2 Juk wayinpa jutinmi karqan Líbano Munti. Tsay wayinpa largunmi karqan chusku chunka pitsqa (45) metru, anchunna karqan ishkay chunka ishkay metru pullan (22.5), altunnami karqan chunka kimsa metru pullan (13.5). Cedrupita rurashqa vïgakunata chusku fïla paradorkunami tukmararqan. 3 Tsay vïgakunami chusku chunka pitsqa (45) karqan. Tsaykunatami paradorkunaman churatsirqan kimsa fïlata. Tsaymi cada fïlacho chunka pitsqa vïgakuna karqan. Nirkurmi cedru tablakunawan vïga rurinpa entablatsirqan. 4 Tsaynöllami kimsa hilëra ventänakunatapis frenti frenti kananpä ruratsirqan. Cada hilëracho kimsa ventänakunami karqan. 5 Llapan punkukunapis y ventänakunapis kimsa fïla frenti frenti cuadrädumi karqan.

6 Tsaynöllami juk corredortapis paradorkunallawan ruratsirqan. Tsay corredorpa largunmi karqan ishkay chunka ishkay metru pullan (22.5) y anchunna chunka kimsa metru pullan (13.5). Tsay punkupa punku yaykunanchöpis paradorkunallawanmi juk punkuta ruratsirqan.

7 Tsaynöllami demanduta arreglananpä despächunta ruratsirqan. Tsay despächunpa paredninkunatapis cedruwanmi entablatsirqan.

8 Täkunan palaciutapis despächun niraqllatami ruratsirqan. Tsay palaciuqa patiuyuqmi karqan. Tsaynöllami Faraónpa tsurinwan^† tanqan warmipäpis palaciuta patiuyuqta shäritsirqan.

9 Llapan tsaykunataqa alli rumikunallawanmi Salomón shäritsirqan cimientupita hasta pared ushanqanyaq y jatun patiuyaq. Tsay rumikuna kamakänanpämi tinku tinkuykatsir llapan lädunpa shumaq llaqllayarqan.

10 Wayikunapa, corredorpa y despächupa cimientunkunapis jatusaq alli rumikunallawan pirqashqami karqan. Tsay rumikuna wakinqa karqan chusku metru pullan y wakinnami kimsa metru y 60 centïmetru.

11 Llapan paredtapis pirqatsirqan tupu tupuykur llaqllashqa alli rumikunallawanmi. Tsay rumikuna jananmanmi cedru qerukunata churatsirqan. 12 Entëru kuchunpa tumaypami jatun patiuta kimsa hilëra rumikunawan y juk hilëra cedru tablakunawan corralatsirqan. Tsay corralatsinqan paredkunaqa templupa ruri kaq patiunta corralatsinqan paredkunanömi karqan. Tsaynöllami templuman yaykuna punkupa paredninkunanö karqan.

13 Rey Salomónmi Tiro markacho taq Hiramta qayatsirqan arupänanpä. 14 Hirammi Neftalí trïbu viüdapa wawan karqan. Hirampa taytan Tiro markapita bronci fundiyta yachaq runami karqan. Tsaymi Hiramqa broncipita imatapis shumaq ruraq. Rey Salomón qayatsiptinmi pay kaqman aywaykur rurananpä ninqankunata ushaypa ushar rurarqan.

15 Hiramqa ishkay jatusaq paradorkunatami broncipita fundirqan. Tsay paradorkunami karqan puwaq metru largun y tumaypa tupuptinmi karqan pitsqa metru pullan. 16 Tsaynöllami parador jananman churananpäpis broncipita adornukunata rurarqan. Tsay adornukunapa altunmi karqan ishkay metru juk cuarta.

17 Cada paradorpa adornunman churananpämi qanchis cadënakunata rurarqan. Tsay cadënakunaqa tukupa ñawinnömi karqan. 18 Tsaynöllami paradorkunapa adornuncho warkaränanpä granäda frütakunatanö ishkay fïlata rurarqan. 19 Paradorkuna janancho adornukunaqa liriu wayta niraqmi karqan. Tsay adornukunapa tamäñun ishkay metrunömi karqan. 20 Tsaynöpis cada adornupa jana puntanchömi entëru kuchunpa ishkay pachak (200) granädakunatanö ishkay fïlata rurarqan. Tsaykuna cadëna ñöpancho karmi adornupa anchun kaq particho warkararqan.

21 Tsay paradorkunatami templu punkuman ichiykatsir derëcha kaqlächo kaqta Hiram jutitsirqan Jaquín jutin kananpä y itsuq kaqlächo kaqtana jutitsirqan Boaz jutin kananpä.^a 22 Paradorkunapa adornunkunami liriu wayta pashtaraykaqnö karqan. Tsaynömi paradorkunata rurayta usharqan.

23 Tsaynöpis yakuta qoriyänanpämi Hiram rurarqan broncipita fundiypa lamar niyanqan jatusaq redondu lavatoriuta. Tsay lavatoriupa anchunmi karqan chusku metru pullan. Altunnami karqan ishkay metru ishkay chunka pitsqa (25) centïmetru. Kuchunta tumaypa tupuptinmi karqan chunka kimsa metru pullan (13.5). 24 Lavatoriupa shimin jawanpanami ishkay fïla tumaypa broncipita rurashqa calabäsukuna karqan. Cada pullan metruchömi chunka calabäsukuna karqan. Tsay calabäsukunaqa lavatoriuwan juk piëzallami karqan.

25 Tsay lavatoriutami jamatsirqan chunka ishkay broncipita rurashqa törukuna jananman. Kimsa törukunami rikaräyarqan rupay yarqamunan kaqläpa, kimsa rupay jeqanan kaqläpa, kimsa norti kaqläpa y kimsa sur kaqläpa. Tsay törukunaqa llapanpis sikipurami kayarqan. Lavatoriunami törukunapa janancho jamararqan.

26 Tsay lavatoriuqa puwaq centïmetru raktami karqan. Shiminqa liriu wayta pashtaraykaq niraqmi karqan. Tsay lavatoriumanqa yaykuq chusku chunka chusku waranqa (44,000) litru yakumi.

27 Tsaynöpis broncipitami rurarqan chunka carrëtakunata. Carrëtakunapa largun y anchun karqan ishkay metru 80 centïmetru y altunnami karqan juk metru 35 centïmetru. 28 Tsay carrëtakunata rurananpämi marcuta ruraskir ñöpankunapa traviskunata churarqan. 29 Carrëtakunapa chuskun ñöpanpami leonkunata, törukunata y querubinkunata rurarqan. Tsay törukuna y leonkuna jananpa y jawanpami waytakunata rurarqan.

30 Cada carrëtapami broncipita rurashqa chusku ruëdankuna karqan. Ruëdankunapa ëjinkunapis broncipitami karqan. Carrëtakunapa chuskun esquïnanchömi tïnapa chakinkuna karqan. Chakinkunapa ñöpankunachömi waytakunata rurarqan.

31 Carrëtapa shiminpis tïna mana tikwakänanpämi karqan. Tsay shiminmi carrëtapita yarqurarqan chusku chunka pitsqa (45) centïmetru. Tsaynöllami shiminpis ruyru karqan. Carrëtapa altunmi karqan soqta chunka puwaq (68) centïmetru. Shimincho tumaypami dibüjukuna karqan. Itsanqa carrëtapa ñöpankuna manami ruyrutsu karqan, sinöqa cuadrädumi.

32 Chuskun ruëdankunaqa ëjimanmi sigurararqan. Ëjinkunaqa carrëtawan tsay piëzallami karqan. Cada ruëdapa altunmi 68 centïmetru karqan. 33 Ruëdankunapis carrëtapa ruëdannömi ëjiyuq, äruyuq, räyuyuq y cübuyuq karqan. Llapanpis broncipita fundishqami karqan.

34 Chuskun esquïnancho rinrinkunapis carrëtawan tsay piëzallami karqan. 35 Carrëtapa janancho kaq rebëtinqa ishkay chunka ishkay (22) centïmetru altumi tumaypa ruyru yarqurarqan. Rebëtinpis cajonninpis tsay piëzallami karqan. 36 Tsay cajonpa tablërunkunamanmi Hiramqa jäkuraqninman dibujarqan querubinkunata, leonkunata y palmakunata. Tsaynöllami waytakunatapis tumaypa rurarqan. 37 Tsay chunka carrëtakunataqa tsay tamäñullata y tsay niraqllatami fundiypa rurarqan.

38 Tsaynöllami rurarqan broncipita chunka lavatoriukunatapis. Cada tïnapa tamäñunmi juk metru mas puwaq chunka (80) centïmetru karqan. Cada tïnamanmi yaykuq puwaq pachak puwaq chunka (880) litru yaku. Tsay lavatoriukunatami jamatsirqan ruratsinqan carrëtakunaman. 39 Nirkurmi pitsqa carrëtakunata churarqan templupa derëcha kaqläninman y pitsqa carrëtakunatanami churarqan templupa itsuq kaqläninman. Tsaynöllami lamar niyanqan jatun lavatoriuta templupa derëcha kaqläninman churarqan. Llapanpis rupay yarqamunan kaqlächömi karqan. 40 Tsaynöllami Hiram rurarqan mankakunata, tenäzakunata y tazonkunata.

Salomón minkakunqannöllami Hiramqa Tayta Diospa templuncho kananpä llapanta rurarqan. 41 Tsay ruranqankunami karqan:

Llapan tsaykunatami Hiramqa Tayta Diospa wayinpä rey Salomón ninqannölla broncipita chipipiqtarä rurarqan. 46 Räku mituwan moldita ruraykurmi tsaykunata fundirqan Sucot y Saretán markakuna tinkuqcho. Tsayqa Jordán mayu ñöpan pampachömi karqan. 47 Broncipita tsaytsika manëjukunata ruratsirmi ayka broncita gastanqantapis Salomón pësatsirqannatsu.

48 Tsaynöllami Tayta Diospa templunman churayänanpä wakin manëjukunatapis Salomón ruratsirqan. Tsay manëjukunami karqan:

Llapan tsaykunaqa qoripita rurashqami karqan.

51 Tayta Diospa templunta ruratsiyta ushaskirnami templupa manëjunkunata tsayman churayänanpä Salomón apatsirqan. Tsay manëjukunataqa ruratsirqan taytan David Tayta Diospä kamarinqan qoripita y qellaypitami.