Salomónpa yanapaqninkuna mayqankuna kayanqanpis
4
Salomónqa llapan Israel runakunapa mandaqnin reymi karqan. 2 Paypa yanapaqninkuna kaykunami kayarqan:Sadocpa tsurin Azaríasmi sacerdöti karqan.
3 Sisapa tsurinkuna Elihorefwan Ahíasmi secretariun kayarqan.
Ahiludpa tsurin Josafatmi Israelcho ima päsanqankunatapis qellqaq karqan.
4 Joiadapa tsurin Benaíami soldädukunapa capitannin karqan.
Sadocwan Abiatarmi sacerdötikuna kayarqan.
5 Natánpa tsurin Azaríasmi gobernadorkunapa mandaqnin karqan.
Natánpa tsurin Zabudmi sacerdöti y Salomónpa yätsiqnin karqan.
6 Ahisarmi palaciucho kaqkunata imatapis cuidaq karqan.
Abdapa tsurin Adonirammi faenacho aruqkunapa capataznin karqan.
7 Entëru Israel nacionchömi Salomónpa chunka ishkay gobernadorninkuna kayarqan. Paykunami cada ünunkuna watacho juk killayaq rey Salomónpä, Salomónpa castankunapä y yanapaqninkunapä mikuyta kamaripäyaq.
8 Tsay gobernadorkunaqa kaykunami kayarqan:
Ben-hurmi Efraín jallqakunacho gobernador karqan.
9 Ben-decarmi Macazcho, Saalbimcho, Bet-Semescho, Elóncho y Bet-hanáncho gobernador karqan.
10 Ben-hesedmi Arubotcho, Socucho y entëru Hefer particho gobernador karqan.
11 Ben-abinadabmi entëru Dor provinciacho gobernador karqan. Paypa warminmi karqan Salomónpa tsurin Tafat.
12 Ahiludpa tsurin Baanami Taanaccho, Meguiducho y entëru Bet-seáncho gobernador karqan. Bet-seán Saretán cercancho y Jezreelpa uraläninchömi karqan. Tsaynöllami gobernador karqan Bet-seánpita hasta Abel-meholayaq y Jocmeam washaqninyaq.
13 Ben-gebermi Galaadcho kaykaq Ramotcho gobernador karqan. Paypa munayninchömi karqan Manaséspa tsurin Jair shäritsinqan markakuna. Tsay markakunapis Galaadchömi karqan. Tsaynöllami Basáncho Argob provinciapis paypa munaynincho karqan. Tsaychömi soqta chunka (60) corralashqa jatusaq markakuna karqan. Tsay markakunaman yaykuna punkunkunapa trancankunami broncipita rurashqa karqan.
14 Iddupa tsurin Ahinadabmi Mahanaimcho gobernador karqan.
15 Ahimaasmi Neftalícho gobernador karqan. Paypa warminmi karqan Salomónpa tsurin Basemat.
16 Husaipa tsurin Baanami Asercho y Alotcho gobernador karqan.
17 Parúapa tsurin Josafatmi Isacar particho gobernador karqan.
18 Elapa tsurin Simeimi Benjamín particho gobernador karqan.
19 Uripa tsurin Gebermi Galaad particho gobernador karqan. Galaad partitaqa amorreo runakunapa mandaqnin rey Sehón y Basáncho rey Ogmi munaynincho unay tsarararqan.
Tsay llapan gobernadorkunapa mandaqninmi juk gobernador karqan.
Salomón imaykayuq y yachaq kanqan
20 Judácho y Israelcho taq runakunaqa lamar kuchuncho aqushanörämi yupaytapis mana atipaypä kayarqan. Atskaq kayaptinpis mikuyänanpäwan upuyänanpä manami pishiqtsu. Tsaynöpami llapanpis kushishqa kawayaq. 21 (5.1) Salomónpa munayninchömi karqan Éufrates mayupita hasta Filistea nacionpa lindërunyaq y Egipto nacionpa lindërunyaq.† Tsaycho taq runakuna llapanmi impuestuta pägayaq. Salomón kawanqanyaqqa llapanpis tsay runakuna paypa munayninchömi kayarqan.
22 (5.2) Salomónpäqa cada junaqmi mikuyta qoriyaq soqta waranqa soqta pachak (6,600) kïlu allinnin kaq jarinata, chunka kimsa waranqa ishkay pachak (13,200) kïlu corrienti kaq jarinata, 23 (5.3) cëbashqa chunka törukunata, qewallacho wätashqa ishkay chunka (20) törukunata y juk pachak (100) üshakunata. Tsaynöpis qoriyaq tukuy casta lluytsukunata, wera wallpakunata y wera pätukunatapis.
24 (5.4) Éufrates mayupita rupay jeqanan kaqläpaqa Salomónmi mandarqan Tifsapita hasta Gazayaq. Tsaycho reykunaqa llapanpis Salomónpa munayninchömi kayarqan. Tsaynöpami pay mandanqan kaqkunachöqa ima guërrapis karqantsu. 25 (5.5) Salomón kawanqanyaqqa Judácho y Israelcho taq runakuna Danpita Beersebayaq kushishqami kawayarqan. Tsaymi üva y hïgus jachakunapa chakinkunacho tranquïlu jamayarqan.
26 (5.6) Salomónpa carrëtankunata sutaq chusku waranqa (4,000) cawallukunapäpis ramädakuna karqanmi. Cawallukunata muntaraq soldädukunapis chunka ishkay waranqami (12,000) kayarqan.† 27 (5.7) Mana qonqaypami rey Salomónpä y paypa mësancho mikuqkunapäpis gobernadorkuna töcanqan killa trukanakuypa mikuyta apayaq. Tsaymi imapis pishiqtsu. 28 (5.8) Tsaynömi turnun chämuptin carrëtata sutaq cawallukunapä y wakin cawallukunapäpis cebädatawan päjata apayaq.
29 (5.9) Tayta Diosmi Salomónta yachayta qararqan shumaq tantiyakuq kananpä. Tsaymi aja tantiyay kaqkunatapis payqa tantiyaskiq. 30 (5.10) Salomónqa mas yachaqmi karqan Egiptucho yachaq runakunapita y rupay yarqamunanlächo taq yachaq runakunapitapis. 31 (5.11) Pïmay runapitapis mas yachaq kaptinmi Etánpis payman tinkurqantsu. Etánqa Zerapita aywaraqmi karqan. Tsaynöllami mas yachaq karqan Maholpa tsurinkuna Hemánpita, Calcolpita y Dardapitapis. Pïmaypitapis mas yachaq kanqanqa maytsaychöpis musyakarqanmi.
32 (5.12) Kimsa waranqa (3,000) proverbiukunatamia Salomón qellqarqan.† Tsaynöllami juk waranqa pitsqa (1,005) poesíakunatapis qellqarqan. 33 (5.13) Paymi tukuyläya jachakuna imanö kanqantapis tantiyarqan. Tsaymi Líbanucho kaq jatusaq cedru qerukunapä y pirqakunacho wiñamuq qewakunapäpis alli yachatsirqan. Tsaynöllami yachatsirqan tukuy casta uywakunapä, pajaqkunapä, qarachaypa y lätaypa puriqkunapä y pescädukunapäpis. 34 (5.14) Salomón pasaypa yachaq kanqanta musyaskirmi maytsay nacionkunapita runakuna shayämuq yachaq kayninta wiyayänanpä.