3 (2) Tsaypitanami Tiro nacionpa mandaqnin rey Hiramman runakunata Salomón kacharqan. Paykuna chaykurmi niyarqan: “Rey Salomónmi nin: ‘Taytä David palaciunta shäritsinanpä qeruta apatsimunqaykinö noqapäpis cedru qerukunata apaykatsillämuy. 4 (3) Tsay qerukunata ministiykä Tayta Diosnïpa wayinta shäritsinäpämi. Tsay wayichömi payta adorar mushkuq inciensiuta rupatsiyäshä y sagrädu tantatapis qaqayllanpa churayäshä. Tutapa y tardipa rupatsina kaq sacrificiutapis tsaychömi rupatsiyäshä. Tsaynöllami rupatsiyäshä jamay junaqkunacho, llullu killa fiestakunacho y Tayta Diospa wakin fiestankunachöpis. Tsay fiestakunata imaypis rurayänäpämi Tayta Dios nirqan.

5 (4) “ ‘Ima diospitapis Tayta Diosnintsik mas munayyuq kaptinmi wayintapis ruratsishä jatunta y kuyayllapäta. 6 (5) Ciëlu tsayjinanpa jatun kaykarpis Tayta Dios tänanpä mana aypaykaptinqa ¡ima tamäñutarä wayinta shäritsishä! Tsaynö kaykaptinqa noqa ¡pitä kä wayinta shäritsinäpä!^† Imanö kaptinpis ñöpancho inciensiuwan qoshnitsiyänalläpäpis shäritsishämi.

7 (6) “ ‘Tsaymi qamta rugakü imaykatapis rurayta yachaq runata kachaykamunaykipä. Payqa qoripita, qellaypita, broncipita, fiërrupita, granäti tëlapita, puka tëlapita y azul tëlapita imaykatapis rurayta yachaq katsun. Tsaynöpis katsun imaykatapis dibujayta yachaq. Tsay runami kay Judácho y Jerusaléncho kaq peonnïkunawan yanapanakur llapanta rurayanqa. Tsay peonnïkunataqa taytä Davidmi unayna minkakurqan.

8 (7) “ ‘Markaykicho taq runakuna qeru mutuyta allimi yachayan. Paykunawan Líbanupita cedru qerukunata, ciprés qerukunata y sándalo qerukunata mututsipaykallämay. Qeru mutuqkunata yanapayänanpämi peonnïkunata kachamushä. 9 (8) Tayta Diospa templun jatun y kuyayllapä kananpä kaykaptinqa atskatami qerukunata ministishä. 10 (9) Qeru mutuqkuna mikuyänanpämi apatsimushä chusku millón chusku pachak waranqa (4'400,000) kïlu trïguta, chusku millón chusku pachak waranqa kïlu cebädata, chusku pachak chusku chunka waranqa (440,000) litru vïnuta y chusku pachak chusku chunka waranqa litru olïvu aceititapis’ ”.

11 (10) Tsaynö niptinmi Tiro nacionpa mandaqnin rey Hiram Salomónman cartakur nirqan: “Israel runakunata kuyar Tayta Dios allimi churashushqayki rey kanaykipä”.

12 (11) Mastapis tsay cartanchömi rey Hiram nirqan: “Kay patsatapis ciëlutapis kamaq Tayta Dios alabashqa kaykullätsun. Israel runakunata kuyaq Dios karmi rey Davidpa tsurin kaptiki yanapaykäshunki shumaq yachaq, tantiyakuq y yarpachakuq kanaykipä. Tsaynö tantiyakuq karmi Tayta Diospa templunta y kikikipa palaciuykitapis shumaq shäritsinki.

13 (12) “Tsaymi kanan kachaykämü Hiram-abita. Payqa imaykata rurananpäpis habilösumi. 14 (13) Paypa mamanqa Dan trïbupitami y taytannami Tiro markapita. Payqa imayka aruytapis yachanmi. Tsaymi qoripita, yuraq qellaypita, broncipita, fiërrupita, rumipita, qerupita, granäti tëlapita, azul tëlapita, lïnu tëlapita y puka tëlapita imaykatapis rurayta yachan. Munanqaykinömi imaykatapis dibujapäshunki. Taytayki David minkakunqan runakunawanmi pay arunqa.

15 (14) “Taytay, apatsimunaykipä ninqaykinölla trïguta, cebädata, olïvu aceitita y vïnutapis apaykatsillämuy. 16 (15) Aykatapis ministinqaykitami Líbanupita cedru qerukunata jipitsipämushayki. Lamar kuchunman chaykatsirmi tsay qerukunata watarkur balsatanö yakullapa Jope markayaq apatsimushä. Tsaypitanami Jerusalénman ashtatsikunki”.

17 (16) Taytan rey David censatsinqannömi Salomónpis Israel nacioncho taykaq jäpa runakunata censatsirqan. Censatsirmi musyarqan juk pachak pitsqa chunka kimsa waranqa soqta pachak (153,600) jäpa runakuna Israelcho täyanqanta. 18 (17) Tsay runakunapitami qanchis chunka waranqa (70,000) runakunata churarqan kamariyllanta ashtayänanpä, puwaq chunka waranqa (80,000) runakunatanami churarqan jallqacho rumita llaqllayänanpä y kimsa waranqa soqta pachak (3,600) runakunatanami churarqan capatazninkuna kayänanpä.