2 Tayta Diospä rey Salomón shäritsinqan templupa largunmi ishkay chunka qanchis (27) metru karqan. Anchunnami isqun metru karqan y altunnami chunka kimsa pullan (13.5) metru karqan. 3 Templupa anchunnöllami alarninpa largunpis isqun metru karqan. Anchunnami chusku metru pullan karqan. 4 Salomónqa templupa ventänankunatapis rejïllayuqtami ruratsirqan.

5 Tsaynöpis templuman laqayllapami cuartukunata tumaypa ruratsirqan. 6 Tsay cuartukunaqa ishkay altusyuqmi karqan. Patsa kaq cuartukunapa anchunmi ishkay metru mas ishkay chunka pitsqa centïmetru karqan. Altuscho kaq cuartukunapa anchunmi ishkay metru mas qanchis chunka centïmetru karqan. Janan kaq altuscho kaq cuartukunapa anchunnami kimsa metru mas chunka pitsqa centïmetru karqan. Cuartukunata shäritsinanpämi templu waqtan pirqata shäritsirqan patakkunata jaqiyllapa. Tsay patakkunamannami churayarqan cuartukunapa vïgankunata. Tsaynöpami templupa pirqanta uchkutsirqannatsu.

7 Templuta shäritsiyänanpäqa llaqllashqallatanami rumikunata apayämurqan. Tsaymi templuta shäritsir martilluwan, cincelwan ni ima herramientawanpis takayarqantsu.

8 Patsa cuartukunaman yaykuna punkumi templupa derëchancho karqan. Altuscho y janan kaq altuscho kaq cuartukunaman yarkunanpämi tumaypa tumaypa escalëra karqan.

9 Templupa paredninkunata shärirkatsirnami vïgakunata churatsirqan. Nirkurmi vïga rurinpa entablatsirqan cedru tablakunawan. 10 Templuman laqaypa ruratsinqan cuartukunapa cada pïsupa altunninmi ishkay metru mas ishkay chunka pitsqa centïmetru karqan. Tsay cuartukunaqa cedru vïgakunawanmi templuman laqararqan.

11 Tsaymi Salomónta Tayta Dios nirqan: 12 “Estatütükunata, leynïkunata y mandamientükunata cumpliptikiqa noqapis taytayki Davidta awninqäta cumplishämi. Tsaymi shäritsinqayki templucho 13 Israel runakunawan tar paykunata imaypis kachäshätsu”.

14 Tsaynömi Salomónqa templuta shäritsir usharqan. 15 Templu rurin paredtami vïgapita patsayaq cedru tablakunawan entablatsirqan. Pïsuntanami ciprés tablakunawan entablatsirqan.

16 Templu rurincho Lugar Santïsimu kananpänami^† rakirqan isqun metru larguta. Tsay cuartupa parednintapis vïgapita patsayaqmi cedru tablawan entablatsirqan. 17 Lugar Santïsimupita punkuyaq chunka puwaq metrumi karqan. 18 Llapan templu rurintami cedru tablakunawan entablatsirqan. Tsaymi pirqanqan rumikunaqa ni ichikllapis rikakarqantsu. Tsay tablakunamanmi tallatsirqan calabäsukunata y tukturaykaq waytakunata.

19 Templu rurincho Lugar Santïsimuta Salomón ruratsirqan tsayman Tayta Diospa Pactu Babulninta churananpämi. 20 Lugar Santïsimupa largunmi isqun metru karqan. Tsaynöllami anchun y altunpis isqun metru karqan. Lugar Santïsimupa paredninmanqa qoriwanmi laqatsirqan. Tsaynöllami cedrupita ruratsinqan altartapis qoriwan laqatsirqan. 21 Tsaynöllami Lugar Santïsimuman yaykuna cuartukunatapis qoriwan laqatsirqan. Lugar Santïsimuman yaykuna punkupa jukaq kuchunpita jukaq kuchunyaqmi qoriwan laqashqa cadënata watarqan. 22 Tsaynöllami llapan templu rurinta y Lugar Santïsimucho kaykaq altarta qoriwan laqatsirqan.^†

23 Nirkurmi Lugar Santïsimuman churatsinanpä olïvus qerupita ishkay querubinkunata ruratsirqan. Tsay ishkan querubinkunapa tamäñunmi chusku metru pullan karqan. 24 Cada älankunami kayarqan ishkay metru y ishkay chunka pitsqa centïmetru. Tsaymi jukaq äla puntanpita jukaq äla puntanyaq chusku metru pullan karqan. 25 Tsaynöllami jukaq querubinpa älankunapis chusku metru pullan karqan. Tsaymi ishkanpis tsay tamäñulla y tsay niraqlla kayarqan. 26 Ishkanpapis tamäñunkuna chusku metru pullanmi karqan.

27 Tsay ishkan querubinkunatami Lugar Santïsimu cuartuman Salomón churatsirqan. Tsaynö ichïtsiptinmi jukaq querubinpa älan töparqan paredman y jukaq querubinpa älanpis töparqan jukaq paredman. Jukaq älankunanami Lugar Santïsimu chawpincho töpanakurqan. 28 Tsay querubinkunatami qoriwan Salomón laqatsirqan.^†

29 Lugar Santïsimupa paredninkunaman y Lugar Santïsimuman yaykuna cuartupa paredninkunamanpis querubinkunata, waytakunata y palmakunatami llaqllaypa dibujatsirqan. 30 Tsaynöllami ishkan cuartukunapa pïsunkunatapis qoriwan laqatsirqan.

31 Lugar Santïsimuman yaykunan punkunkunatapis olïvus qerupitami ruratsirqan. Tsay punkupa numbralninkuna y marcunkunaqa pitsqa esquïnayuqmi karqan. 32 Olïvupita ruratsinqan ishkan punkukunamanmi llaqllaypa dibujatsirqan querubinkunata, waytakunata y palmakunata. Tsaykuna jananpami qoriwan laqatsirqan.

33 Tsaynöllami templu punkupa marcunkunatapis olïvus qerupita cuadrädu listonkunata ruratsirqan. 34 Templu punkupa ishkan höjankunataqa ciprés qerupitami kushpiyuqta ruratsirqan. 35 Tsay punkukunamanpis querubinkunata, waytakunata y palmakunatami llaqllaypa dibujatsirqan. Tsaykunatapis qoriwanmi laqatsirqan.

36 Templupa ruri kaq patiuntapis kimsa hilëra llaqllashqa rumikunawan y juk hilëra cedru tablonkunawanmi corralatsirqan.

37 Chusku watana Salomón mandaq kaykarmi Zif killacho Tayta Diospa templunta shäritsiyänanpä cimientu churayta qallaykatsirqan. 38 Chunka juk watana rey kaykarmi Bul ninqan killacho Salomónqa Tayta Diospa templunta shäritsir usharqan. Tsay killaqa watacho puwaq killa kaqmi karqan.^b Templuta shäritsirqan imanö shäritsinanpäpis yarpachakunqannöllami. Salomónqa templu aruyta ushatsirqan qanchis watachömi.