Rey Hiram y Salomón willanakuyanqan
5
(15) Tiro markapa mandaqnin rey Hirammi wiyarqan Davidpa tsurin Salomóntana rey kananpä churayanqanta. Tsaymi Davidwan yachanänakushqa kar runakunata kacharqan Salomónta felicitayänanpä. 2 (16) Felicitayaptinmi Salomónqa tsay kachakunawan Hiramman encargakur nirqan:3 (17) “Qamqa musyankimi contrankunawan pelyar taytä David Tayta Diospä templuta ruratsiyta mana kamäpakunqanta. Payqa yarparqan Tayta Dios yanapaptin llapan contrankunata vinciskirrä templuta ruratsiytami. 4 (18) Kananqa Tayta Diosnï yanapamaptinmi llapan nacionkunawanpis añawna kawaykäyä. Pipis conträ manana shäriptinmi guërrapis kannatsu. 5 (19) Tsaynöpami kananqa yarpashqä Tayta Diosnïpa templunta shäritsiyta. Templunta shäritsinäpämi taytä Davidta Tayta Dios nirqan: ‘Trokiki mandananpä tsurikita churaptïrämi templüta shäritsinqa’. 6 (20) Tsaynö kaptinqa templuta shäritsinäpä Líbano muntipita cedru qerukunata mututsipaykallämay. Qamqa musyankimi kaycho taq runakuna qeru mutuyta shumaq mana yachayanqanta. Tsaymi rugakullä arupäshuqnikikuna arupäyämaqkunata yanapaykuyällänanpä. Arupäyäshuqnikikunapa jornalnintaqa pägalläshaykimi”.
7 (21) Salomón tsaynö ninqanta willayaptinmi pasaypa kushikur Hiram nirqan: “¡Tayta Dios alabashqa kaykullätsun! ¡Paymi Davidpa tsurinta shumaq yanapashqa yachaq kananpä y Israel nacionta alli mandananpä!”
8 (22) Tsaypitanami Hiramqa Salomónta willatsir nirqan:
“Kachamunqä runakunami rugakamanqaykita willayämashqa. Kananqa mañakamanqaykinöllami cedru y ciprés qerukunata jipitsimushä. 9 (23) Arupämaqkunami Líbanupita lamar kuchunyaq qerukunata jipiyämunqa. Tsaypitanami mayyaqpis nimanqaykiyaq shinrirkur balsatanö yakullapa apatsimushä. Tsaychönami qerukunata qoritsinki. Apatsimunqä qerukunapa trokinqa mikuyta apatsimunki palaciücho taqkuna mikuyänanpä”.
10 (24) Tsaymi Hiram apatsirqan Salomón munanqan cedru y ciprés qerukunata. 11 (25) Salomónnami Hirampa palaciuncho taqkuna mikuyänanpä cada wata apatsiq chusku millón chusku pachak waranqa (4'400,000) kïlu trïguta y chusku waranqa chusku pachak (4,400) läta olïvu aceitita. 12 (26) Tayta Diosqa awninqanta cumplirmi yachaq kananpä Salomónta yanaparqan. Tsaymi Hiramwan Salomón pactuta rurayarqan imaypis mana chikinakuypa kawayänanpä.
13 (27) Rey Salomón qayatsiptinmi llapan Israel nacionpita kimsa chunka waranqa (30,000) runakuna qorikäyarqan. 14 (28) Tsay runakunatami kimsa grüpuman rakiskir cada killa juk grüputa Líbanucho aruyänanpä kacharqan. Juk killa aruskirmi wayinkunaman kutiyarqan ishkay killa jamapäyänanpä. Faenacho aruqkunapa capatazninmi Adoniram karqan.
15 (29) Tsaynöllami Salomónpa aruqninkuna kayarqan qanchis chunka waranqa (70,000) karqa ashtaqkuna y puwaq chunka waranqa (80,000) rumi llaqllaqkuna. 16 (30) Runakunata arutsiyänanpänami kimsa waranqa kimsa pachak (3,300) capatazkuna kayarqan. 17 (31) Aruqkunata rey Salomón mandaptinmi jatusaq allinnin rumikunata ashtaskamur templupa cimientunpä llaqllayarqan. 18 (32) Tsaynöllami Gebal marka runakunapis Salomónpa aruqninkunata y Hirampa aruqninkunata qeru mutuycho y rumi llaqllaycho yanapayarqan.