Templupa manëjunkunata ruratsinqan
4
Tsaynöllami bronci altartapis Salomón ruratsirqan.† Tsay altarpa largunmi karqan isqun metru, anchun isqun metru y altun chusku metru pullan.2 Tsaynöpis yakuta qoriyänanpämi ruratsirqan broncipita fundiypa lamar niyanqan jatusaq redondu lavatoriuta. Tsay lavatoriupa anchunmi karqan chusku metru pullan. Altunnami karqan ishkay metru y 25 centïmetru. Kuchunta tumaypa tupuptinmi karqan chunka kimsa metru pullan (13.5). 3 Lavatoriupa shimin jawanpanami ishkay fïla tumaypa broncipita rurashqa törukuna karqan. Cada pullan metruchömi chunka törukuna karqan. Tsay törukunaqa lavatoriuwan juk piëzallami karqan.
4 Tsay lavatoriutami jamatsirqan chunka ishkay broncipita rurashqa törukuna jananman. Kimsa törukunami rikaräyarqan rupay yarqamunan kaqläpa, kimsa rupay jeqanan kaqläpa, kimsa norti kaqläpa y kimsa sur kaqläpa. Tsay törukunaqa llapanpis sikipurami kayarqan. Lavatoriunami törukunapa janancho jamararqan.
5 Tsay lavatoriuqa puwaq centïmetru raktami karqan. Shiminqa liriu wayta pashtaraykaq niraqmi karqan. Tsay lavatoriumanqa yaykuq soqta chunka soqta waranqa (66,000) litru yakumi.
6 Tsaynöllami broncipita ruratsirqan chunka taksha lavatoriukunatapis.† Tsay lavatoriukunacho kaykaq yakuwanmi sacrificiukunata rupatsiyänanpä llapanta mayllayaq. Pitsqa lavatoriukunami churaräyarqan altarpa derëcha kaq ñöpanpa y pitsqa kaqnami churaräyarqan altarpa itsuq kaq ñöpanpa. Jatun lavatoriucho wiñaraq yakuwanmi itsanqa sacerdötikunalla mayllakuyaq.
7 David yätsinqannöllami chunka candelabrukunatapis qoripita ruraskatsir† templuman churatsirqan. Pitsqa kaqtami churatsirqan derëcha kaqläman y pitsqa kaqtanami churatsirqan itsuq kaqläman.
8 Tsaynöllami chunka mësakunata† ruraskatsir templuman churatsirqan, pitsqa kaqta derëcha kaqläman y pitsqa kaqtana itsuq kaqläman.
Tsaynöllami juk pachak (100) tazonkunatapis qoripita ruratsirqan.
9 Juk patiutanami ruratsirqan sacerdötikuna qorikäyänanpä y juk mas jatun patiutanami ruratsirqan común runakuna qorikäyänanpä. Cada patiupa punkuntami bronciwan laqatsirqan.
10 Tsay jatun lavatoriutanami churatsirqan templupa derëcha kaq esquïnanman. Tsay esquïnaqa rupay yarqamunan kaqläpami karqan. 11 Tsaynöllami Hiram rurarqan mankakunata, tenäzakunata y tazonkunata.
Salomón minkakunqannöllami Hiramqa Tayta Diospa templuncho kananpä llapanta rurarqan. 12 Tsay ruranqankunami karqan:
ishkay paradorkuna,
paradorkunapa puntancho adornunkuna,
paradorkunapa cada adornuncho tukupa ñawinnö rurashqa ishkay adornukuna,
13 tsay adornupita warkaraq chusku pachak (400) granädakuna (tsay granädakunata rurarqan ishkay fïla warkaränanpämi),
14 chunka carrëtakuna,
carrëtakunapä chunka lavatoriukuna,
15 chunka ishkay törukuna,
törukuna jananman jamananpä lamar niyanqan jatun lavatoriu,
16 mankakuna,
pälakuna
y jatun tenedorkunapis.
Llapan tsaykunatami Tayta Diospa wayinpä rey Salomón ninqannölla broncipita chipipiqtarä Hiram-abi rurarqan. 17 Räku mituwan moldita ruraykurmi tsaykunata fundirqan Sucot y Saretán markakuna tinkuqcho. Tsayqa Jordán mayu ñöpan pampachömi karqan. 18 Broncipita ruranqan atska manëjukuna kaptinmi ayka broncita gastanqantapis Salomón pësatsirqannatsu.
19 Tsaynöllami Tayta Diospa templunman churayänanpä wakin manëjukunatapis Salomón ruratsirqan. Tsay manëjukunami karqan:
qoripita altar,
tanta churakuna qoripita mësakuna,
20 qoripita rurashqa candelabrukuna (tsay candelabrukunatami Lugar Santïsimupa frentinman churatsirqan David yätsinqannö tsaritsiyänanpä),
21 wayta niraq adornukuna,
mechërukuna,
qoripita rurashqa tenäzakuna,
22 mëchapa lliptanta jipinanpä taksha alicätikuna,
tazonkuna,
wishllakuna,
inciensiu qoshnitsikuna,
Lugar Santïsimuman yaykuna punkupa bisagrankuna
y templu punkupa bisagrankunapis.
Llapan tsaykunaqa qoripita rurashqami karqan.