5
Tayta Diospa templunta ruratsiyta Salomón ushaskirnami templupa manëjunkunata tsayman churayänanpä apatsirqan.† Tsay manëjukunataqa Salomón ruratsirqan taytan David Tayta Diospä kamarinqan qoripita y qellaypitami.Babulta templuman apayanqan
2 Tsaypitanami Salomónqa Jerusalénman qayatsirqan llapan Israel mayor runakunata, trïbukunapa mandaqnin runakunata y Israel castakunacho mas respitashqa runakunatapis. Paykunata qayatsirqan Tayta Diospa Pactu Babulninta Davidpa Markancho kaykanqanpita templuman apayänanpämi.† Davidpa Markanpa jukaq jutinmi kaykan Sión. 3 Qanchis kaq killacho jatun fiestata rurayanqan junaqmi† tsay qayatsinqan runakunawan Salomón qorikarqan.
4 Llapan mayor runakuna qorikaskiyaptinmi levitakuna babulta umrurkur templuman apayarqan. 5 Paykunawanmi sacerdötikunapis tsay babulta, Tinkuna Tolduta y manëjunkunatapis apayarqan.
6 Templuman chaykatsirmi babulpa puntanman rey Salomónqa llapan Israel runakunawan qorikäyarqan. Tsaychömi Tayta Diosta adorar yupaytapis mana atipaypä tsaytsika üshakunata, cabrakunata y törukunata pishtaskir altarcho rupatsiyarqan.
7 Tsaypitanami Tayta Diospa Pactu Babulninta sacerdötikuna churayarqan Lugar Santïsimucho ishkay querubinkunapa älankuna rurinman. 8 Tsay querubinkunapa älankunami babul jananpa mashtararqan. Tsaynöpami babul y puritsiyänan qerukunapis querubinkunapa älankuna rurinchöna karqan. 9 Puritsiyänan qerukuna largu karmi Lugar Santupita rikakarqan. Alarpitami itsanqa rikakarqannatsu. Tsaynöllami kananyaqpis kaykan. 10 Tsay babulchöqa Horebcho Moisés churanqan ishkay läja rumikunallami kaykarqan.† Tsay läjakunachömi qellqararqan Israel runakuna Egiptupita yarqayämunqan witsan paykunawan Tayta Dios pactu ruranqan.
11 Lugar Santïsimuman babulta churaykurmi sacerdötikuna yarqukuyarqan. Tsaycho kaykaq sacerdötikunaqa turnun mana töcaykaptinpis purificakushqami kayarqan. 12 Leví trïbu cantaq runakunami altarman rupay yarqamunan kaqlächo ichiraykäyarqan lïnupita rurashqa latsapan jatishqa y platïllunkuna, salteriunkuna, arpankuna, aptashqa. Paykunaqa kayarqan Asaf, Hemán, Jedutún, tsurinkuna y castankuna. Paykunawan juntumi kayarqan cornëta tukaq juk pachak ishkay chunka (120) sacerdötikunapis.
13 Tsaymi cornëtata, platïllukunata y wakin instrumentukunatapis tukayaptin cantaqkuna Tayta Diosta agradëcikur alabayarqan:
“¡Tayta Diosqa allillata ruraqmi!
¡Kuyakuq kayninqa imaypis manami ushakantsu!”†