Templuta Salomón shäritsinqan
3
Jerusaléncho kaykaq Moriah jirkanchömi† Tayta Diospa templunta rey Salomón shäritsirqan. Tsay jirkanchömi jebuseo runa Ornánpa ëran karqan.† Tsay ëracho Tayta Dios yuripanqanpitami templuta tsaycho shäritsinanpä rey David rantirqan. 2 Salomónmi chusku wata rey kaykar ishkay kaq killacho y ishkay kaq junaqcho templuta arutsir qallaykurqan.3 Templuta ruratsirqan ishkay chunka qanchis (27) metru larguta y anchuntana ruratsirqan isqun metruta.
4 Templupa anchun isqun metru kanqannöllami templu yaykuna kaqläpa kaykaq punkunpapis anchun isqun metru karqan. Tsaynöllami altunpis isqun metru karqan. Punkutami qoriwan chipyaq laqatsirqan.
5 Templupa jatun kaq cuartuntanami entablatsirqan ciprés tablakunawan. Tsay tablakuna jananpami mas allinnin kaq qoriwan laqaskatsir dibujatsirqan palmërakunata y cadënakunata. 6 Nirkurmi tsay cuartuta kuyayllapä rumikunawan adornatsirqan. Enchapatsinanpämi allinnin kaq qorita Parvaim partipita apatsimurqan. 7 Tsay qoriwanmi vïgakunata, numbralkunata, paredkunata, punkukunata y templu rurincho kaqta llapanta laqatsirqan. Paredmanmi querubinkunapa reträtuntapis dibujatsirqan.
8 Templupa rurin kaq cuartutami Lugar Santïsimu kananpä ruratsirqan.† Jatun kaq cuartupa anchun isqun metru kanqannöllami Lugar Santïsimupa anchunpis isqun metru karqan. Tsaynöllami largunpis isqun metru karqan. Lugar Santïsimuta ishkay chunka waranqa (20,000) kïlu mas allinnin kaq qoriwanmi laqatsirqan. 9 Tsaypämi qori clävukuna karqan. Cada clävumi mediu kïlu masllan lasarqan. Altuscho kaykaq cuartukunatapis qoriwanmi llapanta laqatsirqan.
10 Lugar Santïsimu rurinmanmi ishkay querubinkunata† qerupita ruraskatsir ichïtsirqan. Tsay querubinkunatapis qoriwanmi laqatsirqan. 11 Juk querubinpa älanmi pirqaman töparaykarqan y jukaq älannami jukaq querubinpa älanman töparaykarqan. Juk querubinpa älanpa puntanpita hasta jukaq querubinpa älanpa puntanyaq isqun metrumi karqan. Cada älanpa largunmi ishkay metru juk cuarta masllan karqan. 12 Jukaq querubinpa älankunapis tsay tamäñullami karqan. Tsaymi juk älan töparaykarqan jukaq pirqaman y jukaq älannami töparaykarqan jukaq querubinpa älanman. 13 Tsay querubinkunaqa punkuläpa tikrashqami ichiraykäyarqan. Juk querubinpa älanpa puntanpita hasta jukaq querubinpa älanpa puntanyaqmi isqun metru karqan.
14 Lugar Santupita Lugar Santïsimuman cortïna tsaparänanpämi awatsirqan azul, granäti y puka millwa jïluwan y llanulla putskashqa lïnu jïluwanpis. Tsay cortïnachömi bordaraykarqan querubinkuna.†
Ishkay paradorkunata ruratsinqan
15 Templupa punkuncho ichiränanpämi ishkay jatusaq paradorkunata Salomón ruratsirqan.† Cada paradorpa largunmi karqan chunka soqta metrunö. Parador puntancho kananpämi adornuntapis ruratsirqan ishkay metru juk cuarta altuta. 16 Cadënatapis tukupa ñawintanö ruraskatsirmi tsay paradorkuna puntancho kaykaq capitelkunaman warkutsirqan. Nirkurmi juk pachak (100) granäda frütakunatanö ruraskatsir cadënakunaman warkurqan.
17 Tsay paradorkunatami templu punkuman ichïtsirqan jukta derëchanman y jukaqtana itsuqninman. Derëchancho ichiraqtami jutitsirqan Jaquín jutin kananpä y itsuqnincho ichiraqtami jutitsirqan Boaz jutin kananpä.a