapanpä munayyuq Dios kanqaykita y imapis qampä aja mana kanqanta. Kay templumanpa rikaykamur mañakushuptiki 43 ciëlupita patsa wiyamur yanapaykullanki. Tsaynö yanapaykunki kay patsacho llapan nación runakunapis kuyanqayki Israel runakunanö mantsapakuyäshunaykipä. Tsaynöllami paykunapis tantiyayanqa kay shäritsinqä templucho qamta adorayäshunqaykita.
44 “Kuyanqayki Israel runakuna contrankunawan pelyayänanpä maypapis kachaptiki kay akranqayki markamanpa y qampä shäritsinqä templumanpa rikaykamur mañakayämuptin 45 ciëlupita patsa wiyamur yanapaykullanki.
46 “Taytay, llapan runakunapis jutsa ruraqllami kaykäyan. Tsaynö kar kuyanqayki Israel runakuna jutsata rurayaptin imaptinqa pasaypa ajanarnin capaz manana yanapankinatsu. Tsaynö kaptin contrankuna shamurnin capazchi nacionninman apakuyanqa cercaman o karuman karpis. 47 Tsaycho kar capazchi cuentata qokur ‘jutsata rurarmi qamta cäsukuyashqätsu’ nir perdonta mañakayämushunki. 48 Tsaynöpis capazchi contran runakunapa markancho kar llapan shonqunkunawan yärakamur mañakayämushunki. Unay castäkunata rikatsinqayki nacionmanpa rikaykamur, kay akranqayki markamanpa rikaykamur y qampä ruratsinqä templumanpa rikaykamur mañakayämuptin 49 taykanqayki ciëlupita patsa wiyamur yanapaykullanki. 50 Kuyanqayki Israel runakuna jutsata rurayanqanpita perdonaykullanki. Tsaynöpis munaynincho tsararaq runakunata tantiyaykatsillanki Israel runakunata kuyapäyänanpä. 51 Kuyanqayki runakuna kaykaptinqa tsaynö yanapaykullanki. Egiptucho pasaypa ñakaptinmi kuyaparnin jipimurqayki.†
52 “Taytay, noqa mañakamunqäta y Israel runakuna mañakayämunqantapis llapanta wiyaykayämay. Tsaynö wiyaykallämanki imay höra mañakamuptïpis. 53 Unay castäkunata Egiptupita jipimunqayki witsanmi sirvishuqniki Moiséswan musyatsirqayki Israel runakunata kuyar akranqaykita. Tsaynöllami paywan musyatsirqayki juk nacionta akranaykipa trokin Israel nación runakunata akranqaykita. Tsaymi Israel runakunaqa qampa herenciayki kayan”.
54 Tayta Diospa altarnin ñöpancho makinta joqarkur Salomón mañakuyta ushaskirmi qonquriraykanqanpita shärirqan. 55 Nirkurmi Israel runakunata bendisarnin jinchi nirqan: 56 “Tayta Dios alabashqa kaykullätsun awninqannölla Israel runakunata alli kawananpä yanapanqanpita. Moisés willakunqannöllami llapan awnimanqantsikkunata cumplishqa.† 57 Unay castantsikkunata mana kachaypa yanapanqannölla noqantsiktapis Tayta Diosnintsik mana kachaypa imaypis yanapaykallämäshun. 58 Tsaynölla alli yarpayta y alli tantiyayta qoykallämäshun unay castantsikkuna chaskinqan mandamientunkunata, estatütunkunata y leyninkunata cumplir pay munanqannö kawanantsikpä.
59 “Kanan mañakunqäta paqaspapis junaqpapis Tayta Diosnintsik imaypis yarparaykullätsun. Tsaynöpami noqatapis y qamkunatapis mana kachaypa yanapamäshun. 60 Tsaynö yanapamashqami maytsay nacioncho taq runakuna musyayanqa Tayta Dios japallan munayyuq kanqanta y paypita mas juk dios mana kanqanta. 61 Kanan junaqmi llapantsik awniykantsik llapan shonquntsikwan Tayta Diosnintsik ninqankunata wiyakur leyninkunata, mandamientunkunata cumplir kawanantsikpä. Kanan junaq awninqantsiknölla imaypis cumplishun”.
62 Tsaypitanami rey Salomón y llapan Israel runakuna Tayta Diospä sacrificiukunata rupatsiyarqan. 63 Tsaymi alli päsakuy sacrificiupä rupatsiyarqan ishkay chunka ishkay waranqa (22,000) törukunata y juk pachak ishkay chunka waranqa (120,000) üshakunatawan cabrakunata. Tsaynömi Tayta Diospä shäritsinqan templuta llapan Israel runakunawan Salomón bendisayarqan.
64 Rupatsina kaq sacrificiukuna, tsaki mikuy ofrendakuna y alli päsakuy sacrificiukuna tsaytsika kaptinmi Tayta Diospa ñöpancho bronci altar ayparqantsu rupatsiyänanpä. Tsaymi templupa patiun chawpintapis Salomón tsay junaqlla bendisarqan tsay pampacho rupatsiyänanpä.
65 Altarta bendisayänanpämi llapan Israel runakunawan Tayta Diosnintsikpa ñöpancho Salomón qanchis junaq fiestata rurayarqan. Tsay fiestamanmi llapan Israel nación markakunapita shayämurqan. Bendisayänan fiestata usharkurnami qanchis junaq mastapis Ramäda fiestata rurayarqan. Tsaywanqa chunka chusku junaqmi fiestakuyarqan. 66 Fiesta ushaskiptin runakuna kutikuyänanpä rey Salomón despachaptinmi agradëcikurnin kushishqa wayinkunapa kutikuyarqan. Tsaynöpis Tayta Diostami agradëcikuyarqan sirviqnin Davidta y kuyanqan Israel runakunata yanapanqanpita.